Read Hadiyya Dooyyi Kitaaba 2 Bible Online

Dooyyi Kitaaba 2 - Hadiyya bible

Dooyyi Kitaaba 2

¹Ee lasage Leewi'i sulliinsi mat manchi ee sulliinsim mat landichcho eebukko.

²Isem goonchi beeto ixxena qatto'o; oo ciilichchim mishisoohan ihu bikkina sas aganina maaxxo'o.

³Ihukkaarem eehanniinsi loboka maaxxeena xantobee'isa laqqa'a saaxi'nnisa issakka'a leendinne baxakko'oo sananna wo'i aagoobee'isa leeyya nannita'a axisso'o; ee ciilichchom sanannanne issita'a daajji gammalanne leendi woronne dissito'o.

⁴Ee ciilichchi aayyam ixxonne afoo luwwa moo'lleena qee'llonnetti ikka'a egettam hee'llo'o.

⁵Ee lasage Faari'oon landichcho aanshaqqiteena daajje dillito'o; is awwaadaanim daajji gammalanne taakke'antam hee'llo'o; isem leendi woronne mat sananna moo'lla'a is awwaadaaniinsi mate ee sananna eebbamisina asse'llo'o.

⁶Sanannam fooqaa'lla'a mat ciilichcho moo'llo'o; wi'llam hee'u bikkinam qishixxito'o. Isem «Kuk Ibro'i ciilluwwiinsi mato» yito'o.

⁷Ee ammanenne ee ciilina aayya adi'l landichchona «Ka ciila iicissu'uuyya kiina li'issona Ibro'i meentiinsi mate weeshonnihe?» yita'a xa'mmito'o.

⁸Adi'l landichchom «Eeyya, mattaa weeshe» yito'i bikkina oo landichcho matta'a ciil ama weeshsho'o.

⁹Adi'l landichchom weeshanto'i meentichchona «Ka ciila massitaa anuuna iicissittuuyyi iina li'ise; anim ki badallatika miqoommo» yito'o. Ee bikkina oo meentichcho ciila massita'a anuuna iicisimma asheetto'o.

¹⁰Isem oo ciil li'aa lasonne adi'l landichchi beyyo eebbo'o; ciilim adi'l landichchona beet ihukko. Isem «Wo'iinsi fissummi bikkina ixxek summi ‹Muse› yamamona» yito'o.

¹¹ Muse'e li'aa lasonne ixxi moolli ikko'i Ibro'i manna do'eena firukko; eekke'ennem malaayyinne kee'mmaalli baxo baxisakku'uuyyi moo'ukko; ixxi moolli ikko'i Ibro'i mannikam mato Gibxi uulli manchi ganukkuuyyi moo'ukko.

¹²Muse'e ixxi kululleetanne ayyim bee'isa moo'aa Gibxi uulli mancho shaa leeshooma shashsha'l woronne waammukko.

¹³La'm balla daram ee beyyo daba'llaa maroohaare Ibro'i manniinsi lam ixxuwwina'i ixxuwwim ganantu'uuyyi moo'ukko; hawwodu manchom moo'aa «Kiyyabbaayyo mahina aphphissoolla?» yukko.

¹⁴Oo manchim «Keese neesenne daannaa gassaanchoo issukkok ayyette? Te'im ee Gibxi uulli mancho shittisam eesem shiteena hassaatennihe?» yukko. Muse'em lobakata muggaa «Adaa'nnanne an issummi luwwa manni la'aakko» yaa baa'ukko.

¹⁵ Fari'oonim ee woshsha macceesaa Muse'e sheena hasukko; ihukkaarem Muse'e Fari'ooniinsi Miidiyaa'm uulla gibukko. Ee uulla afukkisam mat wo'i ba'l gadanonne afuurukko.

¹⁶Ee uulli qeessichchina lamar landi hee'ukko; ixxuwwim anni gereebbinaa fella'inaa wo'o wongiranne inkiitta'a agisseena waatto'o.

¹⁷Allaaraanim waatta'a landa hollito'o; Muse'em ee landina agaagaa ixxuwwi gereebbinaa fella'inaa wo'o agisukko.

¹⁸Oo landim ixxuwwi anni ihu Raagu'eel beyyo daba'llito'o. [1] Raagu'eelim ixxi landina «Kaballa hinkid qaqqisom daba'llitakko'o?» yaa xa'mmukko.

¹⁹Ixxuwwim «Mat Gibxi uulli manchi niina agaagaa wo'o inkiirukkuuyyi ni gereebbinaa fella'inaa agisukko» yita'a dabatto'o.

²⁰Ixxim «Kaba oo manchi hannonnette? Mahina uttakka'a waattakko'o? Mallehe hurbaata itona weeshshehe» yukko.

²¹Muse'e ee manchinne maqirem hee'eena iittamukko; oo manchim Siiphaara yakkam ixxi landichcho Muse'ena uwwukko.

²²Isem Muse'ena goonchi beeto qatto'o; Muse'em «An ka uullina waaraancho» yaa beetika summa Gershooma[2] yukko.

²³Lobakat hiinchiinsi lasonne Gibxi uulli adil lehukko; ihukkaarem Isra'ee'l oos agiddanonne hee'llo'i bikkina hawwita'a laattam hee'llo'o. Waa'im ixxuwwi laachcha macceesukko.

²⁴Ee laachcham macceesaa Abrihaamina, Yisaaqinaa Yaaqoobinaa aagu hidi'l sagara tiirukko.

²⁵Waa'i Isra'ee'l oos agiddanonne hawwita'a u'nnanto'isa moo'aa ixxuwwi bikkina sawwukko.