Read Hadiyya Dooyyi Kitaaba 21 Bible Online

Dooyyi Kitaaba 21 - Hadiyya bible

Dooyyi Kitaaba 21

¹«At Isra'ee'l minaadabina uwwitoo seer

²‹Ibrokkichchi agishsho bitaa'llilas loh hiincho kiina awwaadona; lama'l hiinchonne maham miqoo'n wolabbano firona.

³Mullam waaraakkoohan ihulas mullam wolabbano siidaa marona; ihukkaarem waarukkuuyyi meentichchaam ihulas ise ixxenne maqirem mattona.

⁴Ixxena moollanni meento eebaa goona te'im landa qatto'oohan ihulas oo meentichchoo oosii ee moollannina gattona. Manchoom mullam wolabbano firona.

⁵Ihukkaarem oo agishshi ‹I meentichcho, i oosoo moollannaa iittoommo; wolabbano fireena hasoommoyyo› yulas

⁶ixxi moollannim ixxo oogataa'n illagenne hincaa'ona; ixxi moollannim goocanne te'im gooc gubananne hincaa'aa uullisaa macce mutinne lufona; ee lasage ixxi umu'l doolli hundoomam ixxena awwaadaanchi ihona.

⁷«Mat manchi ixxi landichcho agishshi ikkona biteesulas wolabbano fittamok goon firoohaannisayyo.

⁸Ixxi aretti isseena hasaa doo'llaa lasage is moollanna liiransitobeelas tisso miqaa geegeesona; mashka'oomim is moollanni ise gadu bikkina allaggi mannina biteeseena xanooyyo.

⁹Ihukkaarem ixxi beetaretti ikkamisina hasukkaa'lleensi ixxi landina issoo luwwa hundam issona.

¹⁰La'm are eebulas luxxi arena hurbaataa eddechchaa uwwimma uroone; illageen hee'u eebaqqanchi hanqam isena hooroone.

¹¹Ee sasem luwwam isena issoobee'an ihulas ise maham miqqoo'n wolabbano fittona.

¹²«Manna aphphisaa shoo manchi lehinne guzumo'amona.

¹³Ihukkaarem ixxi anganne manni lehukkok dugaa egeraatetti ihoo'n Waa'i doo'l ihaa dangonnette ihulas oo manchi an gudisoommi beyyo gibona.

¹⁴Ihukkaarem mat manchi baadeesaa mulli mancho shuta'n ixxim ixxi gaga gatixxeena iina kitima hincaa'akkam beyyo gibaa maruta'nnim lehinne guzumo'amona.

¹⁵«Anna te'im ama aphphisookkok lehinne guzumo'amona.

¹⁶«Mat manchi mulleka game'aa biteesulas te'im ixxi anganne amadaa siidamulas lehinne guzumo'amona.

¹⁷«Anna te'im ama game'llookkok lehinne guzumo'amona.

¹⁸«Lam manchi wocanta'a mat mulleka kininne te'im tontoomminne aphphisuta'n oo manchi lehubee'aarem jabbaanchi ihulas

¹⁹iinse'u beyyiinsim ki'aa sikkinne biiranne taakke'amulas oo aphphisu manchi bi'u amma'n bikkina diinatinne guzumo'amona bagaan mulluwwinne guzumo'amoone; erisa fayye'eebe'em jabbisona.

²⁰«Mat manchi goonchi te'im meentichchi agishsho biccinne aphphisukkisam oo agishshi ee ammanem lehulas guzumo'amimmi hasisookko.

²¹Ihukkaarem oo agishshi mat te'im lam balli woronne lehubeelas ixxo gassoo moollanni guzumo'amoone; ixxena agishshi lehimmi ixxi gagoomim guzumo'ancha.

²²«Lam manchi ganantu'uuyyi lamfoor meentichcho ee keeniinsi mat aphphisaa isenne mulli hawwodanchi afoo'n godaphphi qachchi lehuta'n ee meentichchi aro'i xa'mmoo guzumo'o oo aphphisu manchi miqona; ee guzumo'om daannuwwi qoodona.

²³Ihukkaarem oo meentichcho hawwodantolas foorina foore,

²⁴illina ille, inqina inqe, angina anga, lokkina lokko,

²⁵shokkina shokka, madina mada, qokkimmina qokkancha guzumo'amona.

²⁶«Mat manchi goonchi te'im meentichcho agishshika ille qooqisuta'n ee illi bikkina ee agishsho wolabbano fissona.

²⁷Ee'isam mat inqem iiquta'n ee inqi bikkina ee agishsho wolabbano fissona.

²⁸«Mirgo'i mancho qasaa shuta'n ee mirgo'o kininne aphphisakka'a shakkona; ixxi maaram itakkoone; ihukkaarem ee mirgo'i annichchi xa'mmamoone.

²⁹Ihukkaarem oo mirgo'i manna qasoohan ihaa annichchi karaa egedona magannaato kurakko'oka aa'imma sabaa oo mirgo'i manna qasaa shulas ee mirgo'o kininne aphphisakka'a shakkona annichchim lehinne guzumo'amona

³⁰Ihukkaarem xiigo guullaa ixxi gaga gatixxeena xanulas xa'mmamu luwwi hundam miqona.

³¹Mirgo'i mat beeto te'im landichcho qasaa shulas ee see'llisinne guzumo'amona.

³²Mat mirgo'i meentichch te'im goonchi agishsho qasaa shuta'n oo mirgo'i annichchi ee agishshi moollannina sad kin bira miqona; ee mirgo'om kininne aphphisakka'a shakkona.

³³«Mat manchi bare hinaa ifiisoo'nnim cawwaa urukkisam mat mirgo'i te'im hallichchi ee barenne ubulas

³⁴ee diinaxxeka bito miqona; bito miqaa lasage ee lehu diinate ixxi gagina gatixxona.

³⁵Mat manchi mirgo'i mulli manchi mirgo'o qasaa shulas lamem manchim foorinne yoo mirgo'o biteessa'a diinatooma baxxantona; lehu mirgo'i maaram baxxantona.

³⁶Ihukkaarem mirgo'i qasoohan ihukkisa la'ukkuuyyim karimma sabaa fatakulas ee lehu mirgo'i bikkenne mirgo'o miqona; lehukkokoom ixxena gatona.