Read Hadiyya Dooyyi Kitaaba 1 Bible Online

Dooyyi Kitaaba 1 - Hadiyya bible

Dooyyi Kitaaba 1

¹ Mi'n abaroosa amadda'a Yaaqoobinne maqirem Gibxa matto'i Isra'ee'l oosik summi

²«Roobeelatte, Simi'oonatte, Leewe'ette, Yihudatte,

³Yisaakooratte, Zaabiloonatte, Biiniyaamatte,

⁴Daanatte, Niftaaleematte, Gaadattee Aseerattee.

⁵Yaaqoob shumo'i hundim lamarayyi hee'llo'o. Ihukkaarem Yooseef illagem Gibxanne hee'ukko.

⁶Doolluwwiinsi lasonne Yooseef, ixxi abbaayyuwwii ee qaranchina anno'ii hundim leto'o.

⁷Ihukkaarem Isra'ee'l oos fikkaannitu'uuyyi matto'o; ixxuwwikim xig lophphukkuuyyi maru bikkina Gibxi uullanne wo'mmito'o.

⁸Ee lasage Yooseef bikkina la'oobee'i haareechchi adil Gibxi uullanne ki'ukko.

⁹Ixxim minaadabina «Oono'o Isra'ee'l minaadaphphek xig dutaakko; ixxuwwi niinniinsi malaayyitu'uuyyi matteenatte.

¹⁰Ee bikkina ixxuwwik xig exxoobee'isa, or ki'uta'nnim ni diina'inne hara'mmanta'a neese qassambee'isaa uulliinsim gibba'a mattambee'isaa mat luwwa qooccinona» yukko.

¹¹Ee bikkina u'nnissu'uuyyi kee'mmaalli baxo baxissam keeno doo'llito'o; Faari'ooninam Fiitoomaa Raamsee yakkam qoxxaalli beero'uwwa baxxo'o.

¹²Isra'ee'l oos wor amadanto'aarem ixxuwwik xig dutukkuuyyii uullannem wo'mmukkuuyyii marukko. Ee bikkina Gibxi uulli manni Isra'ee'l ooso baddito'o.

¹³Qishixxatbee'i monginnem baxisimma asheetto'o. Hara kade'isimminne, xuuba baxisimminnee uulla abuullisimminnee u'nnissu'uuyyi kee'mmaalli baxo baxissu'uuyyi ixxuwwika heechcha qaraassito'o.

¹⁴Gibxi minaadab ixxuwwa baxissam hee'llo'i baxonne hundannem ixxuwwina hore'em qishixxitam hee'llo'oyyo.

¹⁵Ee lasage Gibxi uulli adil Ibro'i meenti qaroo ammane qassiissam lam meento Siiphaaraa Fuhaa weeshaa

¹⁶«Ibro'i meenti qaroo ammane goonchi qaramulas ee ammanem shi'llehe. Ihukkaarem landi ihulas shitakkotte» yukko.

¹⁷Ihukkaarem oo meenti Waa'a baddito'i bikkina Gibxi uulli adil ijaajukkisa issito'oyyo; goon oosom shito'oyyo.

¹⁸Ee lasage Gibxi uulli adil ee meento weeshisaa «Goon ooso shitakkobee'i mashka'i maha?» yaa xa'mmukko.

¹⁹Ixxuwwim «Ibro'i meenti Gibxi meentisayyo; ixxuwwi qoxar meenti ikko'i bikkina neese amfoo'nnim gaassita'a qattamo» yita'a dabatto'o.

²⁰Oo meenti xuu'oo ammane qassiissam hee'llo'i keen Waa'a baddito'i bikkina Waa'im ixxuwwina er luwwa issukko; annannichchinam abaroosa uwwukko; Isra'ee'l minaadabim fikkaannukkuuyyii wodukkuuyyii marukko.

²²Ee lasage adil «Ibro'ika haareechcho qaramoo goo'n ooso hundam massitakka'a Abbaayyi daajjenne uunjehe; ihukkaarem landa nakkitakkotte» yaa minaadaba ijaajukko.