Read Hadiyya Dooyyi Kitaaba 26 Bible Online

Dooyyi Kitaaba 26 - Hadiyya bible

Dooyyi Kitaaba 26

¹«Ee'isam Keesammi Dukkaana shaano'inne, kuulinnee baar kashar fatirinnee dadamaakkoo tommi du'm eddechchinne baxe; oo du'm eddechchim talbi danaam fatirinne dadamaakkoohan ihona. Ee du'm eddechchannem angi qoor manni wereeggisaa baxakkoo kiruubeela isse.

²Ee du'm eddechchik annannichchikim qeeraa'lloom lamiyyee sadeenti anga midaad odim soor angi ihaa hundim gudaanchi ihona.

³Oo du'm eddechchim onti mat ihaa onti odim mullam ihaa gobamona.

⁴Edansakka'a gobakko'i lamem du'm eddechchaannonne annannichchi kasannem shaano'i carqinne baxamaakkoo guma'uwwa isse.

⁵Guma'uwwi edamoo'isa issitaa ontayyi guma'a ee du'm eddechchi mat kasanne ontayye guma'uwwa odim la'm du'm eddechchi mat kasanne isse.

⁶Keesammi dukkaan matfir ihoo'isina lamem du'm eddechcham amaxxansimmina worqiinsi ontayyi qapha baxe; du'm eddechchuwwam ee ontayyem qaphphuwwinnem amaxxanse.

⁷«Ee dukkaana ambimmina fella'i oddinne tommoo mat du'm eddechchaa baxe.

⁸Oo tommii mat du'm eddechchim gudaanchi ihaa qeeraa'lloom sad anga dufaachchim soor angi ihona.

⁹Ee keenom ontoo mat kollonne lohoo mulli kollonne issitaa gobe; lohika qinxaa'llaa illaqqi kollinne hanenne ede.

¹⁰Lamem kolli du'm eddechchaannonnem lasaanchi kasanne ontayyi ontayyi guma'uwwa isse.

¹¹Ee quna'uwwannem naas xaa'lleka ontayyi qaphphuwwa aagise. Ee'isinne lamem kollim amaxxamaa mat ihoo'isa isse.

¹²Gatu du'm eddechchika mataanni kollo afaree'n kollinne calcalaa'e.

¹³Qeeraa'lloo kollinne lamem du'm eddechchiinsim mat meeti'l kolli haraaroom yoo du'm eddechchi lamem kollinnem calcalaa dukkaana ifiisona.

¹⁴«Dukkaananne kashar gereechchi ambu'l omachcho, eehanni hanennem fellakkichchi omachcho eddaa ambe.

¹⁵«Dukkaana kaasimmina awwaadoo gorte'nnoo saanqa giraariinsi gudise.

¹⁶Ee saanqik hundikim uullichchi tommi anga dufaachchi mat angaa zissiraa ihona.

¹⁷Ee saanquwwa uullisimmina annannichchikam lam lam sane luguminne mat ogoranne shobbaa axise; dukkaa'n saanquwwa hundam ee'isa isse.

¹⁸Dukkaa'n woroo'n qarina lamiyyi saanqa gudise.

¹⁹Ee saanquwwa uullisimmina annannichchinam kin bi'l lokkuwwika sore baxe; oohim mat saanqina lam lokki hee'oo'isa isse.

²⁰Dukkaa'n hanaa'n qarinam lamiyyi saanqa gudise.

²¹Ee saanqina annannichchinam lam lam lokkuwwa issitaa sor lokkuwwi hee'oo'isa isse.

²²Dukkaa'n afaree'n kollina eelliinchi aagoo kollinne loh saanquwwa gudise.

²³Dukkaa'n lamejjuwwinam lam saanqa gudise.

²⁴Oo lamejjuwwanne yoo lamem saanquwwim lam mat guma'i worinne higoo'isa ihaa gudaakkoohan ihona; oo mat ihu saanquwwim lugumiinsi lud afeebe'e mat mullaanninne amaxxamoohan ihimmi hasisookko. Ee dukkaa'n ejjo'uwwa edansoo oo saanquwwim ee'isinne gudona.

²⁵Ee'isinne saanquwwina annannichchinam lam lam lokki yoohan ihaa tommii loh xaa'l lokkuwwi yoo sadeenti saanquwwi gudona.

²⁶«Dukkaa'n mat midaadinne yoo saanquwwina ihoo onti qirqire'e giraa'l haqqiinsi baxe.

²⁷Ee'isam mulli midaadinne yoo saanquwwina ihoo onti qirqire'uwwa gudise; dukkaa'n afareen eelliinchi aagoo kollinne yoo saanquwwina odim onti qirqire'e gudise.

²⁸Lambe'i qirqire'i ee saanquwwi lambe'enne tochchiinsi tochchi afeebe'e afoohan ihimmi hasisookko.

²⁹Ee saanquwwam worqinne goolabe; qirqire'uwwa aagisakkam afo'uwwam worqinne baxe; ee qirqire'uwwam woriqinne goolabe.

³⁰Ee lasage an kiina duunanne moo'isummisinne dukkaana uullise.

³¹«Ee'isam Keesammi Dukkaana shaano'inne, kuulinnee baar kashar fatirinnee dadamaakkoo tommi du'm eddechchinne baxe; oo du'm eddechchim talbi danaam fatirinne dadamaakkoohan ihona. Ee du'm eddechchannem angi qoor manni wereeggisaa baxaakkoo kuruubeela isse.

³²Ee du'm eddechcham giraa'l haqqinne baxakka'a worqinne goolabamaa soor kin bi'l lokkonne uullaakkoo soor bellanne worqinne baxamaa yoo sinxilluwwanne saqale.

³³Du'm eddechcham qaphinne amadiissittuuyyi saqale; lamem ki'n ba'l yoo Hidi'l Saga'l Saaxina ee du'm woronne disse; ee'isinne oo du'm eddechchi Keesammi beyyoo Keesammiinsi Keesammi beyyoo annanni issookko.

³⁴Ee lasage Hidi'l Saga'l Saaxina haafixxi ifichchinne ifiise.

³⁵Xaraphpheezooma Keesammiinsi Keesammi beyyiinsi biireen dukkaa'n hanaa'n qarinne disse; caakka dissaanchom woroo'n qaranne disse.

³⁶«Dukkaa'n goocina shaano'inne, kuulinnee kashar fatirinnee wereeggisakka'a dadakko'oo du'm eddechcha gudise; oo du'm eddechchim talbi danaam fatirinne gudaakkoohan ihona.

³⁷Ee du'm eddechchina ihoo onti meeggaro'uwwa giraa'l haqqiinsi baxxaa worqinne goolabe; sinxilluwwam worqinne baxe; ee meeggaro'uwwa uullisimmina ihoo naas xaarinne baxamaakkoo onti lokkuwwam gudise.