Read Hadiyya Dooyyi Kitaaba 33 Bible Online

Dooyyi Kitaaba 33 - Hadiyya bible

Dooyyi Kitaaba 33

¹Waa'i Muse'ena «Atii Gibxiinsi awwonsitaa fissitti minaadabii ka beyyiinsi ki'llakka'a Abrihaamina, Yisaaqina, Yaaqoobinaa ixxuwwi shumo'inaa uwweena sagara aagummi uulla mallehe.

²An ki'nnuwwi illagenne higaa awwonsukkuuyyi maroo asse'amaancho asse'oommo; Kana'aa'nneka, Amoore'ika, Hiite'ika, Farze'ika, Hiiwe'ikaa Iyyaabuus minaadabaa ki'nnuwwi illagiinsi holloommo.

³Ki'nnuwwi mattakkamok adii marabii daadoo uulla; ihukkaarem ki'nnuwwik wodan duud ihu bikkina an ki'nnuwwa googonne bi'isoombee'isa ki'nnuwwinne maqire maroommoyyo» yukko.

⁴Minaadabim ka kichche'isoo sagara macceessa'a qaraaraallisa wi'llito'o; ee lasage wereeggi luwwa maham ixxuwwi orachchonne issito'oyyo.

⁵Waa'i odim Muse'e «Ki'nnuwwi wodan duudaakkoo minaadab ikkakko'i bikkina illi cilimmaaxxi qaxinam ihukkaare ki'nuwwinne maqire marumlas an ki'nnuwwa guullaa bi'isoommo; kabadem ki'nnuwwika wereeggina awwaaxxitakkam luwwi hundam sheelattakka'a uunjehe; an ki'nnuwwi bikkina maha issimmi hasisooda'e qoodoommo» yaa kurona ijaajukko.

⁶Ee bikkina Isra'ee'l oos Siina'i duunanne wereeggi mu'uta hundam sheelatta'a uunjito'o.

⁷Mus'e Isra'ee'l minaadab wiiddanto'i beyyonne hundannem Keesammi Dukkaana ee wiidda'n beyyiinsi haxonne massaa kaasam hee'ukko; ixxom «Keesammi Dukkaana» yaa weeshukko; Waa'i doo'lla xa'mmeena hasu manchi hundim ee beyyo maram hee'ukko.

⁸Muse'e ee Dukkaa'n beyyo maroo amman hundam minaadab hundim ixxuwwi gaqqi dukkaa'n goocanne uullita'a Muse'e Dukkaa'n woro aageebe'i afeebe'e ixxo moo'llam hee'llo'o.

⁹Muse'e ee Dukkaana aagaa lasage duub utuphphisa dillaa Dukkaa'n goocanne uullam hee'ukko; Waa'im ee duuphphi woronne ihaa Muse'e atoorassam hee'ukko.

¹⁰Minaadab duuphphi uwb Dukkaa'n goocanne ullukkisa moo'llam ammane ixxuwwi gaqqi Dukkaa'n goocanne guruphphita'a otossitam hee'llo'o.

¹¹Mat manchi ixxi beshichchinne atooraroohaannisa Waa'i Muse'ene atooraram hee'ukko; ee lasage Muse'e wiidda'n beyyo daba'llam hee'ukko; ihukkaarem Muse'ena hara'mmaanchi hee'u Naawe'i beet woraadichchi Iyyaas Dukkaa'n woriinsi annanni iham hee'ukkoyyo.

¹²Muse'em Waa'ina «Ka minaadaba awwonse yitaa at eese ijaajjaa hee'llitto; ihukkaarem iinninne maqire ayye eddaa asse'llooda'e iina kuttittoyyo; at iina ‹An keese ki summinnem la'oommo; i illagennem nuura siiddaatto› yitaa hee'llitto.

¹³Kabadem an ki illagenne nuura siidaammoohan ihulas an keese la'aa kiina awwaadonaa keese liiransummuuyyi hee'onaa ki googo iina losise; ku minaadabim ki minaadab ihukkisa sawwihe» yukko.

¹⁴Waa'im «An kiinninne maqire maroommo; keesem usheexxisoommo» yukko.

¹⁵Muse'em «At niinninne maqire fittoobeelas neesem ka beyyiinsi fissititte.

¹⁶At niinninne maqire fittoobee'an ihulas eesennee ki minaadabannee liirantittan ihukkisa mulli manni hinkid la'eena xanookko? Uulli minaadab hundiinsim neese annanni issookkok at niinninne maqire hee'immayyonnihe?» yaa dabarukko.

¹⁷Waa'im Muse'ena «An keese ki summinnem la'oommi bikkinaa keesennem liiramummi bikkinaa at xa'mmitoo luwwi hundam kiina issoommo» yukko.

¹⁸Muse'em Waa'ina «He'i ki lomba iina moo'ise» yukko.

¹⁹Waa'im «An i eroomma hundam ki illaginne higoo'isa issoommo; an Waa'i ihummisam ki illagenne i summa alallaatoommo; haafoommaannina hundinam haafoommo; qishixxoommaanninam an qishixxoommo.

²⁰Ihukkaarem manni eese moo'aa hee'eena xanoobee'i bikkina at i illi kollo moo'lleena xantooyyo.

²¹Ihukkaarem ka beyyonne i gadanonne at uullitoo sifo'i kin yookko.

²²Iikki lombi eeheen higoo ammane keese sifo'i ki'n fonqoqanne maaxoommo; higeembe'em i anga ifiisoommo.

²³Ee lasage atim iikka illaqqi kolli ihoo'n afa'l kollo moo'llootto» yaa dabarukko.