Read Hadiyya Dooyyi Kitaaba 36 Bible Online

Dooyyi Kitaaba 36 - Hadiyya bible

Dooyyi Kitaaba 36

¹«Baasili'eelii Ohooli'aabii Waa'i lachchaa qooroomaa uwwu mulli mannii Keesammi Dukkaa'n baxina hasisoo luwwi hundam Waa'i ijaajukkisanne baxxamo» yukko.

²Muse'e Baasili'eela, Ohooli'aaba, Waa'i annanni lachcha uwwu keenoo baxo hara'mmiteena liirantam qoolluwwaa weeshaa baxo asheettamisina kurukko.

³Ixxuwwim Keesammi Dukkaa'n baxina Isra'ee'l minaadab uwwito'i luwwa hundam Muse'eensi aa'llo'o; ihukkaarem Isra'ee'l minaadab Waa'ina uwwitam luwwa Muse'e beyyo darina darina eebimma utto'oyyi hee'ukko.

⁴Ee lasage anga qoolluwwi keen hundim baxo utta'a Muse'e beyyo matta'a

⁵«Minaadab Waa'i ijaaju baxina hasisoohaanniinsi hanaan hore'em lobakkat luwwa uwwiteena eebbamuulla» yito'o.

⁶Ee bikkina Muse'e keesamaakkoo dukkaa'n baxina ihoo luwwa kanniinsi eehid minaadab uwwiteena eebbambee'isa hegeeg hundannem ijaajo higisukko; ee lasage minaadab uwwitam luwwa eebimma utto'o.

⁷Mashka'oomam uwwakko'i luwwi baxo hundam baxakkeena ihaa gatooqux hee'ukko.

⁸Ee baxo baxxam keeniinsi hore'em lobakata qoolluwwi hee'llo'i keen talbi danaam fatirinne shaano'inne, kuulinnee kashar fatrinnee kiruubee'l misila axisakka'a baxakko'oo tommi du'm eddechchinne keesamaakkoo dukkaana baxxo'o.

⁹Ee du'm eddechchuwwik qeeraa'lloom lamiyyee sadeenti angaa midaad odim soor angi ihaa hundim gudaanchi hee'ukko.

¹⁰Ixxuwwim ontooma mat kollonne mulli onto odim mulli kollinne mat issita'a gobbo'o.

¹¹Mat issita'a gobbo'i du'm eddechchi kasanne shaano'i hagar fatirinne axissa'a daddo'oo quba'uwwa issito'o; mulli kollonne mat ihaa gobamu du'm eddechchannem mataanni kasanne ee'isam issito'o.

¹²Luxxi mi'nnaannonne luxxi du'm eddechchanne ontayyi quba'aa ee'isam la'm mi'nnaannonne lasaanchi du'm eddechchanne mulli quba'uwwaannonne illagenne ihoo ontayyi quba'aa issito'o.

¹³Lamem kolli du'm eddechcham mat issita'a amadiisseena awwaadoo worqinne baxamaakkoo ontayyi qapha baxxo'o.

¹⁴Dukkaanina ifiishshaanchi ihoo tommoo mat du'm eddechchaa fella'i oddinne dadamaakkoo eddechchaa gudisso'o.

¹⁵Oo du'm eddechchuwwi hundim gudaanchi ihaa annannichchikim qeeraa'lloomii sad anga dufaachchoomii soor anga hee'ukko.

¹⁶Ontooma mat kollonne lohooma odim mulli kollonne issimminne mat issita'a gobbo'o.

¹⁷Luxxi minenne yoo lasaanchi du'm eddechchi kasanne ontayyi quba'a la'm baxxanchi du'm eddechchi kasannem ontayyi quba'a issito'o.

¹⁸Lamem kollonnem yoo du'm eddechcha mat issita'a mat ifiishshaancho axisseena ontayyi qapha naas xaarinne baxxo'o.

¹⁹Biiree'n kollinne ifiishshina ihoo du'm eddechchuwwiinsi mato gereechchi ambu'l kashar qalamanne cefakko'oo omachchinne la'mmekam duugamaakkoo hirfaninne mulli lam du'm eddechcha baxxo'o.

