Read Hadiyya Dooyyi Kitaaba 4 Bible Online

Dooyyi Kitaaba 4 - Hadiyya bible

Dooyyi Kitaaba 4

¹Muse'e Waa'ina «Isra'ee'l minaadab ‹Waa'i kiina moo'amukkoyyo› yita'a amma'nnitobee'aare te'im i woshsha aa'llobee'aare ixxuwwina mayyoommo?» yukko.

²Waa'im «Ki anganne amadditti luwwi maha?» yukko. Ixxim «Bicco» yukko.

³Waa'im «Uullanne ubbuuse» yukko. Muse'em ee bicco uullanne ubbuusu ammanenne oo bicci hamashshichchi ihukko. Muse'em ee hamashshichchiinsi gibukko.

⁴Ihukkaarem Waa'i Muse'ena «Sheerimo amade» yukko. Muse'em sheerimo amadu ammanenne daba'llaa bicci ihukko.

⁵Waa'im «Gaassi ixxuwwi anno'ina Abrihaamina, Yisaaqinaa Yaaqoobinaa Waa'i ihummi Moollanni kiina moo'amummisa Isra'ee'l minaadab ka mare'e moo'lla'a amma'nnitamo» yukko.

⁶Waa'i odim Muse'ena «Ki anga kikkilonne aagise» yukko. Ixxim aagisukko; ixxi angam kikkiliinsi fissu ammanenne baraxxisa qadaallaa abballukko.

⁷Waa'im «Ki anga dabattaa kikkionne aagise» yukko. Muse'em ixxi anga kikki'l woronne aagisukko; dabaraa fissu ammanenne daba'llaa mulli orachchisam fayya'i ihukko.

⁸Waa'i odim «Oono'o, luxxi maalalsiisoo mare'e moo'lla'a Ki woshshi hanqa› yita'a aa'llobeelas la'm maalalsiisoo agannanne amma'nnitamo.

⁹Ka lamem maalalsiisoo mare'e moo'lla'a amma'nnitobeelasii ki woshsha aa'llobeelasii Abbaayyi daajjiinsi hoffi wo'om massitaa gogaalli uullanne dune; ee daajjiinsi massitaa uullanne duntitti wo'i xiig ihookko» yukko.

¹⁰Ihukkaarem Muse'e «He'i i Moollanna! Eese asse'llitte; at iinninne wocimma asheettitti ammaniinsi ki'isaatettem ihukko illageenim erisa wocaa la'oombee'isa laqqootto; an duda'aa wocaa la'oombee'anee» yukko.

¹¹Ee lasage Waa'i Muse'ena «Mannina wocoo suume uwwukkok ayyette? Duud te'im gawwi moo'oohan te'im moo'oobee'i qooq issookkokdu ayyette? Ka hundam issoommi Waa'i anetteyyonnihe?

¹²Ee bikkina kaba mare; an kiinninne ihaa at wocceena xantoo'isa issoommo; maha woccooda'em kuroommo» yukko.

¹³Muse'em «He'i i Moollanna! Mulli manna asse'e» yukko.

¹⁴Ee bikkina Waa'i Muse'enne lobakata quuqaa «Leewi'i sulliinsetti ihu kiyyabbaayyi Aaroon yookko. Ixxi woshsha erisa la'oohan ihukkisa la'oommo; oono'o; ixxim kaba ki beyyo waaroolla; keese moo'aatim lobakata liiramookko.

¹⁵Ka woshsha ixxena kuttaa wocoo luwwa losise; lamim danaamisa woccakkamisa issoommo. Issitakkam luwwam losisoommo.

¹⁶Ixxi keese bikkaa wocookko; ki summinnem ka woshsha minaadabina kurookko; atim eese Waa'a bikkitaa ixxena kuttootto.

¹⁷At maalalsiisoo mare'e ixxena moo'isseena ka bicco amaddaa mare» yukko.

¹⁸Muse'em ixxi balli Yootoor beyyo daba'llaa maraa «Gibxanne yo'i i moolli beyyo daba'llaa maraa foorinne yoda'e moo'eena xanoommisa isse» yukko. Yootoorim «Xummanne mare» yukko.

¹⁹Muse'e Miidiyaa'm uullanne hee'ukkuuyyim Waa'i ixxena «Keese shiteena hassam keen hundim leto'i bikkina Gibxi uulla daba'llitaa mare» yukko.

²⁰Ee bikkina Muse'e ixxi aree oosoo hallichchonne saa'llisaa Gibxi uulla mareena ki'ukko. Maalalsiisoo luwwi baxamoo Waa'i biccom ixxi anganne amadaa hee'ukko.

²¹Odim Waa'i Muse'ena «Kaba at Gibxi uulla daba'llitaa mattoo ammane kiina an uwwummi malaayyinne baxxoo maalalsiisoo mare'e Faari'oon illagennem baximma xadditte; ihukkaarem an Fari'oonika wodano duudisoommi bikkina minaadaba sholle'aallisinne fatakooyyo.

²²Ee ammane an Waa'i Fari'oonina wocoommoka ‹Isra'eel iina won qachcho.

²³Anim ku i won beet iina awwaadona fatakitoo'isina kurummo; ihukkaarem at mareena hoottitto; ee bikkina an kiikka won beeto shoommo› yaakko yitaa kuttootto» yukko.

²⁴Muse'e Gibxi uulla marukkuuyyi hiimo garu beyyonne Waa'i ixxo sheena hasukko.

²⁵Ihukkaarem ixxi meentichcho Siiphaara qare'aalli banca eebba'a is beeto ballachchito'o; ee ballachchito'i shurtinnem Muse'eka lokko[3] nakkita'a «Hanqinam at iina xiiqqi idaayyichcho» yito'o.

²⁶Waa'im Muse'ena qishixxukko. Isem «At iina xiiqqi idaayyichcho» yito'ok ballachcha'n bikkinatte.

²⁷Ee ammanenne Waa'i Aaroonina «Muse'enne exxiteena udma'i uulla mare» yukko. Ixxim maraa Muse'enne Waa'i duunanne edamaa suunqukko.

²⁸Muse'e Gibxa marona Waa'i ijaaju ammane ixxena kuru woshshaa lobakat maalalsiisoo mare'e moo'isona ijaajukkokaa hundam Aaroonina kurukko.

²⁹Ee lasage Muse'ee Aaroonii Gibxa matta'a Isra'ee'l awwonsaano mat beyyonne dummisso'o.

³⁰Aaroonim Waa'i Muse'ena kuru luwwi hundam ixxuwwina kurukko. Muse'em ee awwonsaa'n illagenne maalalsiisoo agannuwwa baxukko.

³¹Minaadabim amma'nnukko; Waa'im ixxuwwi bikkina sawwoohan ihukkisaa ixxuwwi u'nnam moo'ukkisaa macceesso'i ammanenne Waa'ina otossito'o.