Read Hadiyya Dooyyi Kitaaba 10 Bible Online

Dooyyi Kitaaba 10 - Hadiyya bible

Dooyyi Kitaaba 10

¹Ee lasage Waa'i Muse'ena «Odim Faari'oon beyyo daba'llitaa mare; an ka maalalsiisoo mare'e moo'iseena hasummi bikkina ixxekaa ixxi gassaa'nnekaa wodano duudisaammo.

²Ee'isam Gibxi uulli manna guzumo'ummisaa ixxuwwi lambe'ennem maalalsiisoo mare'e issummisaa ki'nnuwwi oosinaa oos oosinaa kuttakkonattee an Waa'i ihummisam laqqakkonattee» yukko.

³Ee bikkina Muse'ee Aaroonii adi'l beyyo matta'a «Ibro'i manni Moollanni Waa'i ‹Iina ijaajancha sabboottok hinki balli afeebe'e? Kabadem iina awwaaddona i minaadaba fatakihe.

⁴Ihukkaarem i minaadaba fatakimma sabbilas soodo qawwaawwa ki uullanne asse'oommo.

⁵Qawwaawwim uulli moo'amoobee'isa ifiisookko; baradiinsi baraara gatu luwwaa uullanne mutu luwwaa hundam itaa guullookko.

⁶Ki adilla'n minenne, ixxi gassaa'nnaannonnee ki minaadaphphi minneewwannee qawwaawwi wo'mmookko; oohim gaassi kiyyanno'i doolliinsi kid hooraa moo'amu hawwiinsi hundiinsim jor hawwi ihookko› yoolla» yito'o. Muse'em Faari'oon illagiinsi firaa marukko.

⁷Adi'l gassaanim Faarioonina «Ku manchi niina qaash ihaa hawwisookkok hinki balli afeebe'e? Ixxuwwi Moollanni Waa'a awwaaddeena mattona fatakihe; uulli bi'oolli ihukkisa laqqittoyyonnihe?» yito'o.

⁸Muse'ee Aaroonii weeshanta'a Faari'oon beyyo hincito'o; Faari'oonim «Mattakka'a ki'nnuwwi Moollanni Waa'a awwaaddakkeena xantakkamo; ihukkaarem marimmi hasisookkok ayyayyaamo?» yaa xa'mmukko.

⁹Muse'em «Neese Waa'ina uguda issineena hoffokii lobokii hundim matim gantoo'n malloommo; niikka goon ooso, landa, gereebba, fella'aa laroo hundam massinoommo» yita'a dabatto'o.

¹⁰Adilim «Hino'o, mallehe; Waa'i ki'nnuwwinnetti ihona; ki'nnuwwi hantaaro sawwitakko'i bikkina ki'nnuwwi meentoo oosoo amaddakka'a mattakkona fatakoommoyyo.

¹¹Ee bikkina ihooyyo! Goon xale'i mattakka'a Waa'ina awwaaddakkeena hassakkolas goon xale'i mattakkeena xantakkamo» yukko. Ee lasage Muse'ee Aaroonaa Faari'oon illagiinsi hollakka'a fissakko'o.

¹²Waa'i Muse'ena «Gibxi uulla hundam qawwaawwi bi'isona ki anga iimaa'e; qawwaawwim waaraa baradiinsi gatukkokaa uullanne mutu luwwaa hundam itookko» yukko.

¹³Ee bikkina Muse'e Gibxi uullanne ixxeka bicco iimaa'ukko; Waa'i ee ballaa hiimoo eelliinchi fi'l hafachcha ki'isukko; la'm balla daram eelliinchi fi'l hafachchi qawwaawwa eebukko.

¹⁴Qawwaawwim Gibxi uulli hundannem weerarukko. Eehido'i qawwaawwi eehanniinsi illageen hee'ukkoyyo; ka lasagem hee'ooyyo.

¹⁵Uulli heemachchaa tuunseebe'e qawwaawwik gogot ifiisukko; baradiinsi gatu luwwa abuullanne mutukkokaa hane yoo mishaa hundam ma'lluchchim gatoobee'isa kankanaa itukko. Gibxi uullanne yoo haqqikii uullanne mutu luwwikii hundikim latu buyyi ma'lluchchim gatukkoyyo.

¹⁶Adilim qaqqisaa Muse'ee Aaroonaa weeshisaa «Ki'nnuwwi Moollanni Waa'aa ki'nnuwwaa hawwodaammo.

¹⁷Kaba iina xale'i matem kore haafi'llehe. Ka kee'mmaalli shoo boobana iinniinsi ki'isona ki'nnuwwi Moollanni Waa'a uunxehe» yukko.

¹⁸Muse'em adi'l illagiinsi firaa Waa'a uunxukko.

¹⁹Waa'im ee hafachcha qoxxaalli eelliinchi aaggi hafachchanne dabarukko; oo hafachchim qawwaawwa hundam fii'aa Ertiira'i dambalaqanne aagisukko; ee'isinne Gibxi uullanne qawwaawwik matichchim gatukkoyyo.

²⁰Ihukkaarem Waa'i Faari'oonika wodano duudisu bikkina kabadem Faari'oon Isra'ee'l ooso fatakukkoyyo.

²¹Ee lasage Waa'i Muse'ena «Gibxi uullanne gambabbaakkoo tuunsi ihoo'isina ki anga iim ki'ise» yukko.

²²Muse'em ixxeka anga iim ki'isukko. Sas ballinam Gibxi uulli hundannem gambabbaakkoo tuunsi ihukko.

²³Ee sasem ballannem mat mulleka moo'eena te'im hee'u beyyiinsi mulli beyyo mareena xanukkoyyo; ihukkaarem Isra'ee'l oos hee'llam beyyi hundannem caakki hee'ukko.

²⁴Adilim Muse'e weeshisaa «Ki'nnuwwi meentoo oosoo amaddakka'a mattakka'a Waa'ina awwaaddehe; ihukkaarem ki'nnuwwik gereebbi, fella'ii larii keyyem hee'ona» yukko.

²⁵Muse'em «Ni Moollanni Waa'ina shookkiisakka'a hincaa'akkam kitiminaa mulli kitiminaa ihoo fooraam diinate at uwwiteenannihe?

²⁶Ookki hore'em ihoobee'i woshsha; mat shuku'llim gatoo'n ni diinate hundam amandaa malloommo. Ni Moollanni Waa'ina kitim hincaa'nnoommi dinate doo'llinoommok neese gagame; ee beyyo amfoo'n kitimina ihoo diinat hinkido'anda'e lanqeena xannoommoyyo» yaa dabarukko.

²⁷Ihukkaarem Waa'i Faari'oonika wodano duudisu bikkina Isra'ee'l ooso fatakimma sabukko.

²⁸Adilim Muse'ena «I illagiinsi qee'lle! Macceese, la'mmeka ki ille moo'eena hasoommoyyo; i illagenne fittilas ee ballam letoo'isa la'e» yukko.

²⁹Muse'em «At yittisam ihona; od ki beyyo waaroommoyyo» yukko.