Read Hadiyya Dooyyi Kitaaba 22 Bible Online

Dooyyi Kitaaba 22 - Hadiyya bible

Dooyyi Kitaaba 22

¹«Mat manchi mirgo'o te'im gereechcho game'aa duruta'n te'im biteesuta'n ee mat mirgo'i bikkenne onti mirgo'o mat gereechchi bikkennem soor gereechcho miqona.

²Mat gamaanchi mi'nneka saanqa iiqukkuuyyi afakka'a shakkota'n oo shu manchi xiigina xa'mmamooyyo.

³Ihukkaarem game'ukkuuyyi shukkok ballannetti ihulas oo shu manchi xiigina xa'mmamookko. Gamaanchi game'u luwwa hundam miqona; miqoo luwwimdu bee'an ihulas ixxi gagim biteesamona.

⁴Game'ukkok mirgo'om ihukko hallichcho te'im gereechchi ihaa foorinnem amadakkolas ee game'u luwwika lam suume miqona.

⁵«Mat manchi ixxi diinate allaachchi beyyiinsi ti'em woyi'n kaashshi beyyiinsi fatakaa mulli mannika hurbaata itisulas oo manchi ixxi hurbaatiinsi te'im woyi'n kaashshiinsi doo'lla miqona.

⁶«Mat manchi ixxi abuulli uullanne shokka uwwukkuuyyi oo giir aphphukkuuyyi maraa mulli mannika hurbaaxxi naara te'im muramubee'i hurbaata shokkiisuta'n oo shokka uwwu manchi miqona.

⁷«Mat manchi mulli manchika diinate te'im bito xee'aalli mulli mu'uta disseena yabo aa'aa dissu beyyiinsi game'u gamaanchi amadamulas lam suume miqona.

⁸Ihukkaarem gamaanchoom amadamubeelas mu'uta disseena yabo aa'u manchi Waa'i illagenne hincaa ee manchi mu'utanne ixxi angi bee'an ihukkisa hide'ona.

⁹«Lam manchi mat baa'l bikkina te'im hallichchi bikkina te'im eddechchi bikkina te'im bi'u mu'ut hundinam fitantota'n oo lamem manchim Waa'i illagenne hincitona. Waa'im ixxi awwaadaaninnetti ihaa la'isoo hawwodu manchi ee hawwodamu manchina lam suume miqona.

¹⁰«Mat manchi mulli manchika mat hallichcho te'im mirgo'o te'im gereechcho te'im fooraam diinaxxeka ayyem allaareena yabo aa'aa lasage lehuta'n te'im iiqamuta'n te'im bogamuta'nnii eehanninam naqaash bee'an ihulasii,

¹¹oo manchi Waa'i illagenne hincaa ee diinatenne ixxi angi bee'an ihukkisa hide'aa la'isona. Ee diinaxxi annichchim ee hiditano aa'aa maham miqisoone.

¹²Ihukkaarem oo diinat game'amukkan ihulas diinaxxi annichchina miqona.

¹³Moochchi itaakkoohan ihulas moochchiinsi gatukkoka naqaashoomina hincaa'ona; moochchi itu bikkina miqoone.

¹⁴«Mat manchi mulli manchiinsi fooraam diinate massaa lasage oo diinat annichchi la'oo'n lehulas te'im iiqamulas ee uwwu manchina miqo'o miqona.

¹⁵Ihukkaarem eehid ihukkok mu'uxxi annichchi gadanonnetti ihulas massu manchi miqoone; massukkokim kera'inatte ihulas ee kera'ina miqookkok ihookko.

¹⁶«Mat manchi xeehantobee'i landichcho qawwiisaa baajoommano bi'isulas qoota uwwaa ixxi aretti issona.

¹⁷Ihukkaarem landichchi anni ixxena ladiiseena hasubeelas mat baajaam landichchona uwwakkam qoot qax bira landichchi annina uwwaa guzumo'amona.

¹⁸«Kiiraanchi meentichcho foorinne hee'llona caawwitaa uttitte.»

¹⁹«Fooraam diinatinne sha'ixxi edancha edamoo manchi hee'ulas lehinne guzumo'amona.»

²⁰«Iinniinsi bagaan mulli waa'ina ayyenam kitima hincaa'oo manchi lehinne guzumo'amona.»

²¹«Ki'nnuwwi Gibxanne hee'llakko'i ammane waaraan hee'llakko'isa sawwitakka'a waaraancho wor amaddakka'a hawwoddakkotte.

²²Aro'i lehu busar meentoo adaraar oosoo wor amaddakkotte.

²³Eekka issitakka'a ixxuwwi i kollonne laattolas an Waa'i hanqoomam ixxuwwi laachcha macceesoommo.

²⁴Anim ki'nnuwwanne quuqaa orinne beedditakkamisa issoommo. Ki'nnuwwi meentim aro'i bee'i keeno, oosim adaraalluwwi ihookko.

²⁵«I minaadabiinsi mat buxichchina diinate liqaayyissaa lasage qaro'ina uwwu manchisa ixxo hawwissitte; qaro'o edaa miqonam xa'mmititte.

²⁶Ki beshichchika eddechcha dabbita'n eelliinchi aagoo'n massitaa uwwe.»

²⁷Mashka'oomim qiida hoo'lloo luwwi mullek mahim bee'i bikkina maha edde'aa iinse'ookko? I kollonne laarulas an qishixxoomman ihummi bikkina ixxeka laachcha macceesoommo.

²⁸«Waa'inne[8] game'llantitte. Ki minaadaphphi awwonsaanchom game'llititte.

²⁹«Hurbaaxxekaa woyi'n diqaasikaa ludo iina uwwe. «Won ihaa qaramu ki goo'n oosom iina uwwe.

³⁰Ee'isam ki lariinsii gereebbiinsii won ihaa qaramoo labeena te'im ambula lamar balla aminne afuuraa lasage sadeenti ballanne iina hincaa'e.

³¹«Ki'nnuwwi keesantakko'oo i minaadab ikkakko'i bikkina bii'l moochchi shu luwwika maara wishina uwwehe bagaan ki'nnuwwi ittakkotte.»