Read Hadiyya Dooyyi Kitaaba 37 Bible Online

Dooyyi Kitaaba 37 - Hadiyya bible

Dooyyi Kitaaba 37

¹Baasili'eelim giraa'l haqqinne Hidi'l Saga'l Saaxina baxukko; ee saaxi'nnekim qeeraa'lloom lam angaa kolloo dufaachchi mat angaa kolloo uullichchim mat angaa kolloo hee'ukko.

²Hanee woroo danaam worqinne goolabukko; kululleetannem worqi goobinaancho issukko.

³Soor worqi guma'a baxaa lamo mat kollinne lamo odim mulli kollinne issaa ee saaxi'n soorem lokkonnem issukko.

⁴Wonnannuwwam giraa'l haqqinne baxaa worqinne goolabukko.

⁵Ee wonnannuwwam Hidi'l Saga'l Saaxina iyyimmina ee saaxi'n lamem midaadonnem yoo guma'uwwanne aagisukko.

⁶Qeeraa'lloom lam angaa kolloo dufaachchoomim mat angaa kolloo ihoo haafixxi ifichcho muccur worqinne baxukko.

⁷Lam kiruubeelam tumammi worqinne baxaa ee haafixxi ifichchi lamem kolli tochchonnem baxukko.

⁸Mat kiruuba ee ifichchi mat kolli tochchinne la'mmekam mulli kolli tochchinne baxukko. Ee kiruubam ifiishshaanchinne maqirem matfir issaa baxukko.

⁹Oo Kiruubbuwwi ixxuwwi lado iim biddiqaa'lla'a haafixxi ifichcho ladinne ifiissamisa issukko; ixxuwwim mat mato moo'aqqantaman ikka'a ifichcho aad illinne moo'llamisa issukko.

¹⁰Qeeraa'lloom lam anga, dufaachchi mat anga uullichchim mat angaa koolloo ihoo xaraphpheeza giraa'l haqqinne baxukko.

¹¹Muccur worqinnem goolabaa kululleetanne goobinaancho issukko.

¹²Odim haraaroom mat taachcho'o ihoo goobinaancho eehanni kululleetanne issukko; ee goobinaanchi kululleetam worqinne goolabukko.

¹³Ee xaraphpheezinam soor worqi guma'uwwa baxaa soorem lokkim kaaxxu soorem lamejjannem issukko.

¹⁴Xaraphpheeza iyyakkam wonnannuwwa aagisakkam guma'uwwam ee tochchi goominaanchi gadanonne issukko.

¹⁵Oo wonnannuwwim giraa'l haqqinne baxamaa worqinne goolabamaakkoohan hee'ukko.

¹⁶Xaraphpheezanne hee'oo mu'uttuwwa muccur worqinne baxukko; oo keenim saahinnuwwa, wocittuwwa, cilfuwwaa woyi'n diqaasa inkiirakkam maqorqoro'uwwaa hee'ukko.

¹⁷Caakka dissakkam mu'utam muccur worqinne baxukko; ixxekam lugumoo amaa worqa tumaa axisukko; ludo gurumbaa fiitaa wereeggina ihona matfir issaa baxukko.

¹⁸Mat kollinne saso la'm kollinnem saso issaa lamem kollinnem loh caafa baxukko.

¹⁹Lohem caafannem gurumbinnee fiitinnee maqire lawuz fiita laboo sas gurumbi mat kollaannonne sas odim mulli kolli caaffuwwanne hee'ukko.

²⁰Ee'isam gurumbi, fiitii lawuz fiita laboo soor ludduwwii ee mu'utanne hee'ukko.

²¹Lohem caaffuwwi lugumonnem lam caaffuwwi mat ihaa exxoo lugumonne annannichchaannonnem gurumbi baxamaa hee'ukko.

²²Gurumbuwwii oo caaffuwwii ee caakka dissakkam mu'utinne matfir hee'ukko; hundim muccur worqi tumamaa baxamaakkoohane.

²³Ee caakka dissakkam mu'uxxi lamarem caaffuwwam, gii'l buchcha giggissakkamokaa eekkam dissakkam mu'utaa muccur worqinne baxukko.

²⁴Ee caakka dissakkam mu'utaa ixxenne maqire awwaaxxakkam mu'utaa hundam sadinnee onti kiilo'i giraam worqinnee baxukko.

²⁵Qeeraa'lloom mat anga, dufaachchim mat anga, uullichchi odim lam anga ihoo aduruusa wiriissakkam kiti'm beyyo giraa'l haqqinne baxukko; soorem ejjo'onnem yoo buudduwwim eehanninne maqirem matfir ihaa baxamaakkoohan hee'ukko.

²⁶Hane, hundem midaadduwwaa buudduwwaa muccur worqinne goolabukko; kululleetannem worqinne gooinaanch issukko.

²⁷Ee goobinaanchi worinne iyyakkam wonnannuwwa aagisakkam lam worqi guma'uwwa lamem midaadinnem baxukko.

²⁸Ee wonnannuwwam giraa'l haqqinne baxaa worqinne goolabukko.

²⁹Keesamaakkoo laphphakkam zaytaa er enji yoo danaam aduruusaa mixxeellaninne baxukko.