Read Hadiyya Asteer Kitaaba 9 Bible Online

Asteer Kitaaba 9 - Hadiyya bible

Asteer Kitaaba 9

¹Adaar Yakkam tommikii la'm aganii aagu tommonnee saxxi ayyaamonnee adi'l alallaatii ijaajii wo'mmoo ayyaam hee'ukko; ee ayyaamonne Ayihuxxi manni diina'i ixxuwwa guulliteena egetta'a hee'llo'o; ihukkaarem Ayihuxxi manni ixxuwwi diina'anne ki'llamisina woshshoom dabassamukko.

²Ee adi'l gassi uullanne yo'i beero'uwwanne hundannem Ayihuxxi manni hee'llam beyyonne hundannem hawwojja afiseena hasoo ayyi manchonnem hawwojja afisseena xantamisanne ixxuwwi gaga gudissa'a hee'llo'o; hannonnem hee'llam minaadab ixxuwwa baddito'i bikkina ayyim ixxuwwinne uullixxameena iggukkoyyo.

³Mardookiyoosa baddito'i bikkina uulli hundannem yo'i gassaanii awwonsaanii daannuwwii adila bikkita'a baxxam keen hundim Ayihuxxi mannina hara'mmito'o.

⁴Mardookiyoos oo adil gassoo uullanne hundannem shiqqeen daannoom uwwamaakkoo lob manchi ihukkisii ixxi malaayyim qoxxukkuuyyi marukkisii erisa la'amukko.

⁵Ee bikkina Ayihuxxi manni ixxuwwi diina'a bisa'inne aphphissu'uuyyi shita'a guullito'o; ixxuwwa sabbam keenom hasso'isa issito'o.

⁶Ayihuxxi manni adi'l beero'i hee'u xale'i Suusa'annem onti xibbi manna shito'o.

⁷Ixxuwwiinsim Phaarshandaataa Daalfoonaa Asphaataa Phaaraataa Adaaliyaa Ariidaataa Phaarmaashitaa Ariisaayyaa Ariidaayaa Waayzaataa yamanta'a weeshantam Haamaadaat beet hee'u Ayihuxxi manni diinakkichchi ihu Haamaan oos hee'llo'o; ihukkaarem ixxuwwika amaxxa bogakko'oyyo.

¹¹Ee balla Suusa'i beero'onne lehu mannik xig hinkaa'nda'e adilina kuramukko.

¹²Adilim adil Asteerana «Oono'o adilla'n beero'i ihu xale'i Suusa'i beero'onnem Ayihuxxi manni shito'i mannik xig tommem Haamaan goo'n oosom edaa onti xibbe afaakko; uulli hundannem shito'ok kanniinsi lobakata lophphoo'n urooyyo; eehannah kaba kanniinsi mulleka maha hassootto? Oohim kiina issamookko; hassoo luwwa odim kure uwwamookko» yukko.

¹³Asteeram «Adila! Ki doo'l ihulas Suusa'i beero'onne hee'llam Ayihuxxi manni kaballa baxxo'i baxo soodom eddamsina kuramona; Tommem Haamaan oosikim leesh haqqanne saqalamoo'isina ijaaje» yita'a dabatto'o.

¹⁴Ookkim issamoo'isina adil ijaajukko; Suusa'i beero'onnem alallaat kuramukko; Haamaan tommem oosikim leesh mannina moo'amoo'isa issakka'a saqalakko'o.

¹⁵Adaara yamamoo aga'n tommonnee soo'l ballannee Suusa'i beero'onne hee'llam Ayihuxxi manni la'mmekam mat ikka'a odim sas xibbi manna shito'o; ihukkaarem ma'llichchom boggo'oyyo.

¹⁶Ee'isam oo adil gassoo uullanne hundannem hee'llam gatto'i Ayihuxxi manni yo'i beyyonne hundannem ixxuwwi mateeyyooma qoxxissa'a wixximminne ixxuwwi gaga ege'lliteena xanto'o; ixxuwwa sabbam hee'llo'i mannam lamarayyee onti kum mannaa shita'a ixxuwwi diina'i angiinsi ixxuwwi gaga gatisso'o; ihukkaarem matem amaxxam boggo'oyyo.

¹⁷Ku woshshim ihukkok Adaar yakkam agan aagu tommonnee saxxi ballannettee hee'ukko; ihukkaarem ee lasage tommonnee soo'l ballannee ma'lluwwam shitoo'nnim usheexxita'a liiranchi uguda issita'a hosso'o.

¹⁸Suusa'i beero'onne hee'llam Ayihuxxi manni ikko'aarem tommonnee saxxi ballannee tommonnee soo'l ballannee shitu'uuyyi hossa'a tommonnee onti ballannee uullisso'i bikkina ee tommonnee onti ayyaamonnee uguda issita'a liiranchinne hosso'o.

