Read Hadiyya Dooyyi Kitaaba 28 Bible Online

Dooyyi Kitaaba 28 - Hadiyya bible

Dooyyi Kitaaba 28

¹Waa'i Muse'ena «Qeessoomaninne iina awwaaddona kiyyabbaayyi Aaroona, ixxeka goo'n ooso Naadaaba, Aabihu, Ali'aazaraa Itaamaaraa Isra'ee'l oosiinsi annanni issitaa ki beyyo wore.

²Kiyyabbaayyi Aaroon iina awwaadoo ammane lombaa nuuraa uwwoo'isina keesammi eddechcha gudise.

³An anga qoor issummi keeno hundam weeshshshaa Aaroonina eddechcha daddona kure. Ee'isinne Aaroon qeessoomaninne iina awwaadeena annanni ihaakkoohan ihookko.

⁴Ixxuwwi gobbam eddechchim biqenne issakkam gonoona, eefuuda, qamisa, fatirinne wereeggisakko'oo qambiisa, horoorenne xaaxakkam shaashshaa sabbataa. Kiyyabbaayyi Aaroonii ixxi oosii qeessoomaninne iina awwaaddona ka keesammi eddechchuwwa ixxuwwina gudissona.

⁵Oo qoolluwwi worqinne, shaano'i hagarinne, kuulinnee kashar talbi danaam fatirinnee wereeggissa'a baxxona.

⁶«Eefuudam shaano'inne, kuulinne, baar kasharinne, worqinnee talbi danaam fatirinnee wereeggissa'a dadokona.[10]

⁷Eefuudika lamem kollom lamem guduminnem edansimmina awwaadoo lam xixxaab hee'ona.

⁸Ee'isam ee eefuuda baxxo'i worqinne shaano'i hagarinne, kuulinne, baar kashar hagarinne, kashar hagarinnee talbi danaam fatirinnee eefuudanne amaxxamaakkoo saqqa wereeggissa'a anginne baxxona.

⁹Aduu'n ille laboo lam kina axissaa Yaaqoob oosika tommikaa lamikam summa kitaabe.

¹⁰Ee lamem kinannem ixxuwwika summa lohika matonne, lohika odim la'mmaannonne ixxuwwi umu'llisinne kitaabe.

¹¹Kina cabbarakka'a koobo'o baxakkamaannisa Isra'ee'l oosika summa ee lamem kinannem kitaabe; ee kinam worqinne baxamaakkoo gurumbi goobinaanchinne gammale.

¹²Tomminaa lamem Isra'ee'l sullinaa tiissiishshi ihoo'isina lamem kinam eefuuda karakkam gudu'm xixxaabanne amadiise; ee'isinne an Waa'i i minaadaba hundi ammanem tiiroommisina Aaroon ixxuwwika summa ixxi gudummonne iyyookko.

¹³Lam gurumbi goobinaancho worqinne baxe.

¹⁴Muccur worqinne usisa dadamaakkoo lam chimchima gudissaa ee lamem gurumbi goobinaanchonnem amadiise.

¹⁵Muse'enam «Waa'i doo'lla xa'mmakkam biq gonoona lob qeessichchina baxe; ixxom eefuudisam worqinne, shaano'inne, kuulinne, baar kasharinnee talbi danaam fatirinnee anginne weereeggissaa gobise.

¹⁶Ixxekim qeeraa'lloomii haraaroomii mat mat taachcho'o ihoohan ihaa soor ejjo'i yoohanee qinxaa biddiqaakkoohanee ihona.

¹⁷Ee'isam soor ogoranne bito xee'aalli kiniinsi gurumba isse; luxxi ogoranne boobeet kashar kina, ajaar bito xee'aalli kina, inqu yakkam belecce'oo kina,

¹⁸la'm ogoranne sandaab kina, cuquluusa laboo kina, aduu'n ille laboo kina,

¹⁹saxxi ogoranne sandaab kina, heemachchi lab shaano'i kina, kuul kina,

²⁰soo'l ogoranne shaano'i kina, aduu'n ille loboo kinaa gagmoo'ixxa laboo shaano'i kinaa isse Ee keenom worqi gurumbi goobinaanchinne gammale.

²¹Ee tommonnee lamem bito xee'aalli kinanne annannichchonnem Isra'ee'l oosika tommikaa lamikam summa tomminaa lamem Isra'ee'l sullinam tiissiishshi ihona kitaabe.

