Read Hadiyya Dooyyi Kitaaba 18 Bible Online

Dooyyi Kitaaba 18 - Hadiyya bible

Dooyyi Kitaaba 18

¹Muse'e balli ihu Miidiyaa'm qeessichchi Yootir Waa'i Isra'ee'l minaadaba Gibxi uulliinsi fissu ammane Muse'enaa ixxi minaadab ihu Isra'eelinaa issu luwwi hundam macceesukko.

²Muse'e ixxi are Siiphphaara dabaraa asse'u ammane ixxi balli Yootir isee is lamem oosoo taqeebalaa hee'ukko.

³Muse'e «Allaggi uullanne an waaraancho» yaa ixxi won beetika summa «Gershooma» yukko.

⁴«Iyyanno'i Waa'i iina hara'mmaancho; eesem Faari'oon bisa'iinsi gatisaakko» yaa la'm beetika summa «Eeli'eezara» yukko.

⁵Muse'e balli Yootir Muse'e goo'n oosinnee arennee maqirem uulli udma'anne yoo Waa'i duu'n gadanonne wiiddanaa hee'u Muse'i beyyo waarukko.

⁶Yootirim «An ki balli Yootir ki arennee ki lamem goo'n oosinnee maqirem waaroommuulla» yaa asse'ukko.

⁷Ee bikkina Muse'e ixxi ballo aa'eena firukko; ixxim suunqaa xummaatisukko; xummaatixxanta'a lasonnem ixxi dukkaa'n woro aaggo'o.

⁸Muse'em Waa'i Isra'eelinaa yaa Gibxi adilannee minaadabannee issu luwwa, googonne ixxuwwanne afu hawwoo Waa'i hara'mmaa gatisukkisaa ixxi ballina kurukko.

⁹Yootirim Waa'i ixxuwwa Gibxi uulli manni angiinsi gatisimminne Isra'ee'l minaadabina issu er luwwa hundam macceesaa liiramukko.

¹⁰Ixxim «Gibxi uulli manni angiinsii Faari'ooniinsii ki'nnuwwa gatisukkaanina, Gibxi agiddaniinsim minaadaba gatisu Waa'ina galat afona!

¹¹Waa'i mulli waa'uwwiinsi hundiinsim lophphoo malaayyaam ihukkisa kaba la'ummo; Isra'ee'l minaadaba amaadinne amadda'a hee'llo'i keenonne hundannem kaka issaakko» yukko.

¹²Ee lasage Muse'e balli Yootir shokkiisakka'a hincaa'akkam kitimaa mulli kitimaa Waa'ina hincaa'ukko; Aaroonim Isra'ee'l awwonsaaninne maqirem keesammi hurbaata Waa'i illagenne Muse'i ballinnem iteena waarukko.

¹³La'm balla soodaraarom Muse'e minaadabanne oogateena afuurukko; ixxuwwim dariinsi ki'isaa maaro'i afeebe'e ixxi gadanonne uullita'a hee'llo'o.

¹⁴Muse'e ballim minaadabina Muse'e issoo luwwa hundam moo'aa «Maha issitoollahe? Ku manni hundim dariinsi ki'isaa maaro'i afeebe'e ki kululleetanne uullaa hee'ukkuuyyi mullam oogaxxi barcumanne mahina afuuttaate?» yukko.

¹⁵Muse'em «An ka hundam issoommok minaadab Waa'ika doo'lla la'eena i beyyo waaroo bikkinatte.

¹⁶Ixxuwwanne woshshi hee'oo amman hundam i beyyo waattamo; ee woshsham moo'aa oogatoommo; Waa'ika seeraa ogoram ixxuwwina kuroommo.

¹⁷Ee lasage Yootir «At baxxoo bax eraneyyo.

¹⁸Atii ki beyyo waaroo mannii ki'nnuwwi gaga hoogissakkamuulla; ku bax kee'mmaalli ihu bikkina at mullam issiteena xantooyyo.

¹⁹Kaba an keese sogoommo; Waa'i kiinninne maqir ihona; at minaadaba bikkitaa ixxuwwi quuxo Waa'ina hincaa'e.

²⁰At Waa'ika ijaajoo seeraa losise; hinkid hee'immii baximmii hasisooda'em moo'ise.

²¹Ihukkaarem minaadabiinsi lachchi yoo manna, Waa'a baddoo keeno, amma'nnamaakkoo keenoo maqanxa aa'oobee'i keenoo doo'lle; ixxuwwam kuma awwonsaano, xibbe awwonsaano, ontayye awwonsaanoo tommo awwonsaanoo issitaa doo'lle.

²²Ixxuwwi ayyi ammanem minaadabanne oogattona; sholle'aalli woshshuwwam ixxuwwi guullitona. Ihukkaarem kee'mmaalli woshshuwwa ki beyyo hincaa'llona; ee'isinne hara'mmitolas kiina bax sholle'ookko.

²³Ee'isa issitaa baxxita'nnii oohim Waa'i doo'l ihuta'nnii ki gaga kora'am qondoodissooyyo; minaadaphphi quuxim ammaninne beeddoohaare mine elle'ookko» yukko.

²⁴Muse'em ixxi ballika sogitano aa'ukko; ixxi yukkisam issukko.

²⁵Muse'em Isra'ee'l minaadabiinsi lachchi yoo keeno doo'llukko; minaadabannem kuma awwonsaano, xibbe awwonsaano, ontayye awwonsaanoo tommo awwonsaanoo issukko.

²⁶Ixxuwwi hundi ammanem minaadabanne oogattam hee'llo'o. Ihukkaarem kee'mmu woshsha Muse'e beyyo eebbam hee'llo'o.

²⁷Ee lasage Muse'e ixxi ballo geegeesukkaare ixxi uullam elle'ukko.