²⁰Ee Keesammi Dukkaana uullisimmina xabbeen xarbuwwa giraariinsi baxxo'o.

²¹Ee xarbuwwik qeeraa'lloom tommi anga midaad mat angaa kolloo hee'ukko.

²²Ee dukkaa'n xarbuwwa hundam lam lamo mat issakka'a amadiisimmina awwaadoo shobakka'a axisakko'oo lam lam lokkuwwi hee'ukko. Keesammi Dukkaa'n xarbuwwina hundinam ee'isam issito'o.

²³Dukkaaniinsi woroo'n qarinne lamiyyi xarbuwwa issito'o.

²⁴Lamiyyem xarbuwwi lugumonnem xaarinne baxxo'oo sor lokkuwwa issito'o; ee'isam lam lam xuffeewwa mat issita'a amadiissam lam lam lokkuwwi hee'ukko.

²⁵Dukkaa'n la'm kollinam hanaa'n qarinne lamiyyi xarbuwwa issito'o.

²⁶Ee xarbuwwi lugumonne annannichchonnem lam lam lokko issimminne xaarinne baxamaakkoo sor lokkuwwa issito'o.

²⁷Dukkaaniinsi afareen eelliinchi aaggi kollinne loh xarbuwwa issito'o.

²⁸Dukkaa'n afaree'n kollinne yoo lamejjuwwinam lam lam xarbuwwa baxxo'o.

²⁹Oo lamejjuwwanne yo'i xarbuwwim lugumiinsi ki'isaa jagiiranne afeebe'e mat guma'inne amaxxanto'oo keen hee'llo'o; lamem lamejjuwwannem yo'i xarbuwwi baxxanto'ok ee'isinnetti hee'ukko.

³⁰Ee bikkina xarbuwwina annannichchinam luguminne lam lam lokki yoohan ihaa sadeenti xarbuwwii xaariinsi baxamaakkoo tommii loh lokkuwwii yoohan hee'ukko.

³¹Tommoo onti laqqo'uwwam giraa'l haqqiinsi baxxo'o; ee'isinne ontoom baxanto'ok Keesammi Dukkaa'n mat kollinne yo'i xarbuwwinatti ihaa

³²ontoom odim mulli kollinne yo'i xarbuwwinatti ihukko; ee'isam ontoom Keesammi Dukkaa'n eelliinchi aaggi kollinne ihoo'isina baxxo'o.

³³Ee xarbuwwi midaaxxi kollinne lambe'enne yoo laqqo'i ee Keesammi Dukkaa'n mat kas ludiinsi ki'isaa mulli kas lud afeebe'e afam hee'ukko.

³⁴Ee xarbuwwam worqinne goolabbo'o; guma'uwwam laqqo'uwwa aagisakkamisina worqinne baxxo'o; laqqo'uwwim worqinne goolabamaakkoohan hee'ukko.

³⁵Du'm eddechcham talbi danaam fatirinne daddo'o; oohim shaano'inne, kuulinnee kashar fatirinnee dadamaakkoohan ihukkuuyyi ee du'm eddechchanne mixxeechchisa baxamaakkoo kiruubee'l misil hee'ukko.

³⁶Ee du'm eddechchinam soor nottolluwwa giraa'l haqqinne baxxa'a worqinne goolabbo'o; ee nottolluwwannem sinxilluwwa worqinne baxxo'o; nottolluwwi uulloo soor lokko kin birinne baxxo'o.

³⁷Keesammi Dukkaa'n goocina talbi danaam fatirinne, shaano'i fatirinne, kuul fatirinnee kashar fatirinnee gobakka'a wereeggisakko'oo du'm eddechcha daddo'o.

³⁸Ee du'm eddechchina sinxilluwwi yoo onti nottolluwwa baxxo'o; ee kee'nnekam goobinaanchoo meeggaro'uwwaa worqinne goolabbo'o; nottolluwwinam uullisakkam onti lokko naas xaarinne baxxo'o.