²²Biq kiisinam usisa chimchima muccur worqinne dade.

²³Lam worqi quba'uwwa baxxaa biq gonoonanne lamem tochchinnem amadiise.

²⁴Lamem worqi chimchimam ee lamem tochchonnem yoo quba'uwwanne aagissaa kare.

²⁵Mulli kollinne yoo lamem chimchi'mmekam sane lamem goobinaanchonnem kare; ee'isinne illaqqi kollinne guduminne aad calcaloo eefuuda karakkam xixxaabbuwwinne kare.

²⁶Ee'isam worqi quba'ika lamo baxxaa eefuudiinsi awwonaa yoo biq gonoo'n lamem ejjo'onnem woroo'n saninne amadiise.

²⁷Odim lam quba'a worqinne baxxaa biqenne aad calcaloo eefuud xixxaabbuwwanne woroo'n kollinne kare; kattoohim anginne wereeggisakka'a dadakko'i sabbatii eefuudii edantam beyyonnette.

²⁸Biq gonoo'n quba'aa eefuud quba'aa mat issitaa shaano'i fatirinne kare. Biq kiisim eefuuda lade'akkam saqqiinsi hanaanetti ihoo bikkina sho'ooyyo.

²⁹«An Waa'i i minaadaba hundi ammanem tiiroommisina Aaroon keesammi beyyo aagoo ammane Isra'ee'l oosik summi kitaabamaakkoo ee biq gonoona edde'aa aagona.

³⁰Aaroon ee keesammi beyyo aagoo ammane Isra'ee'l minaadab ixxi wodanonne ihoo'isina Uuriimaa Tuumiimaa [11] biq gonoonanne aagise. Ixxim Waa'i illagenne Isra'ee'l minaadaphpheka oogato'o ixxi wodanonne iyyookko.

³¹«Eefuudinne edde'oo qamisa hundoomam shaano'i er fatirinne baxe.

³²Ee eddechchannem gaanje aagisakkam afo'i hee'ona; oo gaanji beyyim dereeramoobee'isa gammaltaa axise.

³³Ee qamis kasa shaano'inne, kuulinnee kashar fatirinnee roomaa'n misha kobi'llanne dade; ee mishshuwwi lambe'ennem worqinne baxamaakkoo doola isse.

³⁴Oo worqinne baxamu goottokkichcha'i doolluwwii worqinne baxamu roomaalla loboo mulli doolluwwi ee qamis shoqqi mishshuwwi lambe'enne aagona.

³⁵Keesammi beyyonne Aaroon i illagenne awwaadeena aagoo ammanee firoo ammanee ee qamisa edde'oo bikkina doo'llek sagar macceesamoo ammane ixxi foorinne yoo'isa la'isookko.

³⁶«Muccur worqinne mat saahina baxxaa ee saahinanne ‹Waa'ina keesamaakkoohane› yitaa kitaabe.

³⁷Ixxom Aaroon horoorenne xaaxoo shaashshi illagenne shaano'i fatirinne kare.

³⁸Aaroon eekka ixxi miinenne karu bikkina Isra'ee'l minaadab ayyi luwwam iina uwwitu'uuyyi ixxuwwanne mah bi'ishshim hee'uta'n an aa'oommo.

³⁹Aaroonika qambiisaa horoorenne ka'lloo shaashshaa talbi danaam fatirinne baxe; lade'oo sabbatam danaamisa weereeggissaa baxe.

⁴⁰«Aaroon oosinam lombaa nuuraa ihoo'isina qambiissuwwa, sabbattuwwaa qoobe'uwwaa baxe.

⁴¹Ee eddechchuwwam Aarooninaa ixxi oosinaa eddeese; qeessuwwi ikka'a iina awwaaddona wee'l zayta labbaa keese.

⁴²Sha'ixxi orachcho ifiixxamona lamadiinsi gurubbo afoo qolo'o talbi danaam fatirinne dade.

⁴³Aaroonii ixxi oosii i illagenne keesammi beyyonne te'im kitima hincaa'akkam beyyonne qeessoomaninne awwaaddeena hincitam amman hundam sha'ixxi orachchi moo'amaa letambee'isa eekka lade'llona; oohim Aarooninaa ixxi shumo'inaa hundinam qoxxaa hee'oo seera.