Read Hadiyya Dooyyi Kitaaba 25 Bible Online

Dooyyi Kitaaba 25 - Hadiyya bible

Dooyyi Kitaaba 25

¹Waa'i Muse'ena,

²«Iina irifo'o eebbona Isra'ee'l oosina kure. Ayyi manchim ixxi gaginne liiramaa iina eeboo irifo'o hundam aa'ee.

³Aa'llootti irifo'uwwim worqa, bira, naas xaara,

⁴shaano'inne, kuulinne, muulli kasharinnee cuquluusa laboo fatirinnee dadamaakkoo eddechcha, kashar eddechcha, talbi fatirinne dadamaakkoo eddechcha, fella'i oddinne dadamaakkoo eddechcha,

⁵kashar qalam labamaakkoo gereebbi ambu'l omachcho, cukkamaakkoo omachcho, giraa'l haqqa,

⁶caakkinaa laphphimminaa ihoo wee'l zayta, danaamisa enje'oo aduruusa,

⁷aduu'n ille laboo kinaa Eefuudannee hundiinsi lob qeessichchi edde'oo biq kiisannee issakkam bito xee'aalli kinaa ihona.

⁸An ixxuwwi lambe'enne garoommisina i minaadab iina mine baxona.

⁹Dukkaanaa ixxi woro'l mu'utaa hundam an moo'isoommisinne baxxehe.

¹⁰«Hidi'l Saga'l Saaxina giraa'l haqqinne baxe. Ixxekim dufaachchi lam angaa kolloo midaadii uullichchii odim mat angaa kolloo ihona.

¹¹Hanee worom muccur worqinne goolabe. Ixxi kululleetanne hundannem worqi goobinaancho isse.

¹²Soor worqi guma'am baxxaa lamoo mat kollonne lamoo odim mulli kollonne issitaa soorem lokkonnem amaxxanse.

¹³Ee Saaxina iyyakkam wonnannuwwam giraa'l haqqinne baxxaa worqinne goolabe.

¹⁴Ee wonnannuwwam ee Saaxi'n soorem ejjo'onnem yoo guma'uwwanne aagise.

¹⁵Oo wonnannuwwim ee Saaxi'n guma'uwwiinsi annanni ihimmi hasisooyyo.

¹⁶Ee lasage ijaajjuwwi kitaabamaakkoo an kiina uwwoommi lam ki'n ba'lla ee Hidi'l Saga'l Saaxi'n woronne disse.

¹⁷«Dufaachchoom lam angaa kolloo midaadim mat angaa kolloo ihoo haafixxi ifichcho muccur worqinne baxe.

¹⁸Ladaam lam kiruubeela tumammi worqinne baxe.

¹⁹Ee lamem kiruubeelam ee ifichchi hanenne lamem kolli tochchinnem isse. Oohim ifichchinne maqire baxamaakkoohan ihona.

²⁰Oo kiruubbuwwi ixxuwwi lado iim biddiqaa'lla'a haafixxi ifichcho ifiissona; ixxuwwim mat mato moo'aqqantaman ikka'a ifichcho aad illinne moo'llona.

²¹An kiina uwwoommi ki'n ba'llam ee Saaxi'n woronne dissitaa ee haafixxi ifichcho ifiise.

²²Anim ee lamem kiruubeelluwwi lambe'enne ee Haafixxi ifichchi hanenne ihaa kiinninne edamoommo. Isra'ee'l oosinam kuttoo ijaajo hundam uwwoommo.

²³Dufaachchi lam anga midaadim mat anga uullichchi odim mat angaa kolloo ihoo xaraphpheeza giraa'l haqqinne baxxaa

²⁴muccur worqinne goolabe; ixxi kululleetannem worqi goobinaancho isse.

²⁵Ixxi kululleetam mat taachcho'o ihoo qaxa gammaltaa worqinne goolabe.

²⁶Soor guma'a worqinne baxxaa lokki yoo soorem ejjo'onnem isse.

²⁷Ee xaraphpheezam iyyakkam wonnannuwwa aagisakkam guma'uwwi goobinaanchina hincaakkoohan ihona.

²⁸Ee xaraphpheeza iyyakkam wonnannuwwam giraa'l haqqinne baxxaa worqinne goolabe.

²⁹Aggi kitimina awwaadoo saahinnuwwa, wocittuwwa, maqorqoro'uwwaa loqooqo'i saahinnuwwaa muccur worqinne baxe.

³⁰Oo xaraphpheezim Hidi'l Saga'l Saaxi'n illagenne hee'ona; iina hincoo keesammi daabbo'i hundi ammanem ee xaraphpheezanne hee'immi hasisookko.

³¹Caakka dissakkam mu'uta muccur worqinne baxe; ixxekam lugumoo amaa tumamaakkoo worqinne baxe; ludo, gurambaa fiitaa wereeggina ihona mat issitaa baxe.

³²Sasii mat kollinne, sasii odim mulli kollinne yoo loh caafa midaadinne baxe.

³³Lohem caaffuwwina annannichchinam sas sas humbulli'nnoo fiit hungunuuna laboo gurumbuwwa isse.

³⁴Caakka dissakkam mu'uxxi caaffuwwi amanne humbulli'nnoo fiit hungunuuna laboo gurumbuwwika sooro isse.

³⁵Oo lohem caaffuwwim exxoo sasem beyyonnem mat mat gurumba isse.

³⁶Gurumbi, caafii caakka dissakkam mu'utii hundim matfir ihaa muccur worqinne baxamona.

³⁷Caakka dissakkam luwwinam lamar caakka baxxaa illaqqi kollinne caakkisoo'isina hanenne disse.

³⁸Gii'l buchcha giggissakkam mu'utaa qapha dissakkam saahinnuwwaa muccur worqinne baxe.

³⁹Caakka dissakkamaanninaa ee mu'uttuwwinaa hasisoo muccur worqi sadee onti kiilo'i ihona.

⁴⁰Ee hundam duunanne moo'isummisanne baxxeena qoossitaa la'e.