Read Hadiyya Dooyyi Kitaaba 29 Bible Online

Dooyyi Kitaaba 29 - Hadiyya bible

Dooyyi Kitaaba 29

¹«Aaroonii ixxi oosii qeessuwwi ikka'a iina awwaaddamisina keesanto'oo keen isse; miiqakkam luwwi bee'i labeenaa lam gereebbi ambulluwwaa gudise.

²Ursho'i nakkubee'i doo'llammi aras qama wee'l zaytinne cukkitaa qorosho'o sare; ee'isam zayti bee'i qorosho'o sare; caraq qorosho'om sattaa zayta labe.

³Ee qorosho'om labeenaa lamem gereechchoo kitimtoo ammane soro'onne issitaa iina hincaa'e.

⁴Aaroonaa ixxi oosoo Keesammi Dukkaana aagakkam goocanne wottaa wo'inne aanshe.

⁵Ee lasage Aaroonina qeessooma'n eddechcha, qambiisa, worinne edde'akkam eefuuxxi qamisa, eefuudaa biqenne issakkam gonoonaa eddeessaa sabbata ladiise.

⁶Horoorennem shaashsha xaaxxaa keesammoo'm mare'e ee shaashshi hanenne isse.

⁷Laphphakkam wee'l zaytam ixxi horoorenne duntaa iina annanni isse.

⁸Ee'isam ixxi ooso hincaa'llaa qambiisa eddeese.

⁹Lamadonnem sabbata ladiise; horoorennem qoobe'e isse; ixxuwwik qeessooman heer heerinatti ihookko. Ee'isinne Aaroonaa ixxi oosoo qeessoomanina annanni isse.

¹⁰«Labeena dukkaa'n goocanne hincaa'llaa Aaroonii ixxi oosii ee labee'n horoorenne anga issitamisa isse.

¹¹Ee labeenam dukkaa'n goocanne i illagenne dure.

¹²Ee labee'n xiigam ki angi maxxaarinne nakkittuuyyi kitima hincaa'akkam beyyi buudduwwanne labe; gatu xiiga hundam kitima hincaa'akkam beyyi lugumonne dune.

¹³Ee lasage godaphphi mu'uta ifiisoo di'ira, afare ifiisoo di'ira, lamem muroo lamem murom ifiisoo di'iraa massitaa kiti'm beyyonne shokkiise.

¹⁴Ihukkaarem mulli maara hundam, omachchoo hilleennaa manni gattiinsi biiranne fissitaa shokkiise. Oohim baaxii'l bikkina hincoo kitima.

¹⁵Lamem ambulluwwiinsim mato massitaa mat ambu'l hanenne Aaroonii ixxi oosii anga issitamisa isse.

¹⁶Ee ambulam duttaa xiigooma kiti'm beyyi soorem midaaxxi ejjo'onnem kife.

¹⁷Maaram beelayyitaa muttaa lasage godaphphi mu'utaa lokkuwwaa aanshitaa horoorinnee mulli maarinnee eddaa disse.

¹⁸Ee lasage ee maara hundichchom shokkiisakka'a himcaa'akkam kitim issitaa Waa'ina hincaa'e; ee kiti'm enjim Waa'a liiransoo er enji ihookko.

¹⁹«Qeessooma'n seerina qoodamu la'm ambula eebbaa Aaroonii ixxi oosii ee gereechchi ambu'l horoorenne anga issitamisa isse.

²⁰Ee ambulam duttaa Aaroonaannonnee ixxi oos makki kolli macci ludonne, makki angaanonnee makki lokki lob maxxaarannee hofqax xiigam aa'llaa labe; gatu xiiga hundam kitima hincaa'akkam beyyi soorem midaaxxi ejjo'onnem kife.

²¹Kiti'm beyyi hanenne yoo xiigiinsii laphphakkam wee'l zaytiinsii aa'llaa Aaroonanne, ixxi eddechchanne, ixxi oosonnee ixxuwwi eddechchannee kife; ee'isinne ixxii ixxi oosii ixxuwwi eddechchinne maqirem iina keesanto'oo keen ikkamo.

²²«Ee lasage ee ambu'l di'ira, sheerimo, godaphphi mu'uta ifiisoo di'ira, afare ifiisoo di'ira, lamem muroo lamem murom ifiisoo di'iraa makki lokkoo muttaa annanni isse. Mashka'oomim oo gereechchi ambul qeessoomma'n gereechcho.

