Read Hadiyya Dooyyi Kitaaba 17 Bible Online

Dooyyi Kitaaba 17 - Hadiyya bible

Dooyyi Kitaaba 17

¹Isra'ee'l minaadab hundim Waa'i ijaajukkisinne Siin udma'iinsi ki'lla'a Raafiidiimanne wiiddanto'o; ihukkaarem ee beyyonne agakkam wo'i hee'ukkoyyo.

²Ee bikkina «Angoommi wo'o uwwe» yita'a Muse'enne ki'llo'o. Muse'em ixxuwwina «Iinninne mahina wocantakkamuulla? Waadu mahina keentakkamuulla?» yaa dabarukko.

³Ihukkaarem Isra'ee'l minaadab lobakata xeebe'lla'a hee'llo'i bikkina «Neese Gibxiinsi fissittok mahinatte? Neese ni oosoo ni diinatee hundam wo'i xeebinne guulliteenannihe?» yitu'uuyyi Muse'enne quunquunto'o.

⁴Muse'em «An ka minaadaba hinkid isso? Oono'o eese kininne aphphisseena guddo'ookko» yaa Waa'i kollonne laarukko.

⁵Waa'im Muse'ena «Isra'ee'l minaadaphphi awwonsaaniinsi hofqaxam amaddaa minaadaphphi illagenne hige; Abbaayyi daajje aphphissitti biccom amaddaa mare.

⁶Oono'o, an Siina'i sifo'i kinanne ki illagenne uulloommo; atim ee kina aphphise; minaadab agoo wo'im ee kiniinsi firookko» yukko. Muse'em Isra'ee'l awwonsaa'n illagenne ee'isa issukko.

⁷Isra'ee'l minaadab «Waa'i niinninne yoohonnii bee'e?» yita'a Waa'a keento'i bikkinaa quunquunto'i bikkinaa ee beyyika summa «Maasahaa[7] Mariibaa» yaa weeshukko.

⁸Isra'ee'l minaadab Raafiidiimanne yo'aannonne Amaaleeq minaadab dangonne waatta'a qasso'o.

⁹Muse'em Iyyaasina «Hofqax mannam doo'llitaa mattaa soodo Amaaleeq manna qase; anim Waa'i iina uwwu bicco amadaa duu'n ludonne uulloommo» yukko.

¹⁰Iyyaasim Muse'e ijaajukkisanne Amaaleeq minaadabinne oramukko; Muse'e, Aaroonii Hoorii duu'n ludonne fitto'o.

¹¹Muse'e ixxi anga iim ki'isoo ammane Isra'ee'l minaadab kaa'am hee'ukko; ihukkaarem anga dilliisoo ammane Amaaleeq minaadab kaa'am hee'ukko.

¹²Muse'ek angi hoogukkaare Aaroonii Hoorii kina eebba'a Muse'e afuuroo'isa issito'o; ixxuwwim mat matkollinne mat mulli kollinne uullita'a ixxeka anga eelliinchi aageebe'e bakkiissa'a amaddo'o.

¹³Ee bikkina Iyyaas Amaaleeq gogota bisa'inne kaa'ukko.

¹⁴Ee lasage Waa'i Muse'ena «Hundi ammanem tiiramukkuuyyi hee'oo'isina ka kaachchika aganna kitaabe; Iyyaasinam Amaaleeq minaadaba guullaa bi'isoomman ihukkisa kure» yukko.

¹⁵Muse'em kitima hincaa'akkam beyyo baxaa ee beyyika summa «Waa'i iina kaachchi mare'e» yukko.

¹⁶Ee'isam «Ixxi angi Waa'i adilla'n kollonne ki'u bikkina Waa'i Amaaleeq minaadabinne heer heerinam oramookko» yukko.