Read Hadiyya Dooyyi Kitaaba 30 Bible Online

Dooyyi Kitaaba 30 - Hadiyya bible

Dooyyi Kitaaba 30

¹«Aduruusa wiriissakkam kiti'm mu'uta giraa'l haqqinne baxe.

²Ixxekim qeeraa'lloom mat anga dufaachchi mat anga uullichchi lam angi ihaa soor midaadi yoohan ihona. Ee kiti'm beyyi ludonnem matfir ihaa baxamaakkoo buudduwwi hee'ona.

³Ee kiti'm beyyi ludika soorem midaadoo buudduwwaa hundam muccur worqinne goolabe. Worqi gobinaanchom isse.

⁴Lam worqi guma'a baxxaa kiti'm beyyo iyyakkam wonnannuwwi aagoo'isa issitaa goobinaanchiinsi woroon amaxxanse.

⁵Wonnannuwwam giraa'l haqqinne baxxaa worqinne goolabe.

⁶Ee kiti'm beyyom Hidi'l Saga'l Saaxi'n illagenne yoo du'm eddechchiinsi biireen disse. Anim ee beyyonne kiina moo'amoommo.»

⁷«Aaroon dar dara caakka gudiseena waaroo ammane erisa enje'oo aduruusa ee kiti'm beyyonne wiriissona.

⁸Odim hundem hiimom caakka caakkisoo ammane eehid issona; oo aduruus kitim waaroo doollenne hundannem uramoobee'isa i illagenne wiriirona.

⁹Keesamubee'i aduruusa, shokkiisakka'a hincaa'akkam kitimaa hurbaaxxi kitimaa ee kiti'm beyyonne kitimtitte; woyi'n diqaas kitimam ee beyyonne duntitte.

¹⁰Aaroon hiinchonne mat kore baaxii'l haafixxi bikkina kitimamu diinaxxi xiigiinsi aa'aa soorem buudonnem labaa kiti'm beyyi muccuroo seera guullona; ku seerim waaroo doollenne hundannem hiinchonne hiinchonne ihona; ee'isinne oo kiti'm beyyi iina Waa'ina hore'em keesamaakkohan ihona» yukko.

¹¹Ee'isam Waa'i Muse'ena

¹²«Isra'ee'l minaadaba xiggoo ammane ixxuwwanne booban uboobee'isa annannichchim ixxi foo'l bikkina tisso miqona.

¹³Xigonne exxaa xigamoo ayyi manchim keesammi dukkaa'n woronne la'amaakkoo keennaanchonne keenaa mat kin bira miqona; annannichchim eekka Waa'ina kitim issaa hincaa'ona.

¹⁴Umur lamiyyi hiinchoo eehanniinsi hanaanii ihu ayyi manchim minaadaphphi xigonne exxulas ee kitima iina Waa'ina hincaa'ona.

¹⁵Ixxuwwi foo'l bikkina ka kitima Moollanni Waa'ina hincaa'llam ammane goddaanchi edaa buxichchim hoffiisaa hincaa'oone.

¹⁶Ee baaxii'l haafixxi diinate Isra'ee'l oosiinsi wixxaa'llaa keesammi dukkaa'n awwaadina ihoo'isa isse; oohim ixxuwwi foo'l bikkina tissi ihaa Isra'ee'l ooso hundi ammanem tiiroomman ihookko» yukko.

¹⁷Waa'i Muse'ena

¹⁸«Aanshaqqakkam saahinaa ixxo diissakkam lokkaam mu'utaa naas xaarinne baxe; ixxom kiti'm beyyinaa dukkaaninaa lambe'enne dissitaa wo'o wonshe.

¹⁹Ee wo'innem Aaroonii ixxi oosii ixxuwwi angaa lokkoo aanshaqqitona.

²⁰Eekkam issimmi hasisookkok Keesammi Dukkaa'n woro aaggoo'nnii giirinne shokkiisakka'a hincaa'akkam kitima hincaa'lloo'nnii gaassita'a ee'isa issitolas ixxuwwi lehiinsi gattamo.

²¹Ee bikkina ixxuwwi letambee'isa ixxuwwi angaa lokkoo aanshaqqitona; oohim ixxuwwinaa ixxuwwi shumo'i hundinamii heer heerina qoxxaa hee'oo seera» yukko.

²²Waa'i Muse'ena

²³«Doo'llamaakkoo enjuwwa, loh kiilo'i karbe'e, sas kiilo'i enje'oo qarafa, sas kiilo'i enje'oo aduruusa

²⁴loh kiilo'i lobakata enje'oo birgudaa[12] oohim Keesammi Dukkaananne la'amaakkoo keennaanchonnetti ihona; eehannonnem soor liitir wee'l zayta ede.

²⁵Ixxom shitto'isa hamaaransitaa keesamaakkoo wee'l zayta baxe.

²⁶Ee wee'l zaytam dukkaananne, Hidi'l Saga'l Saaxinanne,

²⁷xaraphpheezannee ixxonne yoo mu'uttuwwannee, caakka dissakkamaannonnee ixxo gudisakkam mu'uttuwwannee, aduruus kiti'm beyyonne,

²⁸shokkiisakka'a hincaa'akkam kiti'm beyyonnee ixxonne yoo mu'uttuwwannee, aanshaqqakkam saahinannee ee saahina dissakkam mu'utannee hundannem labe.

²⁹Ee'isinne ee mu'uta hundam annanni issitaa hore'em keesamaakkoo keen issitootto; ixxuwwa nakkoo keen hundim keesamaakkoohan ihookko.

³⁰Ee lasage Aaroonii ixxi oosii qeessoomaninne iina awwaaddona wee'l zayta labbaa qeessuwwi isse.

³¹Isra'ee'l minaadabina ‹Ku keesamaakkoo wee'l zayti waaroo doollenne hundannem i awwaadina ihona.

³²Mulli mannanne ayyennem labbitte; kido'i wee'l zaytam ka'isinne baximmiinsi ega'llehe; ixxi keesammi ihukkisam laqqehe.

³³Kido'i wee'l zayta baxoo manchi te'im ixxeensi massaa qeessichchi ihubee'i manchonne laboo manchi ayyim i minaadabiinsi annanni ihaa yaayyamona› yitaa kure» yukko.

³⁴Waa'i Muse'ena «Enje'oo haqqiinsi firoo aqoomaada, ereeri'nnoo'i luwwi woronne hee'oo enje'oo luwwa, lobakata enje'oo aqoomaadaa muccur aduruusaa hundam gudaanchi mu'utanne keentaa

³⁵shitto'isa hamaaramaakkoo aduruus issitaa axise; oohim muccuraa keesammaa ihona sooqido ede.

³⁶Eehanniinsim hofqaxam silliqqaa tuntaa Dukkaa'n woronne Hidi'l Saga'l Saaxi'n illagenne disse; oohim kiina hore'em keesamaakkoohan ihookko.

³⁷Ee'isinne hamaattakko'i aduruus Waa'ina keesamaakkoohan ihona bagaan ki'nnuwwi gagina awwaaxxitakkotte.

³⁸Eehido'i hamaaramaakkoo enje'oo aduruusa baxaa ixxi gagina enjinne liirameena hasoo manchi hee'ulas i minaadabiinsi annanni ihaa bi'ona» yukko.