Read Hadiyya Dooyyi Kitaaba 13 Bible Online

Dooyyi Kitaaba 13 - Hadiyya bible

Dooyyi Kitaaba 13

¹Waa'i Muse'ena

²«Isra'ee'l minaadaphphekii diinaxxekii won hundim iihane; ee bikkina won ihaa qaramukkoka hundam iina keese» yukko.

³Muse'em minaadabina «Agiddanonne Gibxanne hee'llakko'i beyyiinsi fittakko'i balli ihu bikkina kaballa sawwillehe; Waa'i ee uulliinsi ixxaanninne wodaam anginne ki'nnuwwa fissaakko; ee bikkina ursho'i yoo hurbaata ittakkotte.

⁴Kaballa Aabiib[5] yakkamaannonne hiinchi luxxi agananne Gibxi uulla fatakitakka'a fittakko'ookko.

⁵Kana'aa'n mannika, Hiite'i mannika, Amoore'i mannika, Hiiwe'i mannikaa Iyyaabuus mannikaa uulla ki'nnuwwi anno'ina uwweena sagara aagaakko; marabii adii daadoo ee harish uulla ki'nnuwwi aaggakkam ammane hiinchaannonne luxxi agananne ka uguda lonsitakkamo.

⁶Lamar balla hundoomam xale'i qorosho'o ittakkamo; lama'l ballannem Waa'i lombina uguda issitakkamo.

⁷Lamar balla hundoomam ursho'i mahimbee'i qorosho'o ittakkamo; ursho'i te'im hufu luwwi hore'em ki'nnuwwi uullanne hee'oone.

⁸Ee balla «Ka uguda lonsinoommok Gibxiinsi fillummi balla Waa'i niina issu luwwi bikkinatte» yitakka'a ki'nnuwwi oosina kullehe.

⁹Waa'i ixxaanninne wodaam malaayyinne Gibxiinsi ki'nnuwwa fissu bikkina Waa'ik seer ki'nnuwwi angannem mare'i ihona; miinennem tiissiishshi ihona.

¹⁰Ee bikkina ka uguda hiinchonne hiinchonne qoodamu ballanne lonsehe.

¹¹«Waa'i ki'nnuwwinaa gaassi ki'nnuwwi anno'inaa uwweena sagara aagu Kana'aa'n uulla aaggakkam ammanee uullam ki'nnuwwina uwwoo ammanee

¹²ki'nnuwwika wona hundam Waa'ina uwwehe; ee'isam ki'nnuwwi diinaxxekim goonchi ihaa qaramu won hundim Waa'ina annanni ihaakkoohan ihona.

¹³Ihukkaarem hallichchi wonina gereechchi ambula tissi issitakka'a uwwehe; ihukkaarem tisso miqqakka'a aa'llakkeena hassakkobeelas gaanje booqaaqqehe; won goo'n oosinam tisso miqimmi hasisookko.

¹⁴Waaroo doollenne ki'nnuwwi oos ka see'l bikkina xa'mmoo ammane ‹Gibxi agiddaniinsi Waa'i ixxi wodinne neese fissukko.

¹⁵Gibxi adil ixxi wodano duudisaa xiiqqinne fatakoommoyyo yu ammane Waa'i Gibxi uulli mannikaa diinaxxekaa won hundam shukko; diinaxxeka wona hundam kitim issinaa hincaa'nnoommok ee bikkinatte; ihukkaarem won goo'n oosina tisso minqoommo.

¹⁶Ku seerim ni angannee ni miinennee yoo mare'isa tiiramoohane; Waa'i neese Gibxiinsi ixxi wodinne fissukkisam tiissiisoohane› yitakka'a kuttakkamo» yukko.

¹⁷Fari'oon minaadaba fataku ammaane Waa'i abbis ihu Filisxee'm uulli googinne ixxuwwa awwonsukkoyyo; mashka'oomim minaadab ixxuwwi illagenne or yoo'isa moo'lla'a sawwite dabatta'a Gibxi uulla daba'llita'a mattambee'isa isseenatte.

¹⁸Ee bikkina Waa'i ixxi minaadaba do'isaa massoo googinne Ertiira'i dambalaq uulli udma'inne awwonsukko. Isra'ee'l oosim Gibxi uulliinsi orina guddo'aannisa ikka'a fitto'o.

¹⁹Yooseef «Waa'i ki'nnuwwina hara'mmaa ka uulliinsi fittakkam ammane i miqem amaddakka'a fillehe» yaa Isra'ee'l ooso hidiisaa hee'u bikkina Muse'e Yooseefika miqe amadaa marukko.

²⁰Isra'ee'l oosim Sukootiinsi ki'lla'a udma'i uulli tochchonne yoo Eetaamanne wiidda'nto'o.

²¹Ee bikkina ixxuwwi ballaa hiimoo taakke'lleena xantamisina Waa'i ballaa googo awwonsoo duuphphi utubinne, hiimom caakkisoo gii'l utubinne awwonsam hee'ukko.

²²Duuphphi utub ballanne gii'l utubim hiimonne amman hundam ixxuwwi illagiinsi annanni iham hee'ukkoyyo.