Read Hadiyya Dooyyi Kitaaba 14 Bible Online

Dooyyi Kitaaba 14 - Hadiyya bible

Dooyyi Kitaaba 14

¹Waa'i Muse'ena

²«Isra'ee'l minaadab daba'llita'a Migdoo'llaannonnee Ertiira'i dambalaq lambe'ennee yoo phihaahiiroot illagenne Ba'aalxaafoon gadanonne wiiddantona kure.

³Faari'oon Isra'ee'l minaadab duduqita'a uulli udma'anne karkaaddamuulla yaa sawwoolla.

⁴Anim ixxeka wodano duudisoommi bikkina ki'nnuwwa hollansookko; ee bikkina Faari'oonaa ixxi gogotaa kaa'aa iikka lomba moo'isoommo; ee ammane Gibxi uulli manni an Moollanni Waa'i ihummisa la'ookko» yukko. Isra'ee'l minaadabim ixxuwwina kuramukkisa issito'o.

⁵Gibxi adilim Isra'ee'l minaadab xotto'isa macceesu ammanenne ixxii ixxi gassaanii sawwite dabatta'a «Ku issinummi luwwi maha? Isra'ee'l minaadab niinniinsi fissaqqita'a mattamisa issimminne niina awwaaddam manna hundam hoongummuullayyonnihe?» yito'o.

⁶Adilim ixxeka faraxxi gaarre'e gudisaa ixxi gogota ki'isukko.

⁷Doo'llamaakkoo faraxxi gaarre'uwwika loh xibbe edaa Gibxi uullanne yo'i faraxxi gaare'uwwa gudisukko; gaaxxi awwonsaanom baxxansukko.

⁸Waa'i Gibxi uulli adi'lleka wodano duudisaa hee'u bikkina iggimminne fittu'uuyyi hee'llo'i Isra'ee'l minaadaba hollansukko.

⁹Gibxi gogot faradinnee faraxxi gaarre'uwwinnee ixxuwwa hollansito'o; ixxuwwim Ertiira'i dambalaq illagenne yoo Fiihaahiiroot Ba'aalxaafoon gadanonne wiiddanto'oohaannonne affo'o.

¹⁰Isra'ee'l minaadabim Faari'oonii ixxi gogotii ixxuwwa laseessa'a affo'isa moo'llo'i ammanenne lobakata baddito'o; Waa'i kollonnem laatto'o.

¹¹Muse'enam «Gibxi uullanne manna waammakkam beyyi hee'ukkoyyonnihe? Eehannah ka uulli udma'anne lenoommisina neese wottittok mahinatte? Neese Gibxiinsi fissittaare neesenne afu luwwa hino'o moo'e!

¹²Ku woshshi hundim neesenne afoo'isa ee beyyiinsi filleena illagem kiina kullaa hee'nnummoyyonnihe? Hore'oomam neese Gibxi uulli mannina agid inkaa hee'nnona cawwitaa ure› yinummoyyonnihe? Hanqinam ka uulli udma'anne lehimmiinsi ee beyyonne agid inkaa hee'nnumita'n e'llam hee'ukko» yito'o.

¹³Muse'em minaadabina «Badditakkotte! Kaballa moo'llakkam Gibxi uulli manna heer heerinam moo'llakkamoyyo; yoontakke'i beyyonnem qoxxitakka'a uullehe; Waa'i ki'nnuwwa gatiseena issoo luwwa kaballa moo'llakkamo.

¹⁴Waa'i ki'nnuwwi bikkina oramookko; ki'nnuwwim cawwitakka'a ihoo luwwa hundam moo'llakkamo» yukko.

¹⁵Waa'im Muse'ena «I kollonne laattoottok mahinatte? Isra'ee'l minaadab taakke'llona kure.

¹⁶Atim ki bicco ki'issaa ka dambalaqa aphphise; wo'im lam beyyonne baxxansamookko; Isra'ee'l minaadabim dambalaq lambe'inne gogaalli uulla hance'lla'a higgamo.

