Read Hadiyya Dooyyi Kitaaba 23 Bible Online

Dooyyi Kitaaba 23 - Hadiyya bible

Dooyyi Kitaaba 23

¹«Qophpha'n woshsha taakkiissitte; baaxiilaanchi mancho qophphano naqqassaa muccur issiissitte.

²Jora baxxeena te'im oogato boqqisseena lobakat manni mateeyyoominne ki'llam ammane at ixxuwwinne maqire manni hanqa bi'issitte.

³Buxichchi oogatina hincoo ammane ixxi buxooma moo'llaa golo'llitte.

⁴«Ki masokkichchik mirgo'i te'im hallichchi bi'u beyyonne siidditlas ixxena massitaa uwwe.

⁵Keese saboo manchik hallichchi iyyi kee'mmaa ubu beyyonne siidditlas ubu beyyiinsi ki'ona hara'mme bagaan uttaa higgitte.

⁶«Buxichchi fitamoo ammane ixxi buxooma moo'llaa oogato boqqissitte.

⁷Ayyi manchom qophphaninne kasassitte; muccur mancho shititte; mashka'oomim an baaxiilaanchi mancho muccur issoombee'ane.

⁸Manni hanqo'an ihu luwwa moo'oobee'isa ille ifiisoo bikkinaa muccur mannikam oogato'o bi'isoo bikkinaa maqanxa aa'llitte.

⁹«Waaraano barche'e issitakkotte; mashka'oomim ki'nnuwwi Gibxanne waaraan ikkakka'a hee'llakko'i bikkina waaraa'nnek heechchi hinkido'anda'e ki'nnuwwim laqqakkamo.

¹⁰«Loh hiincho ki uulla abuullitaa atoota wixxaa'e.

¹¹Ihukkaarem lama'l hiinchonne uulli usheexxona. Ki minaadaphphi lambe'enne yoo buxim hurbaata wixxaa'aqqona; ki uullanne gobbe'i ihaa mutu luwwiinsi maham wixxaa'llitte. Buxiinsi gatukkokam bii'l moochchi itona. Woyi'n kaashshi beyyii wee'l kaashshi beyyim ee'isam usheexxona.

¹²«Saantanne loh balla kiikka bax hundam baxe. Ihukkaarem lama'l ballanne mah baxom baxxitte. Ki mirgo'i, ki hallichchi, ki awwaadaanii ki minenne hee'oo waaraanii hundim usheexxona.

¹³«An Waa'i ki'nnuwwina kurummi luwwi hundam qoossitakka'a macceessehe. Mulli waa'uwwa uunxitakkotte; ki'nnuwwi suuminne weeshshakku'uuyyim macceesamoone.

¹⁴«Hiinchonne sas kore eese lonsitakkam ugudduwwi hee'ona.

¹⁵Gibxi uulliinsi fittakko'i Abiiphphi agananne an ki'nnuwwa ijaajummisinnem Qorosho'i uguda lonsehe. Ee uguda lonsakkam lamarem ballannem irsho'i nakkubee'i qorosho'o ittehe; i illagennem kora'i angam hincitakkotte.

¹⁶«Ki'nnuwwi uulliinsi hurbaata wixxa'llakkam ammane Hurbaaxxi uguda lonsehe. «Woyi'n kaashshiinsii mulli kaashshuwwiinsii misha wixxaa'llakkam hiinchi lasaanchonnem Daas uguda lonsehe.

¹⁷Hiinchonne sas kore ka ugudduwwa lonsitakkam ammane goon hundim Moollanni Waa'i kollonne hincihona.

¹⁸«Kiti'm xiiga hincaa'llakkam ammane irsho'i yoo hurbaatinne hincaa'llakkotte. Ee ugudduwwanne iina hincoo kiti'mmek di'ir uulli soodeebe'e garoone.

¹⁹«Ki uulli mishika ludo ki'nnuwwina Moollanni ihummi Keesammi Mine eebbehe. «Gereechchika te'im fellakkichchi wota'lleka maara ixxi am adinne sattitte.

²⁰«Mattoo googonne keese egeronaa an kiina gudisummi uullam keese xumminne aagisonaa ki illaginne maroo asse'amaancho an asse'oommo.

²¹Ixxi kiina yookkoka qoossitaa macceese. Ixxena ijaajancha sabbaa ixxo qaraassititte. I summi ixxonnetti ihu bikkina boqqooma moo'aa haafooyyo.

²²Ixxi kiina yookkokaa an ijaajummi ijaajoo qoxxitaa macceessilas an ki diina'a hundam saboommo; keese u'nnissam keenom u'nnisoommo.

²³I asse'amaanchim ki'nnuwwi illaginne marookko. Ixxim ki'nnuwwa Amoore'ika, Hiite'ika, Faarze'ika Kana'aa'nneka, Hiiwe'ikaa Iyyaabuus uullaa awwonsaa massookko. Anim ixxuwwa guullaa bi'isoommo.

²⁴Ee kee'n waa'uwwina otossititte; ixxuwwi losanom awwontitte. Ixxuwwika waa'uwwa guullitaa bi'ise; keesammi ki'n utubbuwwam iiqanse.

²⁵Iina ki Moollanni Waa'ina otossitlas ittoo hurbaataa aggoo wo'oo uwwaa keese maasse'oommo; jabbi hundam kiinniinsi qeessommo.

²⁶Ki uullanne karii alceenni meentii hee'ooyyo; ki umuram qeeraa'llisoommo.

²⁷«Kiinninne uullixxantam keen hundim eese badditamisa issoommo; keesenne ora ki'issam minaadab hundannem hambalaachcha eeboommo. Ki diina'i laso daba'llita'a gibbamisa issoommo.

²⁸Ki diina'a dambaqisoommo.[9] Hiiwe'ika, Kana'aa'nnekaa Hiite'i minaadabaa ki illagiinsi fiikkisoommo.

²⁹Ihukkaarem an ixxuwwa mexxo'i hiinchonne fissaa holloommoyyo; eehid issumlas uulli udma'i ihaa bii'l moochchi keese hawwisookko.

³⁰At fikkaannitaa uulla wo'mmiteebe'e an ixxuwwa hoffi hoffan issummuuyyi fissoommo.

³¹Ki uulli gabalam Ertiira'i dambalaqiinsi ki'isaa Filisxee'm dambalaq afeebe'e udma'i uulliinsim ki'isaa Efiraaxiis daajji afeebe'e haraassoommo. Ee uullanne hee'oo manna kaa'lloo'isa issoommi bikkina at ixxuwwa ki illagiinsi hollitootto.

³²Ixxuwwinnee ixxuwwi waa'uwwinnee hore'em hide'antitte.

³³Ixxuwwi waa'uwwina otossitlas kiina qaash ihookko. Oo minaadab ki uullanne hee'llona uwwititte; ki uullanne hee'llolas baaxiilo baxxaa eese hawwoddoo'isa issitamo» yaa ijaajukko.