Read Hadiyya Dooyyi Kitaaba 35 Bible Online

Dooyyi Kitaaba 35 - Hadiyya bible

Dooyyi Kitaaba 35

¹Muse'e Isra'ee'l minaadaba hundam weeshaa «Waa'i ki'nnuwwi egettakkona ijaaju seer

²‹Ki'nnuwwika baxo hundam loh ballanne baxxehe; ihukkaarem lama'l balli Waa'ina keesamaakkoohan ihu bikkina usheexxehe. Ee ballanne ayyi baxom baxoo manchi lehinne guzumo'amona.

³Ee bikkina usheexxaxxi ayyaamonne ki'nnuwwi minenne giiram ihuta'n giittakkotte› yoohane» yukko.

⁴Muse'e Isra'ee'l minaadabina hundinam Waa'i ki'nnuwwa

⁵«Ki'nnuwwina yoo amaxxi hundiinsim Iina Waa'ina kitima hincaa'llehe; hincaa'eena hasookkok hundim ixxi wodanonne sawwukkisinne worqa, kin bira, naas xaara,

⁶shaano'o, kuula, kashara, talbiinsi muuncamaakkoo danaam fatira, fella'i odda,

⁷kashar qalam labamaakkoo gereechchi ambu'l cukkamaakkoo omachcho, hirfana, giraa'l haqqa,

⁸caakkina ihoo wee'l zayta, labakkam wee'l zaytinaa danaamisa enje'oo aduruusinaa ihoo annanni annanni enjaa,

⁹Eefuudinaa biq kiisinaa ihoo aduu'n ille laboo bito xee'aalli kinneewwaa eebbehe› yaa ijaajaakko» yukko.

¹⁰«Ki'nnuwwi lambe'enne yo'i anga qoor manni hundim Waa'i ijaaju hinki baxom baxxeena waattona.

¹¹Oohim Keesammi Dukkaana, haninnee worinnee edakka'a ambakkam keeno, amaxxansaano, saanquwwa, laqqo'uwwa, nottolluwwa, lokkuwwa,

¹²Hidi'l Saga'l Saaxina, iyyakkam wonnannuwwa, haafixxi ifiishshaanchoo Hidi'l Saga'l Saaxina ifiisakkam du'm eddechchaa,

¹³xaraphpheeza wonnannuwwinnemii ixxonne hee'oo mu'uttuwwa hundamii, ee'isam Waa'ina hincoo keesamaakkoo daabbo'oo,

¹⁴caakka dissakkam mu'utaa, eehanninam awwaadoo mu'uttuwwaa, kuraazaa wee'l zaytinne maqirem

¹⁵aduruusa wiriissakkam kiti'm mu'utaa ixxom iyyakkam wonnannuwwaa, laphphakkam keesammi wee'l zayta, danaamisa enje'oo aduruusa, dukkaa'n gooc du'm eddechcha,

¹⁶kitima shokkiisakkam kiti'm mu'uta, naas xaarinne baxamaakkoo illaanchi'nnoo'i mu'utinne maqirem ixxo iyyakkam wonnannuwwaa eehannina awwaadoo mu'uttuwwa hundamii, aanshaqqakkam saahinaa eekka dissakkam mu'utaa,

¹⁷wixxixxi beyyi du'm eddechcha, ixxo saqalakkam nottolluwwaa ee kee'n lokkuwwaa, wixxixxi beyyi gooc du'm eddechcha,

¹⁸Keesammi Dukkaa'nnekaa wixxixxi beyyi xiribbuwwaa eehanni usseewwaa,

¹⁹qeessuwwi keesamaakkoo beyyonne awwaaddam ammane edde'llam haarrinne wereeggaakkoo eddechchuwwaa oohim qeessichchi Aarooninaa ixxi goon oosinaa keesammi eddechcha daddona» yukko.

²⁰Ee lasage Isra'ee'l Minaadab hundim Muse'e beyyiinsi elle'llo'o.

²¹Annannichchim ixxi gaqqi wodanonne sawwukkisinnee liiramukkisinnee Keesammi Dukkaa'n baxina, ee beyyi awwaadinaa qeessuwwi eddechchinaa ihoo luwwa Waa'ina uwwukko.

²²Uwweena hasukkok hundim goonii meentii annannichchim sanenne issakkam wereeggi luwwa, macci worqa, angi quba'a, gaanji worqaa mulli wereeggi worqaa Waa'ina keesukko.

²³Ee'isam shaano'i fatir, kuul fatir, kashar fatir, talbiinsi muuncamaakkoo danaam fatir, fella'i oddi, kashar qalam labamaakkoo gereebbi ambulluwwi omachchii cukkamaakkoo omachchii yoo keen hundim eebbo'o.

²⁴Kin bira te'im naas xaaraa annanni annanni awwaadina ihoo giraa'l haqqaa uwweena xanoo manni hundim eebaa Waa'ina uwwukko.

²⁵Qoor meenti anginne muuncu talbi danaam fatira shaano'o, kuulaa kashar fatiraa eebba'a uwwito'o.

²⁶Odim angi qooroom yoo mulli meenti ixxuwwi wodan liiramukkisine fella'i oddinne fatira muuncita'a gudisso'o.

²⁷Awwonsaanim eefuudannee biq kiisannee issakkam aduu'n ille laboo kina bito xee'aalli kinaa mulli bito xee'aalli kinneewwaa eebbo'o.

²⁸Caakkinaa laphphimminaa ee'isam danaamisa er enji yoo aduruusinaa ihoo annanni annanni enjaa wee'l zaytaa eebbo'o.

²⁹Isra'ee'l minaadab Goonii meentii hundim Waa'i Muse'ena ijaaju baxina hara'mmoo luwwa ixxuwwi wodanonne Waa'ina uwwiteena sawwito'isinne eebbo'o.

³⁰Muse'e Isra'ee'l minaadabina «Waa'i Yihuxxi sulliinsi Huur beetina beeto, Uur beet Baasili'eela doo'llaakko.

³¹Waa'i ixxi Ayyaana ixxonne wonshaa luwwi hundam baxeena xanoo'isina angi qoorooma, mixxeellano, lachcha, qoossimmaa uwwaakko.

³²Ixxim qooroo'm baxo worqinne, kin birinnee naasinnee baxoo bax hundam mixxeellanninne baxoo'isina lachcha uwwaakko.

³³Ixxim inqu yakkam bito xee'aalli kininne wereeggisonaa haqqi mu'uta baxxonaa ee'isam mulli qooroo'm baxom baxonaa lachcha uwwaakko.

³⁴Ixxenaa Daan sulliinsi Ahisaamaak beet Ohoolii'aabinaa angi lachchika qoorooma mulli keenina losissamisina lachcha uwwaakko.

³⁵Xaa'l mu'uta baxxam keeninne, baxo sheeqqattam keeninne, shaano'inne, kuulinne, kashar fatirinnee talbi danaam fatirinnee dadakkam eddechchaa mulli baxoo qooroominne baxakkam mulli luwwi hundam wereeggisseenaa sheeqqatteenaa xantam lachcha ixxuwwina uwwaakko.