Read Hadiyya Dooyyi Kitaaba 39 Bible Online

Dooyyi Kitaaba 39 - Hadiyya bible

Dooyyi Kitaaba 39

¹Keesammi beyyi awwaadina ihoo eddechcha shaano'inne, kuulinne, woyi'n misha laboohaanninnee kashar danaam talbi fatirinnee daddo'o; Waa'i Muse'e ijaajukkisannem Aarooninam keesammi eddechcha daddo'o.

²Eefuudam worqinne, shaano'inne, kuulinnee kashar talbi danaam fatirinnee daddo'o.

³Worqam tumta'a caraqissa'a lasage fati'llisa issita'a muransita'a shaano'inne, kuulinne, talbi danaam kashar fatirinnee muuncita'a wereeggissa'a daddo'o.

⁴Eefuuda lamem gudumonnem amadiisimminaa lamadonne lade'imminaa awwaadoo lam xixxaabam daddo'o.

⁵Waa'i Muse'e ijaajukkisinnem worqinne, shaano'inne, kuulinnee kashar muuncamaakkoo talbi danaam fatirinnee wereeggisimminne dadamaakkoo matfir sabbata eefuudinne mat issita'a baxxo'o.

⁶Bito xee'aalli kinam worqi gurumbi goobinaanchinne gammalta'a eehannonne koobo'isa Isra'ee'l oosika summa koobbo'o.

⁷Ee kinneewwam Waa'i Muse'e ijaajukkisannem Isra'ee'l ooso tiissiisoohan ihoo'isina eefuuda karakkam gudu'm xixxaabanne issito'o.

⁸Biq kiisam anigne qoor manni baxoohaannisa issita'a baxxo'o; eefuuxxisam worqinne, shaano'inne, kuulinne, kashar fatirinnee talbi danaam fatirinnee wereeggissa'a baxxo'o.

⁹Oo kiisim lam qinxitii soor lamejjii yoohan ihaa uullichchi mat taachcho'o midaadim mat taachcho'o hee'ukko.

¹⁰Ee'isam ee kiis soorem ogorannem bito xee'aalli kiniinsi goobinaancho issito'o; luxxi ogoranne boobeet kashar kina, diqaasa laboo bito xee'aalli kina, inqu yakkam belecce'oo kina,

¹¹la'm ogoranne sandaab kina, cuquluusa laboo kina, aduu'n ille laboo kina,

¹²saxxi ogoranne sandaab kina, heemachchi lab shaano'i kina, kuul kina,

¹³soo'l ogoranne shaano'i kina, aduu'n ille loboo kinaa gaga moo'ixxa laboo shaano'i kinaa issito'o; ee kinneewwa hundam worqi gurumbi goobinaanchinne gammalto'o.

¹⁴Tommonnee lamem bito xee'aalli kinneewwanne annannichchonnem tommoo lamem Isra'ee'l oosoo tiirimmina mat kinanne mat summi koobamaa hee'ukko.

¹⁵Biq kiisinam xixxaabisa dadamaakkoo cora danaam worqinne baxxo'o.

¹⁶Lam worqi gurumbi goobinaanchuwwaa lam worqi guma'uwwaa baxxa'a lamem guma'uwwam biq kiisiinsi hanaan yoo amejjuwwinne amaxxansito'o.

¹⁷Lamem worqi corim ee biq kiisaannonne lamem tochchonnem yoo guma'uwwinne maqire amaxxamoo'isa issito'o.

¹⁸Lamem co'llekam mulli kolli ludo lamem gurumbi goobinaanchinnem amaxxansito'o; ee'isinne cekkinne dilloo eefuuxxi xixxaabinne illagee'n kollinne amaxxamoo'isa issito'o.

¹⁹Odim lam worqi guma'uwwa baxxa'a eefuudiinsi awwonaa yoo biq kiis woroo'n saninne woro'l lam kasanne amadiisso'o.

²⁰Odim lam guma'a worqinne baxxa'a cekkinne aad illagee'n kollinne calcaloo eefuuxxi xixxaabbuwwanne woroo'n kollinne amaxxansito'o; oo keenim amaxxanto'ok anginne wereeggisakka'a dadakko'i sabbatii eefuudii edantam beyyonnette.

²¹Waa'i Muse'e ijaajukkisannem biq kiisanne yoo guma'uwwi eefuuxxi guma'uwwinne mat ihaa shaano'i fatirinne karamaahii biq kiis guma'i lamadonne lade'akkam sabbatinne mat ihahii eefuudinne exxoo bikkina heekke'ooyyo.

