Read Hadiyya Dooyyi Kitaaba 19 Bible Online

Dooyyi Kitaaba 19 - Hadiyya bible

Dooyyi Kitaaba 19

¹Isra'ee'l minaadab Gibxiinsi fitto'i saxxi aga'n luxxi ballanne Siina'i uulli udma'a affo'o.

²Ixxuwwim Raafiidiimiinsi ki'lla'a Siina'i udma'i uulla matta'a duu'n illagenne yoo udma'anne wiiddanto'o.

³Muse'em Waa'inne atoorareena duunanne firukko; Waa'im duunanne ihaa Yaaqoob shumo'i ikko'i Isra'ee'l minaadabina

⁴«‹An Waa'i Gibxi minaadabanne issummokaa gaaqichchi ixxi ciicoolla ladonne iyyoo'isa anim ki'nnuwwa hinkid issaa ka beyyi afeebe'e eebumda'ee laqqakkamo.

⁵Kabadem oono'o, iina ijaajantakkolasii hidi'l sagaram egettakkolasii uulli hundim iihan ihukkaarem ki'nnuwwi iina gulummi ikkakkamo.

⁶Ki'nnuwwi iina keesantakko'oo minaadab ikkakka'a qeessuwwisa awwaaddakkamo› yitaa Isra'ee'l minaadabina kure» yukko.

⁷Ee bikkina Muse'e duuniinsi dillaa minaadaphphi awwonsaano weeshisaa Waa'i ixxena uwwu ijaaj hundam ixxuwwina kurukko.

⁸Ee lasage minaadab mat sagarinne «Waa'i ijaajukkoka hundam issinoommo» yito'o. Muse'em ee ixxuwwi yito'oka Waa'ina hincaa'ukko.

⁹Waa'im Muse'ena «Kiinninne maqire wocummuuyyi minaadab macceessamisinaa at woccoo woshsha amma'nnitamisinaa kee'mmaalli duubinne ki kolli waaroommo» yukko. Muse'em minaadab ixxena uwwu dabachcha Waa'ina hincaa'ukko.

¹⁰Waa'im Muse'ena «Minaadaphphi beyyo mattaa kaballaa soodoo ixxuwwa keese; ixxuwwi eddechcham aanshitona kure.

¹¹Saxxi ballanne minaadab hundim moo'llu'uuyyim an Waa'i Siina'i duunanne dilloommi bikkina minaadab hundim ee ballina gudona.

¹²Ee duu'n kululleetanne minaadabina gabala issitaa ‹Ki'nnuwwi ka duunanne fittakkotte; te'im duu'n lokkagam nakkitakkotte; ayyi manchim duunooma nakkulas hanqo'isam lehookko.

¹³Ayyi angim ixxo nakkoone; ihukkaarem nakkukkok hundim kininne aphphisamookko te'im xiyyinne oramookko; manni te'im fooraam diinat foorinne hee'ooyyo› yihe. Duunanne firimmi xansiisookkok xurumbi malaayyaamisa fugamoo amman xale'e» yukko.

¹⁴Ee lasage Muse'e duuniinsi minaadaphphi beyyo dillukko; minaadabam keesukko; minaadabim ixxi qaqqi eddechcha aansha'ukko.

¹⁵Muse'em minaadabina «Saxxi ballina ki'nnuwwi gaga gudissehe; oo balli afeebe'em ki'nnuwwi meenti kolli hincitakkotte» yukko.

¹⁶ Saxxi balla daram kee'mmaalli duub duunanne ihaa gug, banqii malaayyaam xurumbi sagarii macceesamukko; minaadabim wiiddananne afuuru beyyonne huxe'ukko.

¹⁷Muse'em minaadaba wiiddaniinsi awwonsaa fissaa Waa'i kollonne hincaa'ukko; ixxuwwim duu'n lugumonne uullito'o.

¹⁸Waa'i ixxi giirinne Siina'i duunanne dillu bikkina oo duun wiriirinne ifiisamaa hee'ukko; wiriiroomim guudo'iinsi firoo wirii'llisa iimhooraa butukunnukko; duunoomim malaayyaamisa heekke'am hee'ukko

¹⁹Xurumbi sagar malaayyukkuuyyi waarukko; ee lasage Muse'e wocukkaare Waa'i guginne wocaa dabarukko.

²⁰Waa'i Siina'i duu'n ludonne dillukko; Muse'em ee duu'n ludo waaroo'isina weeshukko; Muse'em ee duu'n ludonne firukko.

²¹Waa'im Muse'ena «Dille, minaadab eese Waa'a moo'eena gabala higaa waaroobee'isa qoxxissaa kure; ee gabala higamulas ixxuwwiinsi lobakat keen lehookko.

²²I kolli hincitam qeessuwwam ihukkaare ixxuwwi gaga keesimmi hasisookko; eehid ihubeelas an Waa'i ixxuwwa guzumo'oommo» yukko.

²³Muse'em Waa'ina «Minaadab Siina'i duunanne fireena xanooyyo; mashka'oomim ‹Duuna keese; kululleetannem gabala isse› yitaa qoxxissaa kuttaatto» yukko.

²⁴Waa'im «Dillitaa Aaroona amaddaa waare; qeessuwwii minaadabii i beyyo waarimmina gabala higimmi hasisooyyo; higgolas an ixxuwwa guzumo'oommo» yukko.

²⁵Muse'em minaadaphphi kolli dillaa Waa'i ijaajukkoka hundam ixxuwwina kurukko.