Read Hadiyya Dooyyi Kitaaba 34 Bible Online

Dooyyi Kitaaba 34 - Hadiyya bible

Dooyyi Kitaaba 34

¹Waa'i Muse'ena «Luxxaanni'nno'i lam ki'n ba'lluwwa cabbattaa gudise; anim at iiqqitti ba'lluwwanne hee'u sagara kitaaboommo.

²Sooxxi dara baqitem guddaa Siina'i duunanne fittaa i illagenne uulle.

³Kiinninne maqire ayyim firoone; te'im duu'nnaannonne hinki beyyonnem ayyi manchim moo'amoone; gereebbii fella'ii hinki fooraam diinatim duu'n lugumonne allaa'lloone» yukko.

⁴Ee bikkina Muse'e lam ki'n ba'lluwwa illagee'nnaannisam gudisaa Waa'i ixxo ijaajukkisannem la'm balla daram ee lamem ki'n ba'lluwwa amadaa Siina'i duunanne firukko.

⁵Waa'im duubinne dillaa ixxenne uullaa «An Moollanni Waa'a!» yaa ixxi keesammi summa la'isukko.

⁶Waa'im Muse'e illaginne higukkuuyyi «An Waa'i qishixxoommanee haafoommanee; an quunqina gaaggaaboombee'ane; iikki heer heerina hee'oo iittii amma'nnamaammoohaannoomii lobakata.

⁷Iikka heer heerina hee'oo iittom lobakat kum qaranchi afeebe'e egeroommo; boqqoomaa baaxiiloo hundam haafoommo; ihukkaarem saxxi qaranchiinsi soo'l qaranchi afeebe'e anno'i baaxii'l bikkina ooso guzumo'oo'n cawwaa uroommoyyo» yaa alallaatukko.

⁸Muse'e ee ammanenne heeshaa otossaa

⁹«I Moollanni Waa'a! An ki illagenne nuura siidaammoolas at niinninne maqire edantaa fittona uunxoommo; ka minaadabik wodan duudaakkoohane; ihukkaarem at ni baaxiiloo ni jollee hundam haafihe; ki gaqqi minaadab issitaahim neese moo'e» yukko.

¹⁰Waa'i Muse'ena «Oono'o, an Isra'eelinne hidi'l sagara aagoommo; kanniinsi illageen uullanne ihaa la'amoobee'i maalalsiisoo mare'e ki minaadabina moo'isoommo; ee baddisoo maalalsiisoo aganna ki kululleetanne hee'oo minaadab hundim moo'ookko.

¹¹An kaballa ki'nnuwwina uwwoommi ijaajo hundam egellehe; an Amoore'ika, Kana'aa'nneka, Hiite'ika, Faarze'ika, Hiiwe'ikaa Iyyaabuusikaa minaadaba ki'nnuwwi illagiinsi holloommo.

¹²Ki'nnuwwina qaash ihoo bikkina mattakkam uullanne hee'oo minaadabinne matem hidi'l sagaram aaggakkotte.

¹³Ihukkaarem ixxuwwika kitima hincaa'llam beyyuwwaa otossitam beyyuwwaa gindansehe; Asheera yakkam qophpha'n waa'i misilam iiqansitakka'a ubbuussehe.

¹⁴«An Waa'i to'achchoomman ihummi bikkina iinniinsi bagaan mulli waa'ina otossitakkotte.

¹⁵Qophpha'n waa'uwwina otossitam ammanee kitima hincaa'llam ammanee ki'nnuwwim ee'isa issitakkona ki'nnuwwa xa'mmimminne ee waa'uwwina hincaa'llam hurbaata ittakkona ki'nnuwwa keentam bikkina ee uullanne hee'llam minaadabinne hore'em hidi'l sagara aaggakkotte.

¹⁶Ki'nnuwwi goo'n oosinam ixxuwwi landa eebbakkotte; mashka'oomim oo landi ixxuwwi anno'i waa'uwwina otossitam ammane ki'nnuwwi oosim otossitamisa issitam bikkinatte.

¹⁷«Bukkamaa baxamoo waa'uwwa baxxakkotte.

