Read Hadiyya Dooyyi Kitaaba 12 Bible Online

Dooyyi Kitaaba 12 - Hadiyya bible

Dooyyi Kitaaba 12

¹Waa'i Muse'enaa Aarooninaa Gibxi uullanne

²«Ku agan ki'nnuwwina agan hundinaa hiinchi hundinaa luxxi agan ihona.

³Isra'ee'l minaadab hundinam ka woshsha losissehe; ku agan aagu tommi ayyaamonne ayyi manchim ixxi abaroosisinne mat ambula gudisona.

⁴Ee ambu'l maara mat mi'n abaroos itaa guulleena xanoobee'an ihulas ixxii ixxena hincoo ollakkichchii matikka'a lamem mi'n abaroosim itta'a guulliteena xantam qax ihona.

⁵Ki'nnuwwi doo'llitakkam diinat gereechcho te'im fellakkichchi iheena xanookko; ihukkaarem matem miiqakkam luwwim bee'i mat hiinchi ambul ihimmi hasisookko.

⁶Ee ambulluwwam ee aga'n tommii soo'l ayyaamii afeebe'e allaallehe. Tommonnee soo'l ayyaamonnee uulli hiimukkisam Isra'ee'l minaadab hundim ee diinate durona.

⁷Ee diinaxxekam maara itakkam annannichchi minneewwi gooc hanaa'nnaannonnee midaaxxi gubanannee xiigooma labbona.

⁸Maarooma ee hiimom giiranne babisakka'a qaraaroo buyyinnee qorosho'innee ittona.

⁹Ee maa'llekam qaquulla te'im wo'inne sattakka'a ittakkotte; horoore, lokkuwwaa godaphphi mu'utaa hundam giiranne babissakka'a ittehe.

¹⁰Soodeebe'e ee maa'lleka mat luwwam gatissakkotte; gatu luwwimdu hee'ulas hundam giiranne shokkiissehe.

¹¹Dooyyina gudu mannisa lade'llakka'a, kobe'e issaqqitakka'ahii bicco anganne amaxxitakka'ahii gaaggaabiminne ittehe; ookkim eese Waa'a lonsitakkam Shaashshiqqi Uguda.

¹²«Ee hiimo an Gibxi uullanne dillaa mannikaa diinaxxekaa wona hundam shoommo; Gibxi uulli qophpha'n waa'uwwi hundam aphphisoommo; an Waa'a.

¹³Ki'nnuwwi yoontakke'i minneewwi gubananne xiiqqi mare'i yoo bikkina ee xiiqqi mare'e moo'aa uraa higoommo. Ee'isinne Gibxi uulli minaadaba boobaninne aphphisoommi ammane ki'nnuwwanne matem boobanim afooyyo.

¹⁴An Waa'i ki'nnuwwina issummi luwwa hundam sawwimminne oo ayyaam ki'nnuwwina amma'nnaxxi lombi ugud ihona; ookkim ki'nnuwwi oos oosina seer ihaa waaroo doollenne hundannem lonsitakkam ugud ihona» yukko.

¹⁵Waa'i «Lamar balla ursho'i bee'i qorosho'o ittehe; luxxi ballanne ursho'i mahim gatoobee'isa ki'nnuwwi minneewwiinsi fissitakka'a hoollehe. Ayyi manchim ee lamarem ballannem ursho'aam hurbaata itulas Isra'ee'l minaadabiinsi annanni ihaa bi'ona.

¹⁶Ee lamarem balliinsim luxxi ballaa lama'l ballaa keesamaakkoo dummichcha dummehe; ee lamarem ballannem ki'nnuwwi gagina hurbaata gudisimmiinsi bagaan mat luwwam baxxakkotte.

¹⁷An ki'nnuwwa hundam Gibxi uulliinsi awwonsaa fissummok ee ballannetti ihu bikkina ee balla qorosho'i uguda lonsehe; waaroo doollenne hundannem ka uguda qoxxaalli seer issitakka'a egellehe.

¹⁸Luxxi aga'n tommiinsii soo'l balli hiimiinsii ki'isaa lamiyyii mat balli hiimii afeebe'e qorosho'o[4] ittehe.

¹⁹Ee Lamarem ballannem ursho'ik ma'llichchim ki'nnuwwi minenne hee'oone; Isra'eelchom ihukko waaraanchi ursho'i exxu hurbaata itulas Isra'ee'l minaadabiinsi annanni ihaa bi'ona.

²⁰Ee ayyaammuwwanne ayyi beyyonnem ikkakko'aare urshobee'i qorosho'o ittehe bagaan ursho'i yookkoka ma'lluwwam ittakkotte» yukko.

²¹Muse'e Isra'ee'l minaadaphphi awwonsaano hundam weeshaa «Ki'nnuwwi abaroos annannichchim Shaashshiqqi ugudina ihoo gereechchi ambula doo'llitakka'a dullehe.

²²Mat qixxare'i hiisoophphi buyya gudissakka'a bixxiranne yoo xiiganne ceffakku'uuyyi ki'nnuwwi minneewwi gooc hanaa'nnaannonnee midaaxxi gubanannee labbehe; soodeebe'e ayyi manchim ixxi miniinsi firoone.

²³Waa'i Gibxi minaadaba lehinne guzumo'eena Gibxi uullanne dillookko; hanaa'nnaannonnee midaaxxi gubanannee yoo xiigam moo'aa higaa marookko; sira'iillichchim ki'nnuwwi mine aagaa shoobee'isa hoorookko.

²⁴Ki'nnuwwii ki'nnuwwi oosii ka seera heer heerinam egettakkamo.

²⁵Waa'i ki'nnuwwina uwwoommo yaa sagara aagukkisinnem ee uulla aaggakkam ammane ka seera egellehe.

