Read Hadiyya Dooyyi Kitaaba 27 Bible Online

Dooyyi Kitaaba 27 - Hadiyya bible

Dooyyi Kitaaba 27

¹«Qeeraa'lloom onti anga dufaachchoom onti anga uullichchi sas anga ihoo soor ejjo'i yoo kitima hincaa'akkam beyyo giraa'l haqqinne baxe.

²Soorem ejjo'onnem naas xaarinne goolabamaakkoo buudduwwa isse; oohim kiti'm beyyinne amaxxamaa baxamaakkoohan ihimmi hasisookko.

³Gii'l buchcha tuubakkam disxuwwa, giira hogoofaancho, loqooqo'i saahinnuwwa, qaphphuwwaa midachchuwwaa hundam naas xaarinne baxxaa gudise.

⁴Goobinaanchiinsi ki'isaa kiti'm beyyika lam gudaanchi beyyi afeebe'e calcalaa tochchiinsi tochcho afoo illaanchi'nnookkoka naas xaarinne baxe; ixxaannonnem soorem ejjo'onnem soor guma'uwwa isse.

⁶Ee kiti'm beyyo iyyimmina awwaadoo wonnannuwwam giraa'l haqqinne baxxaa naas xaarinne goolabe.

⁷Ee kiti'm beyyo iyyimmi hasisoo amman hundam wonnannuwwa ee kiti'm beyyi midaadduwwanne yoo guma'uwwanne aagissehe.

⁸An kiina duunanne moo'isummisinne kiti'm beyyo saanqinne baxxaa woronne mahim bee'an ihona.

⁹«Dukkaa'n kululleetanne wixxixxi beyyo baxe; ee wixxixxi beyyi woroo'n qar qeeraa'lloom mat xibbi angi ihona; ixxenam talbi danaam fatirinne du'm eddechchuwwa baxe.

¹⁰Ee du'm eddechchuwwa saqalakkam lamiyyi nottolluwwaa nottolluwwa uullisakkam lamiyyi lokkuwwaa naas xaarinne baxe; ee nottolluwwanne issakkam sinxilluwwaa meeggaro'oo kin birinne baxe.

¹¹Wixxixxi beyyi hanaa'n qarinam ee'isam baxe.

¹²Ee wixxixxi beyyik eelliinchi aaggi dufaachchoom ontayyi angi ihukkuuyyi ee beyyonne issakkam du'm eddechchinam ihoo tommi lokki yoo tommi meeggaro'uwwa gudise.

¹³Wixxixxi beyyik eelliinchi fi'l dufaachchoomim ontayyi angi ihona

¹⁴Aagakkam goocina lamem kollinam ihoo du'm eddechcha gudise; ixxuwwinam sas lokki yoo sas nottolluwwa gudise; gooca aagakkam lamem kolli du'm eddechchik annannichchikim qeeraa'lloom tommoo onti angaa ihona.

¹⁶Ee wixxixxi beyyi goocina shaano'inne, kuulinnee kashar fatirinnee anginne wereeggisakka'a axisakko'oo qeeraa'lloom lamiyyi anga ihoo du'm eddechcha gudise; oo du'm eddechchim talbi danaam fatirinne dadamaakkoohan ihona. Soor lokki yoo soor nottolluwwa ee eddechcha saqalimmina axise.

¹⁷Ee wixxixxi beyyi kululleetanne yoo nottolluwwa hundam birinne baxamaakkoo meeggaro'inne amaxxanse; sinxilluwwam birinne lokkuwwam naas xaarinne baxe.

¹⁸Wixxixxi beyyik qeeraa'lloom xibbi anga haraaroom ontayyi ang ihona; du'm eddechchikim uullichchi onti angi ihaa oohim talbi danaam fatirinne dadamaakkoohan ihona; ixxo uullisakkam nottolluwwi lokkonnem naas xaar yoohan ihona.

¹⁹Ee Keesammi Dukkaa'n woro'l awwaadina ihoo ayyi mu'utim, dukkaa'nnekii wixxixxi beyyi xiribbuwwii hundim naas xaarinne baxamaakkoohan ihona.

²⁰«Caakka hiim hundam caakkisimmina ihoo tumakka'a qarassakko'oo wee'l zaytika doo'llamma eebbona Isra'ee'l ooso ijaaje.

²¹Eekkam Aaroon ixxi oosinne maqirem uulli hiimaa soodeebe'e Keesammi Dukkaa'n woronne Hidi'l Saga'l Saaxina dissakkam du'm eddechchiinsi biireen Waa'i illagenne caakkoo'isa issona. Oohim Isra'ee'l oosina qaranchiinsi qaranchi afeebe'e heer heerina seer ihona.