¹⁸Gibxi uulliinsi fittakko'ok shaashshiqqi aganannetti ihu bikkina maarag hundam Qorosho'i Uguda lonsehe; an ijaajummisannem lamar balla ursho'i bee'i qorosho'o ittehe.

¹⁹«Mannikii fooraam diinaxxekii won ihaa qaramoo goon hundim iihane.

²⁰Ihukkaarem hallichchi wona gereechchi ambulinne dabassitakkeena xantakkamo; dabassitakkeena xantakkambee'an ihulas axo booqaaqqehe; won ihaa qaramu goo'n oosina hundinam tisso miqqehe. «Ayyi manchim i illagenne kora'i anga hincoone.

²¹«Loh balla ki'nnuwwi baxo baxxehe; abuulli aganannettem ihukko te'im hurbaata wixxaa'akkam agananne lama'l ballanne usheexxehe.

²²«Arasa murimma asheettakkam ammane Hurbaata wixxaa'immi Uguda lonsehe; ee'isam hiinchi lasaanchonne haqqi misha wixxaa'llakkam ammane Daas Uguda lonsehe.

²³«Hiinchonne sas ammane ki'nnuwwik goon hundim iina Isra'ee'l Moollanni Waa'ina otosseena waarona.

²⁴Mulli minaadaba hundam hollaa ki'nnuwwi hee'llakkam uulla haraassoommo; ee sasem ugudduwwam lonsitakkeena i kolli hincitakkam ammanenne ki'nnuwwika uulla qaseena ayyim mixooyyo.

²⁵«Iina diinaxxi kitima hincaa'llakkam ammane xiiga ursho'i yoo qorosho'inne maqire hincaa'llakkotte; Shaashshiqqi Ugudina duramu diinaxxi maa'lleka mat luwwam darina dissitakkotte.

²⁶«Hiinchina hiinchina ki'nnuwwi hurbaaxxi atooxxeka ludo ki'nnuwwi Moollanni Waa'i Mine eebbehe. «Gereechchanem ihukko te'im fellakkichchi wotara ixxi am adinne maqire eddakka'a sattakkotte.

²⁷«Kiinninnettem ihukko Isra'ee'l minaadabinne maqire hidi'l sagara aagoommok ka saga'llisinnette ihu bikkina ka sagara kitaabanne kitaabe» yukko.

²⁸Muse'em maham itoo'nnii agoo'nnii Waa'inne maqire sor ballaa sor hiimoo higisukko; Waa'im lamem ki'n ba'lluwwannem hidi'l sagalluwwi ihu tommem ijaajom kitaabukko.

²⁹Muse'e lamem ki'n ba'lluwwam ixxi anganne amadaa Siina'i duuniinsi dillu ammane Waa'inne maqire atooraraa hee'u bikkina ixxek illi kolli lobakata belecce'am hee'ukko; ihukkaarem ixxi eekka la'ukkoyyi hee'ukko.

³⁰Aaroonii Isra'ee'l minaadabii hundim Muse'e moo'lla'a ixxek illi kolli lobakata belecce'am hee'u bikkina ixxi kollonne hincimma baddito'o.

³¹Ihukkaarem Muse'e ixxuwwa weeshukko. Aaroonii minaadaphphi awwonsaanii ixxi kolli hincito'aare atoorassukko.

³²Ee lasage Isra'ee'l minaadab hundim Muse'e kolli hincito'o; Muse'em Waa'i ixxena Siina'i duunanne uwwu Seera hundam ixxuwwina uwwukko.

³³Muse'em ixxuwwinne wocimma guullaa lasage ixxi ille shaashshinne gunguu'llukko.

³⁴Ixxim Waa'inne atoorareena Keesammi Dukkaa'n woro aagoo amman hundam ee shaashsha illiinsi hooram hee'ukko; ee beyyiinsi firoo ammane Waa'i ixxo ijaaju luwwi hundam Isra'ee'l oosina kuram hee'ukko.

³⁵Isra'ee'l minaadabim Muse'ek illi kolli caakkaa moo'llam hee'llo'o; ee bikkina Muse'e Waa'inne atoorareena daba'llaa mareebe'i afeebe'e ixxi illenne shaashsha gunguu'llam hee'ukko.