Read Hadiyya Dooyyi Kitaaba 3 Bible Online

Dooyyi Kitaaba 3 - Hadiyya bible

Dooyyi Kitaaba 3

¹Muse'e Miidiyaa'm uulli qeessichchi hee'u ixxi balli ihu Yootirika gereebbaa fella'aa allaaram hee'ukko; ixxim ee allaachcha udma'i uulli tochchi afeebe'e ushe'aa Waa'i duuna yakkam Kooreeba afukko.

²Ee beyyonne Waa'ik asse'amaanchi dubbonne aphphoo gii'l laba'n woronne moo'amukko; Muse'em ee dubbonne giir aphphukkaarem dubboom shokkubee'isa moo'aa

³«Kuk hinkido'i maalalsiisoo luwwa? Dubboom hinkid shokkukkoyyo? Hincaa moo'immi hasisookko» yukko.

⁴Muse'e eekka moo'eena hincu ammanenne Waa'i aphphoo dubbonne aphphoo gii'l woronne ihaa «Muse! Muse!» yaa weeshukko. Muse'em «Yee!» yukko.

⁵Waa'im Muse'ena «Kid hincititte; ku at uullitti beyyi keesamaakkoohan ihu bikkina ki lokkiinsi kobe'e fisse.

⁶An gaassi kiyyanno'ina Abrihaamina, Yisaaqinaa Yaaqoobinaa Waa'a» yukko. Ee ammane Muse'e Waa'a moo'imma baddaa ille gunguu'llukko.

⁷Waa'i odim Muse'ena «Gibxi uullanne yo'i i minaadaphphi hawwo moo'aammo; ixxuwwi laachcham macceesaammo; ixxuwwika wor amadancha la'aammo.

⁸Ixxuwwa Gibxi uulli agiddaniinsi gatiseena dillaammo. Gibxi uulliinsim fissaa kaba Kana'aa'n manni, Hiite'i manni, Amoore'i manni, Ferize'i manni, Hiiwe'i mannii Iyyaabuus mannii hee'llam adii marabii daadoo haraar harish uulla uwwoommo.

⁹Isra'ee'l oosika laachcha macceesaammo; Gibxi uulli manni ixxuwwanne afissam damigoo u'nnaa moo'aammo.

¹⁰Oono'o, kaba i minaadaba Gibxi uulliinsi fissitoo'isina Gibxi adi'l beyyo keese asse'oommo mare» yukko.

¹¹Ihukkaarem Muse'e Waa'ina «Faari'oon beyyo maraa Isra'ee'l ooso Gibxiinsi fisseena an ayyette?» yukko.

¹²Waa'im dabaraa «An kiinninne maqir ihoommo; an keese asse'ummisina mare'i ihookkok minaadaba Gibxiinsi fissitaa lasonne ka duunanne iina Waa'ina ki'nnuwwi otossimma» yukko.

¹³Muse'em Waa'ina «An Isra'ee'l oos beyyo maraa ‹Gaassi ki'nnuwwi anno'ina Waa'i ki'nnuwwi beyyo eese asse'aakko› yoommi ammane ixxuwwi odim ‹Ixxek summi ayyette?› yitota'n mayyaa dabaroommo?» yukko.

¹⁴Waa'im Muse'ena «An ‹Yoommanee hee'oommanee› ee bikkina ‹Yookkokii hee'ookkokii eese ki'nnuwwi beyyo asse'aakko› yitaa kure» yukko.

¹⁵Ee'isam Waa'i Muse'ena «Gaassi ki'nnuwwi anno'ina Abrihaamina, Yisaaqinaa Yaaqoobinaa Moollanni Waa'i eese ki'nnuwwi beyyo asse'aakko. Kuk heer heerina hee'oo i summa; ka lasaqqi qaranchi hundannem tiiramoommok ka summinnette› yaakko yitaa Isra'ee'l oosina kure.

¹⁶«Mattaa Isra'ee'l minaadaphpheka awwonsaano hundam mat beyyonne wixxaa'e; gaassi ki'nnuwwi anno'ina Abrihaamina, Yisaaqinaa Yaaqoobinaa Moollanni ihummi Waa'i kiina moo'amaa ‹Ki'nnuwwi beyyo waaraa Gibxi uulli manni ki'nnuwwa u'nnisso'isaa wor amaddo'isaa moo'ummo.

¹⁷Ee bikkina Gibxanne u'nnanchinne hee'llakkam beyyiinsi fissaa oono'o kaba Kana'aa'n manni, Hiite'i manni, Amoore'i manni, Ferize'i manni, Hiiwe'i mannii Iyyaabuus mannii hee'llam adii marabii daadoo haraar harish uulla ki'nnuwwina uwweena qoodaammo› yaakko» yitaa kure.

¹⁸«Isra'ee'l awwonsaanim at woccoo woshsha macceesookko; ee lasage atii Isra'ee'l minaadaphphi awwonsaanii Gibxi adi'l beyyo mattakka'a ‹Ibro'i mannina Moollanni Waa'i niina moo'amaakko; ee bikkina ni Moollanni Waa'ina kitima hincaa'nneena sas balli googo taakke'nnaa udma'i uulla malloommisina neese fatakihe› yi'llehe.

¹⁹Ihukkaarem Gibxi uulli adil malaayyaam wodinnette ihubeelas hore'em fatakoobee'isa la'oommo.

²⁰Ee bikkina lobakata baddisoo maalalsiisoo agannuwwa Gibxanne issaa i malaayyaam wodinne ixxuwwa aphphisoommo; ee lasage ixxi ki'nnuwwa fatakookko.

²¹«Ki'nnuwwi fittakkam ammane Gibxi minaadaphphi illagenne nuura siiddakkamisa issoommi bikkina kora'i angam fittakkamoyyo.

²²Ki'nnuwwi meenti hundim hegeegonne hee'llam Gibxi uulli meentiinsi worqinnee birinnee baxamu wereeggi mu'utaa eddechchaa xa'mmitona; ee hundam aa'llakka'a goon oosinaa landinaa eddeessakkamo; ee'isinnem Gibxi uulli manna boggakka'a fittakkamo» yukko.