¹⁷Gibxi uulli minaadaphphekam wodano duudisoommi bikkina Isra'ee'l minaadaba hollansitamo. Faari'oona, ixxi gogota, Faraxxi gaare'ee faradaanoo kaa'imminne lomba edde'oommo.

¹⁸Faari'oonaa ixxi gogotaa kaa'oommi ammane Gibxi uulli manni an Moollanni Waa'i ihummisa la'ookko» yukko.

¹⁹Isra'ee'l gogotiinsi illagenne awwonsam hee'u Waa'i asse'amaanchi gogoxxi lasinne daba'llaa uullukko; ee'isam duuphphi utub illagenne hee'u beyyiinsi lasonne daba'llaa uullukko.

²⁰Duubim Gibxaannonnee Isra'ee'l gogoxxi lambe'ennee ihaa Gibxinaa tuunsi Isra'eelinaa caakki caakkoo'isa issukko. Ee bikkina hiimooma hundoomam ixxuwwina'i ixxuwwi moo'aqqanteena xanto'oyyo.

²¹Muse'em ixxi anga dambalaqanne biddiqaa'ukko. Waa'im ee hiimo hundoomam eelliinchi firiinsi qoxxaalli hafachcha ki'isaa dambalaq laso daba'lloo'isa issaa gogaalli uulli issukko; wo'im lam beyyonne baxxansamukko.

²²Isra'ee'l minaadab gogaalli uullinne dambalaq lambe'inne higaa marukko; wo'im ixxuwwaanninne makkinnee qeddinnee gortannisa uullukko.

²³Gibxi gogotim ixxuwwi faraxxi gaarre'uwwinne, faradinnee faradaaninnee hollansitu'uuyyi awwonta'a dambalaq woro aaggo'o.

²⁴Uulli soodukkuuyyim Waa'i duuphphaanninnee gii'l utubinnee ihaa moo'u ammanenne Gibxi gogot hambalaachchanto'o.

²⁵Waa'i ixxuwwi faraxxi gaarre'uwwika lokkuwwa uullinne amaxxansu bikkina mikmikaa'lleena xanto'oyyo; Gibxi gogotim «Waa'i Isra'ee'l minaadabina hara'mmaa niinninne oramoolla; ee bikkina ixxuwwi illagiinsi gimbona» yito'o.

²⁶Waa'im Muse'ena «Ki anga dambalaqanne ki'ise; wo'im Gibxi gogotanne, faraxxi gaarre'uwwannee faradaanonnee daba'llona» yukko.

²⁷Ee bikkina Muse'e ixxi anga dambalaqanne ki'isukko; dambalaqim uulli soodukkuuyyi gaassi beyyonnem daba'llukko. Gibxi gogotim wo'iinsi gibaa xoreena yakukko. Ihukkaarem Waa'i ixxuwwa dambalaqanne darabukko.

²⁸Wo'im daba'llaa Isra'ee'l minaadaba hollansitam hee'llo'i gaarre'uwwanne, faradaanonnee ee'isam Gibxi uulli gogotannee hundannem gunguussamukko; ixxuwwiinsi mat manchim gatukkoyyo.

²⁹Ihukkaarem Isra'ee'l minaadab wo'i makki kollinnee qeddi kollinnee gortannisa ihaa uullu bikkina gogaalli uullinne higgo'o.

³⁰Ee balla Waa'i Isra'ee'l minaadaba ee'isinne Gibxi gogotiinsi gatisukko; ixxuwwim ee dambalaq gammalanne ubu Gibxi uulli mannika leesha moo'llo'o.

³¹Waa'i ixxi wodinne Gibxi gogota kaa'ukkisa moo'lla'a Isra'ee'l minaadab Waa'a baddito'o; Waa'annee ixxena awwaadaanchi Muse'ennee amma'nnito'o.