Read Hadiyya Dooyyi Kitaaba 15 Bible Online

Dooyyi Kitaaba 15 - Hadiyya bible

Dooyyi Kitaaba 15

¹Ee lasage Muse'ee Isra'ee'l minaadabii «Farashshoo farashshaanchoo dambalaqanne darabimminne lombinne iimiimu bikkina Waa'ina zammaroommo.

²Waa'i iina malaayyee mazmuuraa; eese gatsukkokim ixxotte. Ixxi iina Waa'i ihu bikkina galaxxoommo; iyyanninam Waa'i ihu bikkina iimiimaa'oommo.

³Moollanni Waa'i oramoohane; ixxi summim Moollanni Waa'a.

⁴«Faari'oon gogota faraxxi gaare'innem Ertiira'i dambalaqanne ubbuusukko; doo'llamaakkoo ixxi gaaxxi awwonsaanim Ertiira'i dambalaqanne xuuxamukko.

⁵Xillaalli wo'i ixxuwwa xuuxukko; kinisam dambalaq xillanne xuuxanto'o.

⁶«Moollanni Waa'a! Ki makki angi malaayyinne la'amaakkoohane; Moollanni Waa'a! Ki makki angi diina'a iiqansaakko.

⁷Hibbaam ki lombinnem kiinninne uullixxamoo keeno bi'issitto; ki quunqi dillaa ixxuwwa bura'isa itukko.

⁸At fooshshe'llittaare wo'i iim ki'aa uullukko; gortannisam xabbaa uullukko; xillaalli lugumonne yoo wo'im qoxxaa kin ihukko.

⁹«Diina'im ‹Hollaa amadoommo; ixxuwwi amaxxam bogoommo; hasummokam massoommo; i bisa'am makkisaa amadaa ixxuwwa bi'isoommo› yaa biramaa hee'ukko.

¹⁰Ihukkaarem Moollanni Waa'a! Ki fooshshinne dambalaq ixxuwwa xuuxukko; xilli dambalaqanne ubu xaa'llisam xuuxanto'o.

¹¹«Moollanni Waa'a, mulli waa'uwwiinsi kiinni'nnookkok hinkane? keesammoominne nuuraa lombinne baddisookkok maalalsiisoo aganna issoo kiinni'nnookkok hinkane?

¹²Ki makki anga biddiqaa'llitto; uullim ni diina'a xuuxukko;

¹³Heer heerina hee'oo ki iittinne at gatissitti ki minaadaba awwonsitto; ki wodinnem keesammi ki uulla aaggona awwonsitaatto.

¹⁴Mulli minaadab eekka macceessa'a huxe'llo'o; Filisxee'm mannim xuu'llo'o.

¹⁵Ee ammane Eedoo'm minaadaphphi awwonsaan muggito'o; Moo'aaphphi maalaayyaammuwwim huxe'llo'o; Kana'aa'n minaadabim luqucito'o.

¹⁶Moollanni Waa'a, ki minaadab higeebe'e at gatissitti minaadab higeebe'e baachchii muggimmii ixxuwwanne ihaakko; ki wodinnem kinisa duuddo'o.

¹⁷Moollanni Waa'a, at gatti beyyi issitaa baxxitti ki heechchi beyyo, Moollanni Waa'a, ki angi baxu ki Keesammi Minee kiina gulummi ihu duunaa ixxuwwa wottaa kaassootto.

¹⁸Waa'i heer heerinam adila» yita'a Waa'ina zammatto'o.

¹⁹Isra'ee'l minaadab gogaalli uullinne dambalaqa higgo'o; Faari'oon farad, faraxxi gaare'uwwii faradaanii hundim dambalaq woronne aaggo'i ammanenne Waa'i wo'i ixxuwwanne daba'lloo'isa issukko.

²⁰Aaroon aayyatte hee'llo'i hiraagaancho Maaraame is dibbe'e ki'isso'o; ee'isam mulli meentim dibbe'e ki'issa'a kaddu'uuyyi ise awwonto'o.

²¹Maaraamem «Farashshoo farashshaanchoo dambalaqanne darabimminne lombinne iimiimu bikkina Waa'ina zammallehe» yitu'uuyyi zammatto'o.

²²Ee lasage Muse'e Isra'ee'l minaadaba Ertiira'i dambalaqa higisaa Suur udma'i uulli kolli massukko; sas balli hundoomam uulli udma'anne taakke'llo'o; wo'om siiddo'oyyo.

²³Ee lasage Maaraa yakkam beyyo affo'o; ihukkaarem ee beyyonne yoo wo'i lobakata qaraaraalli ihu bikkina aggeena xanto'oyyo; Maaraa yamamukkokim ee bikkinatte hee'ukko.

²⁴Minaadabim Muse'enne qunquunaa «Eehannah maha angeenatte?» yaa ki'amukko.

²⁵Muse'em Waa'i kollonne laarukko; Waa'im ixxena mat haqqichcho moo'isukko; eekkam massaa wo'i woronne ubbuusu ammanenne oo wo'i xee'ukko. Ee beyyonne Waa'i ixxuwwina seeraa gatti ogoraa uwwukko; ee beyyonnem ixxuwwa keenukko.

²⁶Ixxuwwinam «Iikka ki'nnuwwi Moollanni Waa'ika sagara macceessakkolas, i illagennem er luwwa issitakkolas, i seera guullitakka'a egettakkolasii gatti ogoram egettakkolasii Gibxi minaadabanne eebummi jabbinne matinnem ki'nnuwwa guzumo'oommoyyo; ki'nnuwwam fayyiisoommi Waa'i anette» yukko.

²⁷Ee lasage Eeliima yakkam beyyo matto'o; ee beyyonnem tommii lam wo'i bu'uwwii lamarayyi tami'l haqquwwii hee'ukko; ee wo'i gadanonnem wiiddanto'o.