²⁶Ki'nnuwwi oos ‹Ku seer mahane?› yaa xa'mmoo ammane

²⁷ki'nnuwwi ‹Kuk Waa'a lonsimmina ihoo shaashshiqqi uguxxi kitima; mashka'oomim Waa'i Gibxi manna lehinne guzumo'u ammane Isra'ee'l minaadaphpheka minneewwa higaa neese gatisu bikkina Waa'a lonsimmina ihoo shaashshiqqi uguxxi kitima› yitakka'a kuttakkamo» yukko. Isra'ee'l minaadabim eekka macceesso'i ammanenne heeshita'a otossito'o.

²⁸Isra'ee'l minaadabim Waa'i Muse'ee Aaroonaa ijaajukkoka hundam issito'o.

²⁹Waa'i hii'mmaannonne luxxi baqitenne Gibxi uulli minaadaphpheka adilla'n barcumanne afuuru Faari'oon beetiinsi ki'isaa karaxxi minenne karamu manni won oos afeebe'e mannikaa diinaxxekaa wona hundam lehinne guzumo'ukko.

³⁰Ee hiimonne Faari'oonii ixxi gassaanii ee'isam Gibxi minaadabii hundim diriiriinsi baqito'o; won lehubee'i min matim hee'ubee'i bikkina Gibxanne hundannem kee'mmaalli wi'l hee'ukko.

³¹Ee hiimo Faari'oon Muse'ee Aaroonaa weeshisaa «Ki'nnuwwii Ki'nnuwwi minaadab ikko'i Isra'eelii ka uulliinsi fillehe; i uullam fatakitakka'a mallehe; yitakko'isam mattakka'a Waa'ina awwaaddehe.

³²Ki'nnuwwi yitakko'isam ki'nnuwwika gereebba, fella'aa mulli diinatee hundam amaddakka'a mallehe; eesem maasse'llehe» yukko.

³³Isra'ee'l minaadab qaqqissa'a uulla fatakita'a fittona Gibxi uulli minaadab ixxuwwi gagim «Ki'nnuwwi qaqqissakka'a fatakitakka'a fittakkobeelas oono'o neese hundim beeddineenatte» yita'a gaaggaabisso'o.

³⁴Ee bikkina Isra'ee'l minaadab qufisamu qama buko'i mu'utanne wonshita'a eddechchinne xaaxxa'a gudumonne iyyito'o.

³⁵Isra'ee'l minaadabim Muse'e ijaajukkisam issito'o; oohim worqiinsii biriinsii baxamu mu'uttuwwaa eddechchaa uwwitona Gibxi minaadaba xa'mmito'o.

³⁶Waa'im Gibxi minaadaphphi illagenne Isra'ee'l minaadab nuura siiddamisa issu bikkina xa'mmito'i luwwi hundam uwwito'o. Ee bikkina Isra'ee'l minaadab Gibxi uulli amaxxa bogga'a matto'o.

³⁷Isra'ee'l minaadabim Raamse'iinsi ki'lla'a Sukoota matto'o; ixxuwwikim xig meentoo oosoo edoo'n loh xibbi kum hee'ukko.

³⁸Ixxuwwinne maqirem annanni annanni dut minaadab lobakat gereebba, fella'aa mulli fooraam diinatee ushe'aa firukko.

³⁹Gibxiinsi amadda'a fitto'i qamiinsi qorosho'o satto'o; mashka'oomam Gibxiinsi gaaggaabba'a fitto'i bikkina ixxuwwi gaqqi hurbaata gudisimmina, te'im ursho'inne qufisamaakkoo hurbaata sarimmina amman hee'ukkoyyo.

⁴⁰Isra'ee'l minaadab Gibxi uullanne hee'llo'ok 430 hiinchoo hee'ukko.

⁴¹Oo 430 hiinchii beeddukkaare ee ballam Waa'i minaadab hundim Gibxa fatakaa firukko.

⁴²Waa'i ee hiimo ixxi minaadaba Gibxiinsi fisseena egeraanchi ihaa garu bikkina Isra'eel waaroo qaranchanne hundannem Waa'a lonsiteena ee hiimo egeraan ikka'a garimmi hasisookko.

⁴³Waa'i Muse'enaa Aarooninaa «Shaashshiqqi uguxxi seer kane; allaggichchi ihu ayyi manchim higimmi ugudina gudu hii'm hurbaata itoone.

⁴⁴Ihukkaarem diinatinne bitaa'llakko'i ki'nnuwwi agid ballachchamaa lasage iteena xanookko.

⁴⁵Koyyiinchi te'im baxina aagissakko'i manchi itoone.

⁴⁶Oo hurbaat biira firimmi hasisoobee'i bikkina ee gudu minennem ittehe; miqem iiqqakkotte.

⁴⁷Isra'ee'l minaadab hundim ka uguda lonsona.

⁴⁸Ihukkaarem ballachchamubee'ek ayyi manchim itoone; ki'nnuwwinne hee'oo waaraan Waa'ika shaashshiqqi uguda lonseena hasulas gaassitakka'a ixxuwwi minenne hee'oo goon hundam ballachchehe; ee lasage Isra'ee'l oosisa xigamaa shaashshiqqi uguda ki'nnuwwinnem lonsona.

⁴⁹Ku seer ki'nnuwwinaa ki'nnuwwinne hee'oo waaraaninaa hundinam ihona» yukko.

⁵⁰Isra'ee'l minaadab hundim Waa'i Muse'ee Aaroonaa ijaajukkoka hundam issito'o.

⁵¹Ee ballam Waa'i Isra'ee'l minaadaba hundam gaalchi gaalchinnem Gibxiinsi fissukko.