²³Soro'onne issakka'a iina hincaa'akko'i qorosho'ika annannichchikam mat mato oohim ursho'i exxoo'n saramu qoroshsho'ika mato wee'l zayti exxaa saramukkaannika mato caraq qorosho'ika mato eddaa

²⁴Aaroonaannonnee ixxi oos angannee uwwe; eekkam heekkeessa'a iina kitim issita'a hincaa'llona.

²⁵Eekkam ixxuwwi angiinsi aa'llaa shokkiisakka'a hincaa'akkam kitiminne eddaa kiti'm beyyonne shokkiise; eehanni enjim eese Waa'a liiransookko.

²⁶«Aaroon qeessooma'n seerina durakko'i ambu'lleka eeddiraaso iina wonaceekkeesakka'a hincaa'akkam kitim issitaa ki'ise; ookkim kiina sharad ihona.

²⁷«Qeessooma'n seerina duramu ambu'lleka kitimina wonceesakka'a hincaa'akko'i eeddiraasaa hayyee keese; oohim qeessuwwina uwwamoo sharad ihookko.

²⁸I minaadab mateeyyoo'm kitima hincaa'oo amman hundam eediraasoo makki lokkoo qeessuwwina sharad ihona qoodaammo; oohim minaadab iina hincaa'oo kitima.

²⁹«Aaroon lehoo ammane qeessooma'n eddechchi ixxi oosan ihookko; ixxuwwim wee'l zayta labakka'a qeessoomanina annanni issakkam ammane edde'llona.

³⁰Aaroon bikkenne doo'llamaa keesammi beyyonne dukkaa'n woronne iina awwaadeena aagoo qeessichchi ee eddechcha lamar ballina edde'ona.»

³¹«Aaroonaa ixxi oosoo qeessoomanina keesimmina duramu gereechchika maara massitaa keesammi beyyonne sare.

³²Ee maaram soro'onne yoo qoroshsho'inne maqirem dukkaana aagakkam goocanne ikka'a qeessuwwi ittona.

³³Qeessoomaninne awwaaddeena annanni ikkam balla baaxii'l haafitina hincoo kitima ittona; oo kitim keesammi ihu bikkina qeessuwwiinsi bagaan mulli manni itoone.

³⁴Ee kitimiinsi gatu maara te'm qorosho'o hundam giiranne shokkiise; keesammi ihu bikkina ayyim itimmi hasisooyyo.»

³⁵«Aaroonii ixxi oosii qeessuwwi ikkam seera an ijaajummisanne lamar ballanne guullitaa isse.

³⁶Baaxiilo haafixxi bikkina ee lamarem ballannem mat mat labeena kitime; oohim kiti'm beyyo muccussoohan ihookko; wee'l zaytam labbaa keesamaakkoohan isse.

³⁷Eeham ee lamarem ballannem ballina ballina isse; ee'isinne kiti'm beyyi hore'em keesamaakkoohan ihookko; ixxim keesammi ihu bikkina nakkoo hundim keesammi ihookko.»

³⁸«Qaramukkaanniinsi mat hiincho ihaakkoo gereebbi ambulluwwika lamo ballina ballina uttakkambee'isa kitimina hincaa'llaa

³⁹matoo dara matoo maaro'o kitime.

⁴⁰Mat ambulinne maqire mat kiilo'o ihoo danaam aras qama tumakka'a ciinsakko'oo mat liitir muccur wee'l zaytinne maqirem hincaa'e; mat liitir woyi'n diqaasam kitim issitaa eehanni hanenne dune.

⁴¹La'm ambulam maaro'onne da'llaanni qax qama, wee'l zaytaa woyi'n diqaasaa eddaa kitime; oohim enje'aa eese Waa'a liiransoo kitima.

⁴²Waaroo doolli hundannem shokkiisakka'a hincaa'akkam kitima dukkaa'n u'llummanne Waa'i illagenne hincimmi hasisookko; oo beyyim keese atoorassoommanee i minaadabinne edamoommanee.

⁴³Oo beyyim i minaadab Isra'eelinne edamoommane; beyyoomim i lombinne keesamookko.

⁴⁴An ee kiti'm beyyoo dukkaanaa qeessuwwi ikka'a awwaaddona Aaroonaa ixxi oosoo keesoommo.

⁴⁵Isra'ee'l minaadaphphi lambe'enne hee'oommo; ixxuwwinam Waa'i ihoommo.

⁴⁶Ixxuwwi lambe'enne hee'eena Gibxi uulliinsi awwonsaa fissummok ixxuwwi Moollanni Waa'i anetti ihummisa laqqamo; anim ixxuwwina Moollanni Waa'a.»