²²Eefuuxxi hanenne edde'akkam qambiis hundoomim dadamukkok shaano'i fatirinnette hee'ukko.

²³Ee qambiis lambe'ennem gaanje aagisakkam beyyi hee'ukko; dereeramoobee'isam gammalamaakkoohan hee'ukko.

²⁴Qambiisoo'm woroo'n kasanne shaano'inne, kuulinnee talbi danaam kashar fatirinnee roomaa'n misha laboo wereegga issito'o.

²⁵Danaam worqinnem doola baxxo'o; ee doolam qamis kas kululleexxi roomaa'n misha laboo wereeganne issito'o.

²⁶Waa'i Muse'e ijaajukkisannem ee doolaa roomaa'n misha laboo wereeggaa qambiis kas kululleetanne awwonansita'a issito'o.

²⁷Aarooninaa ixxi oosinaa kanniinsi woroon yoo eddechcha gudisso'o; oohim talbi danaam fatirinne shamiizzuwwa,

²⁸horoorenne xaaxakkam shaashshuwwa, guufo'uwwaa sure'uwwaa daddo'o.

²⁹Ee'isam Waa'i Muse'e ijaajukkisannem sabbattuwwa shaano'inne, kuulinnee kashar talbi danaam fatirinnee wereeggissa'a daddo'o.

³⁰Keesammoo'm mare'em muccur worqinne baxxa'a «Waa'i awwaadina keesamaakkoohane» yoo sagara koobo'onne kitaabamu kitaaphphisa koobbo'o.

³¹Eekkam Waa'i Muse'e ijaajukkisannem shaashshi hanenne illagee'n kollinne shaano'i fatirinne katto'o.

³²Ee lasage keesammi dukkaa'n bax hundim beeddukko; Isra'ee'l minaadab hundem luwwam Waa'i Muse'e ijaajukkisanne issito'o.

³³Ee lasage kanniinsi woroon yoo mu'uttuwwa hundam Muse'e beyyo eebbo'o. Dukkaanaa awwaaxxakkam mu'uttuwwaa oo keenim meeggaro'uwwa, xuffeewwa, laqqo'uwwa, nottolluwwa lokkuwwa,

³⁴dukkaananne ambakkam kashar qalam labamaakkoo gereechchi ambu'l omachchoo cukkamaakkoo omachchoo, daphphaa'akkam du'm eddechcha,

³⁵Hidi'l Saga'l Saaxina, iyyakkam wonnannuwwa, haafixxi ifiishshaancho, daphphaa'immina dadamu du'm eddechcha,

³⁶xaraphpheeza, ixxenne awwaaxxakkam mu'uttuwwa hundam, keesammi daabbo'o,

³⁷muccur worqinne baxamaakkoo caakka dissakkam mu'uta, ogoranne dissamaakkoo kuraazzuwwaa awwaaxxakkam mu'uttuwwaa, caakkina awwaadoo zayta,

³⁸worqinne baxamaakkoo kiti'm mu'uta, keesammi labakkam zayta, enje'oo aduruusa, Keesammi Dukkaa'n gooc du'm eddechcha,

³⁹naas xaarinne baxamu kiti'm mu'uta, calcaloo illaanchi'nnoo mu'uta wonnannuwwaa eehannina awwaadoo mu'uttuwwaa, aanshaqqakkam saahinaa dissakkam mu'utaa,

⁴⁰wixxixxi beyyi du'm eddechcha, eehanni belluwwaa uullisakkam lokkuwwaa wixxixxi beyyi gooc du'm eddechcha, usseewwa, dukkaana kaasakkam xiribbuwwa, Keesammi Dukkaa'n woronne awwaaxxakkam mu'uttuwwaa

⁴¹qeessichchi Aaroonii ixxi goo'n oosii keesamaakkoo beyyonne qeessoomaninne awwaaddu'uuyyi edde'llam keesammi danaam qeessooma'n eddechchaa hee'ukko.

⁴²Isra'ee'l minaadab Waa'i Muse'e ijaajukkisanne hundem luwwam baxxo'o.

⁴³Muse'em hundem luwwam saarayyaa Waa'i yukkisanne baxxo'isa qoossukko; ee bikkina Muse'e ixxuwwa maasse'ukko.