Read Hadiyya Dooyyi Kitaaba 32 Bible Online

Dooyyi Kitaaba 32 - Hadiyya bible

Dooyyi Kitaaba 32

¹Minaadab Muse'e duunanne lobakata dasukkisa moo'lla'a lasage wixxita'a Aaroona kibbita'a «Ee neese Gibxiuulliinsi awwonsaa fissu Muse'enne mah afuda'e lanqumbee'i bikkina ni illaginne mattu'uuyyi neese awwonsitam waa'uwwa niina baxe» yito'o.

²Aaroonim «Ki'nnuwwi meenti, goo'n oosii landii ixxuwwi maccenne issito'i worquwwa hundam wixxaa'llakka'a i beyyo eebbehe» yukko.

³Ee bikkina ixxuwwi hundim ixxuwwi macci worqa hundam fissita'a ixxi beyyo eebbo'o.

⁴Ixxim ee worqa hundam wixxaa'aa giranne bukkukko; bukkamu worqam baxakkam mu'utinne axisaa wee'ichchi misila baxukko. Minaadabim «Isra'eela; keese Gibxiinsi awwonsaa fissu waa'uwwi kakeeno» yukko.

⁵Aaroonim eekka moo'u ammanenne worqi wee'ichchi misi'l illagenne kiti'm beyyo baxaa soodo Waa'ina lombi ugud ihookko» yaa la'isukko.

⁶La'm balla daram minaadab ki'lla'a shokkiisakka'a hincaa'akkam kitimaa mateeyyoo'm kitimaa hincaa'llo'o; afuua'atim itta'atii agga'atii lasage kaddeena ki'llo'o.

⁷Waa'i Muse'ena «At Gibxi uulliinsi awwonsitaa fissitti ki minaadab huushamaakkoo bikkina qaqqissaa dille.

⁸Ixxuwwi egattona ijaajjitti googiinsi gaaggaabba'a fitto'ookko; ixxuwwi gaginam wee'ichchi kobi'llanne waa'a baxxo'ookko; ixxenam otossito'ookko; kitimam hincaa'llo'ookko; ee'isam ‹Isra'eela, keese Gibxi uulliinsi fissu waa'i kane› yito'ookko.

⁹Ixxuwwik wodan hinkaa'nna duudaakkoohanda'e an la'oommo.

¹⁰Kabadem an ixxuwwanne lobakata quuqaa bi'iseenatti ihu bikkina at cawwitaa ure; keesem lobakat minaadab issoommo» yukko.

¹¹Ihukkaarem Muse'e ixxi Moollanni Waa'ika biijooma hasaa «Moollanni Waa'a, ki wodinnee lob malaayyinnee Gibxiinsi fissitti ki minaadabanne kaa'nna quuqqoottok mahinatte?

¹²Gibxi uulli manni ‹Waa'i ixxuwwa duunnuwwanne sheenaa uulliinsim guullaa bi'iseenaa hasu bikkina Gibxiinsi awwonsaa fissukko› yitu'uuyyi naacantamisa mahina issitoolla? Kabadem ki quunqiinsi daba'lle iyyaqqeme. Ki minaadabanne boobana eebbitte.

¹³Ki awwaadaano Abrihaama, Yisaaqaa Yaaqoobaa sawwihe; at ixxuwwina ki'nnuwwi shumo'o iima'n boollaankisa fikkaannisseenaa neeyyaxxi uullam heer heerina ixxuwwi gulummi issitaa uwwiteenaa hide'llittisa sawwihe» yukko.

¹⁴Ee bikkina Waa'i qishixxukko; minaadabam bi'isimma urukko.

¹⁵Ee lasage Muse'e lamem kollonnem Waa'ik tommem ijaajim kitaabamaakkoo lam ki'n ba'lla amadaa duuniinsi dillukko.

¹⁶Lamem ki'n ba'llim Waa'i bax hee'ukko. Ee ba'lluwwannem kitaabamaa hee'u ijaajjuwwa kitaabukkok Waa'a.

¹⁷Iyyaas minaadab coro'ookkoka macceesaa Muse'ena «Hegeegonne o'l sagar macceesamoolla» yukko.

¹⁸Muse'em «Ku macceesamoo sagar kaachchi sagarayyo; te'im kaa'amu minaadaphphi sagarayyo; macceesamoollak kajji sagara» yaa dabarukko.

