Read Hadiyya Dooyyi Kitaaba 24 Bible Online

Dooyyi Kitaaba 24 - Hadiyya bible

Dooyyi Kitaaba 24

¹Waa'i Muse'ena, «At, Aaroon, Naadaab, Abiyuuhii Isra'ee'l awwonsaaniinsi lamarayyi manchii an yoommi duuna waallehe; qee'llonnem otossi'llehe.

²Xale'i at i kollonne hincihe bagaan mulli keen hincitoone. Minaadabim kiinninne maqire firoone» yukko.

³Muse'em maraa Waa'i ijaajoo seeraa hundam minaadabina kurukko. Minaadabim sagara matissitta'a «Waa'i kuru luwwa hundam issinoommo» yita'a dabatto'o.

⁴Muse'em Waa'i ijaajjuwwa hundam kitaabukko; la'm balla daram ki'aa duu'n lugumonne kiti'm beyyo baxukko; tomminnee lamem Isra'ee'l shumo'i summinnem tommoo lam ki'n utubbuwwaa uullisukko.

⁵Ixxim harade'i woraada shokkiisakkam kitima hincaa'llona asse'ukko; ixxuwwim labeennuwwa mateeyyoo'm kitim issita'a Waa'ina hincaa'llo'o.

⁶Muse'em ee kiti'm xiigiinsi kollo aa'aa gabatanne dissukko; kollo odim kiti'm beyyonne wixukko.

⁷Ee lasage hidi'l saga'l kitaaba minaadabina sagara iimaa'aa qananaa'ukko; minaadabim «Waa'ina ijaajammoommo; ixxi yu luwwi hundam issinoommo» yito'o.

⁸Ee lasage Muse'e gabatanne yoo xiiga minaadabanne wixaa lasage «Ku xiig Waa'i ka ijaajo hundam ki'nnuwwina uwwu ammane ki'nnuwwinne aagu hidi'l saga'l xiiga» yukko.

⁹Muse'e, Aaroon, Naadaab, Abiiyuu Isra'ee'l awwonsaaniinsi lamarayyi manchii duuna fitto'o.

¹⁰Isra'ee'l Waa'am moo'llo'o. Ixxi lokki lugumonnem cuquluusa laboo kininne baxamaakkoo ca'aakko iimane labo gax hee'ukko.

¹¹Waa'im ka Isra'ee'l awwonsaano guzumo'ukkoyyo. Ixxuwwim Waa'a illinne moo'llo'o. Ixxi illagennem itto'oo aggo'oo.

¹²Ee lasge Waa'i Muse'ena «Ka duunanne an yoommi beyyo waattaa keyyenne egere; minaadaba losissona seeraa ijaajoo kitaabaammoo lam ki'n ba'lla kiina uwwoommo» yukko.

¹³Muse'em ixxi awwaadaanchi Iyyaasinne maqirem ki'ukko; Muse'em keesamaakko Waa'i duunanne firukko.

¹⁴Isra'ee'l awwonsaanina «Neese ki'nnuwwi beyyo daba'llinaa waalleembe'e keyye egellehe. Aaroonii Huurii ki'nnuwwinne yo'i bikkina wocamu manchi hee'ulas ixxuwwi beyyo marona» yukko.

¹⁵Muse'em duunanne firukko; unbu'llim ee duuna ifiisukko.

¹⁶Waa'im lombinne Siina'i duunanne dillukko. Duubim ee duuna loh ballina ifiisukko. Lama'l ballannem duuphphi woronne ihaa Muse'e weeshukko.

¹⁷Duu'n ludonne caakku Waa'i lombim Isra'ee'l minaadabina itoo gii'llisa moo'amam hee'ukko.

¹⁸Muse'em duunanne firaa ee duunanne yoo duuphphi woronne aagukko. Eehe'em sor ballaa sor hiimoo afuurukko.