Read Hadiyya Dooyyi Kitaaba 11 Bible Online

Dooyyi Kitaaba 11 - Hadiyya bible

Dooyyi Kitaaba 11

¹Ee lasage Waa'i Muse'ena «Faari'oonannee Gibxi minaadabanne mulli boobanam dilliisoommo; ee lasage Faari'oon ki'nnuwwa mattakkona fatakookko; matichchim gattakkambee'isa fissookko.

²Isra'ee'l minaadab goonii meentii hundim ixxuwwi olla'anne yoo Gibxi uulli manniinsi birinnee worqinnee baxamu wereeggi mu'uttuwwa xa'mmita'a aa'llona kure» yukko.

³Waa'im Isra'ee'l oos Gibxi uulli manni illagenne nuura siiddamisa issukko. Muse'em Gibxi uullanne adi'l gassaa'n illagennee minaadaphphi illagennee lombaam manchi ihukko.

⁴Muse'em adilina «Waa'i ‹Kaballi hii'm luxxi baqitenne Gibxi uullanne dilloommo.

⁵Adillano lago aa'oo Faari'oon won beetiinsi ki'isaa agiddano baxukkuuyyi hee'oo buxichchi beet afeebe'e Gibxanne won ihaa qaramu goon hundim lehookko; fooraam diinaxxekim won lehookko.

⁶Gibxi uullanne hundannem kanniinsi illageen ihubee'ek ka lasagem ihoobee'i kee'mmaalli wi'l ihookko.

⁷Ihukkaarem Isra'ee'l minaadabannem ihukko diinatenne wishichchim muunooyyo; ee'isinne an Waa'i Gibxaannonnee Isra'ee'l minaadaphphi lambe'ennee annannaato qooccoomman ihukkisa laqqakkamo› yoolla» yukko.

⁸Muse'em «Ki gassaan hundim i beyyo waatta'a iina fogoddamo; i minaadaba amadaa firoommisina eese uunxitamo; ee lasage maroommo» yaa wocaa lasage kee'mmaallisa quuqaa adi'l illagiinsi marukko.

⁹Waa'i Muse'ena «Maalalsiisoo i aganni Gibxanne lophphaa moo'amona Faari'oon ki'nnuwwi woshsha macceesooyyo» yaa hee'ukko.

¹⁰Muse'ee Aaroonii ka agannuwwa adi'l illagenne issito'o; ihukkaarem Waa'i adi'lleka wodano duudisu bikkina Isra'ee'l oos ixxi uulliinsi fitta'a mattona fatakukkoyyo.