Read Hadiyya Dooyyi Kitaaba 31 Bible Online

Dooyyi Kitaaba 31 - Hadiyya bible

Dooyyi Kitaaba 31

¹Waa'i Muse'ena

²«Oono'o, an Yihu sulliinsetti ihu Huur beetina beet Uuriin beet Baasili'eela doo'llaammo.

³Anginne baxakkam ayyi baxom baxeena xaanoo angi qoorooma, lachchaa qoossimmaa siideena xanoo'isina ixxo i ayyaaninne wonshaammo.

⁴Ee bikkina ixxi worqinne, birinnee naas xaarinnee annanni annanni luwwa qooroominne qoodukkuuyyi baxona.

⁵Ee'isam weergishshina ihoo kina cabbareena, haqqam cabbaraa axiseenaa mulli baxo hundam qoorominne baxeenaa xanoo'isa issaammo.

⁶Ixxenne maqirem exxaa baxona Daan sulliinsi Ahisaamaak beeto Ohoolii'aaba doo'llaammo; an keese ijaajummi luwwi hundam baxxona mulli angiqoor manni hundinam lachcha edaa uwwaammo.

⁷Baxxakkona an ijaajummi mu'utim keesammi dukkaana, Hidi'l Saga'l Saaxinaa haafixxi ifichchoo, Keesammi Dukkaa'n woronne awwaaxxakkam mu'uttuwwa,

⁸xaraphpheezaa ixxenne maqire awwaaxxakkam mu'uttuwwaa, muccur worqinne baxamaakkoo caakka dissakkam mu'utaa ixxenne maqire awwaaxxakkam mu'utaa, aduruus kiti'm beyyo,

⁹shokkiisaakka'a hincaa'akkam kiti'm beyyoo ixxena hasisoo luwwaa, aanshaqqakkam saahinaa eekka dissakkam mu'utaa,

¹⁰Aaroonii ixxi oosii qeessooma'n awwaado awwaaddam ammane edde'llam keesammi eddechchuwwaa

¹¹keesammi wee'l zaytaa keesammi beyyina ihoo erisa enje'oo aduruusaa an keese ijaajummisanne baxxamo» yukko.

¹²Waa'i Muse'e

¹³«Isra'ee'l oosina ‹An Waa'i ki'nnuwwa iina keesantakko'oo minaadab issaa doo'llumman ihukkisa moo'isoohan ihaa waaroo doolli hundannem i lambe'ennee ki'nnuwwi lambe'ennee qoxxaa hee'oo mare'i ihu bikkini I Usheexxaxxi balla lonsehe.

¹⁴Oo balli keesamaakkoo balli ihu bikkina usheexxaxxi balli issitakka'a egallehe; ee balla haashaassookkokii ee ballanne baxookkokii ayyi manchim minaadaphphi lambe'iinsi annanni ihaa bi'ona.

¹⁵Ki'nnuwwika baxo hundam loh ballanne baxxehe; ihukkaarem lama'l balli iina annanni ihaa keesamaakkoo Usheexxaxxi balla; ee bikkina ee Usheexxaxxi ballanne baxoo ayyi manchim lehinne guzumo'amona.

¹⁶Isra'ee'l oos waaroo qaranchanne hundannem usheexxaxxi balla heer heerina hee'oo Hidi'l Saga'l mare'i issitta'a lonsimmi hasisookko.

¹⁷Oo balli i lambe'ennee Isra'ee'l oos lambe'ennee heer heerina hee'oo mare'e; mashka'oomim an iimanee uullaa loh ballanne qooccaa lasage lama'l ballanne bax hundiinsim usheexxummi balli ihu bikkinatte› yitaa kure» yaa ijaajukko.

¹⁸Waa'i Muse'e Siina'i duunanne atoorassimma guullaa lasage Waa'i gagim ixxi anginne ijaajjuwwa kitaabaakkoo lam ki'n ba'lla Muse'ena uwwukko.