¹⁹Muse'em amba'a afaa ee worqinne baxamu wee'ichchi misilaa minaadaphphi kajjaa moo'aa lobakata nadadukko; ixxi anganne amadaa hee'u lamem ki'n ba'llam duu'n lugumonne darabaa iiqansukko.

²⁰Minaadab baxxa'a hee'llo'i wee'ichchi misilam massaa giiranne shokkiisukko; eekkam xaansaa liitaa lasage wo'inne hamaaraa Isra'ee'l minaadab aggamisa issukko.

²¹Aarooninam «Ku minaadab keese maha issukkaare kido'i jor baaxiilo baxoo'isa issitto?» yukko.

²²Aaroonim dabaraa «I Moollanna! At eesenne quuqqitte; ku minaadab hundi ammanem jora baxeena hinkaa'nna hasooda'e at laqqootto.

²³Ixxuwwim ‹Neese Gibxiinsi awwonsaa fissu Muse'enne mah afuda'e lanqumbee'i bikkina ni illaginne mattu'uuyyi neese awwonsitam waa'uwwa baxe› yito'o.

²⁴Anim worqinne baxamu wereeggi mu'uta hundam sheelatta'a i beyyo eebbamisa issummo; ixxuwwim eebba'a iina uwwito'aare ee wereeggi mu'uttuwwa hundam giiranne issummi ammanenne ku wee'ichchi misil firukko» yukko.

²⁵Aaroon minaadab ixxuwwi diina'i illagennem sholle'lleebe'i afeebe'e hasso'isa ikkona fatakukkisa Muse'e moo'ukko.

²⁶Ee bikkina wiidda'n beyyi goocanne uullaa «Waa'an ihukkok ayyim i kolli waarona» yaa sagara iimaa'aa wocukko; ixxi kululleetannem Leewi'i oos hundim wixxito'o.

²⁷Ixxim dabaraa ixxuwwina «Ki'nnuwwi annannichchim ki'nnuwwi bisa'a amaddakka'a ka goociinsi ee goocanne afeebe'e wiidda'n beyyonne daba'llammehe; ki'nnuwwiinsi ayyim ixxi gaqqi abbaayyo, beshichchoo ollakkichchoo qishixxoo'n shihona Isra'ee'l Moollanni Waa'i ijaajaakko» yukko.

²⁸Leewi'i oosim Muse'e ijaajukkisa issito'o; mexxo'i ee ballannem sas kum manna shito'o.

²⁹Muse'em Leewi'i oosina «Kaballa ki'nnuwwi goo'n oosoo ki'nnuwwi abbaayyuwwaa shitakka'a Waa'ina awwaaddakkam qeessuwwi ikkakka'a keesantakko'i bikkina Waa'i ki'nnuwwa maasse'aakko» yukko.

³⁰La'm balli daram Muse'e Isra'ee'l oosina «Lobakata jor ihaakkoo baaxiilo baxxakko'ookko; ihukkaarem kaba odim an daba'llaa ee duuna Waa'i beyyo maroommo; ayyi la'ukko ki'nnuwwi baaxii'l bikkina haafite siideena xanoommi ihookko» yukko.

³¹Ee bikkina Muse'e Waa'i kolli daba'llaa «Ku minaadab lobakata jor baaxiilo ki illagenne baxaakko; worqiinsi baxamaakkoo misila waa'uwwi issaa otossaakko.

³²Ihukkaarem at ixxuwwi baaxiilo haafihe; haafitbeelas i summa kitaabbitti kitaabiinsi shiinshe» yukko.

³³Waa'im Muse'ena «Summa i kitaabiinsi shiinshoommok baaxiilo baxxa'a eese kichche'isso'i kee'nnane.

³⁴At kaba mare; an kiina kurummi beyyo minaadaba awwonsitaa masse; i asse'amaanchim ki illagenne ihaa marookko; ihukkaarem an ka minaadaba ixxuwwi baaxii'l bikkina guzumo'oommi amman waarookko» yaa dabarukko.

³⁵Worqi wee'ichchi misila ixxuwwina baxona Aaroona giddisso'i bikkina Waa'i ee minaadaba boobaninne aphphisukko.