¹⁹Odim mat mat hoffi beero'uwwanne hee'llam Ayihuxxi manni Adaar yakkam aga'nneka tommikaa soo'l ayyaamoo uguxxi balli issimminne ittu'uuyyii aggu'uuyyii issena'i issem mat mullaannina hurbaata uwwitu'uuyyii hossamok ee bikkinatte.

²⁰Mardookiyoosim ka issamu luwwi hundikam aganna kitaabaa Faariis adi'l uullanne hundannem abbisonnee qee'llonnee hee'llam Ayihuxxi minaadab hundinam asse'ukko.

²¹Maarag hundam Adaar yakkam agan aagu tommikaa soo'l ballaa tommikaa onti ballaa ugud issita'a lonsimminne egettamisina kurukko.

²²Oo ayyaammuwwim Ayihuxxi minaadab ixxuwwi gaga ixxuwwi diina'i angiinsi gatissa'a usheexxato siiddo'i ayyaammuwwa; kichchechchiinsii neeyyata murimmiinsii liiranchannee usheexxatonnee higgo'ok ka aganannette hee'ukko. Ka ayyaammuwwanne uguda issita'a ittu'uuyyi, aggu'uuyyi, liirantu'uuyyii issena'i issem mat mullaannina hurbaaxxi maadda issitu'uuyyii buxinam hara'mmoo luwwa uwwitu'uuyyii egettamisina kuramukko.

²³Ee bikkina Ayihuxxi manni Mardookiyoos uwwu ijaajo egetteenaa asheetto'i ugudam maarag hundam lonsiteenaa iittanto'o.

²⁴Ayihuxxi mannina diinakkichchi hee'u Agaag shumo'ik Haamaadaat beet Haamaan Phuuriimaa yakkam saamo ubbuusimminne Ayihuxxi manna hundam uulliinsi fii'aa guulleena xanoo ayyaamo la'eena hasaa hee'ukko.

²⁵Ihukkaarem Asteera adi'l kollonne hincito'o; adilim ixxi ijaajo kitaabaa higisukko; oo ijaajim siidisu mishinne Haamaan Ayihuxxi manna guulliseena gudisaa hee'u woshshi ixxi gagannem daba'llukko; ixxii tommem ixxi oosii haqqanne saqalanto'o.

²⁶Ku uguxxi ayyaammuwwim «Phuuriima» Yamanta'a weeshantamok ka mashka'innette. Mardookiyoos asse'u assi mashka'inne illinne moo'llo'okaa ixxuwwanne afu luwwaa hundam tiirimminne

²⁷Ayihuxxi manni ixxuwwi gagina ixxuwwi shumo'inaa ee'isam Ayihud iheena hasoo keen hundinaa gindamoobee'i seera issito'o; oohim maarag hundam oo yamamu amman afoohaare Mardookiyoos uwwoo ijaaccisanne lamem ayyaammuwwam uttambee'isa lonsiteena murte'llo'o.

²⁸Ka Phuurii'm ayyaammuwwa qaranchi hundannem, abaroos hundannem, uulli hundannemii beero'uwwi hundannemii lonsimmi hasisoo'isa issakko'o; ka ayyaammuwwam lonsakkoo'n higimmi hasisooyyo; qaranchi lambe'iinsim eekka tirimma uranchi hasisooyyo.

²⁹Ee lasage Abihaayil landichcho adila Asteera Mardookiyoosinne maqir ikka'a phuurii'm bikkina Mardookiyoos gaassaatim kitaabaa asse'u asso qoxxisimminne isena yoo daannooma la'isimminne is ijaaj exxaakkoo asso kitaabba'a asse'llo'o.

³⁰Mardookiyoosim kitaabamu asso Arxeeksis gassoo xibbennee lamiyyennee lamar uullannee yo'i Ayihuxxi manni beyyo hanqii xummii yoo sagarinne asse'ukko.

³¹Odim eehanninne maqirem kanniinsi illageen soommanimminaa kichche'imminaa seera fissita'a hee'llo'isinne ka Phuurii'm ayyaammuwwa ixxuwwi gagim te'im ixxuwwi lasaqqi shumo'i maarag hundam egettamisina xa'mmoohan hee'ukko; oohim adila Asteeraa Ayihudichchi Mardookiyoosii mat sawwitinne iitanta'a lamim higisso'oo ijaaj hee'ukko.

³²Phuurii'm see'l bikkinaa gaassi losa'n bikkinaa kuramukkoka qoxxisimmina adila Asteera kitaabba'a asse'llo'i assik ijaaj annanni ihaakkoo aganni doonanne kitaabamukko.