Read Hadiyya Dooyyi Kitaaba 40 Bible Online

Dooyyi Kitaaba 40 - Hadiyya bible

Dooyyi Kitaaba 40

¹Waa'i Muse'ena

²«Luxxi agan aagu luxxi ayyaamonne Keesammi Dukkaana kaase.

³Hidi'l Saga'l Saaxina Dukkaa'n woronne dissitaa du'm eddechchinne daphphaa'e.

⁴Xaraphpheezam ee daphphaa'oo du'm eddechchiinsi biireen Hidi'l Saga'l Saaxi'n illagenne disse; caakka dissakkam mu'utam ee beyyonne dissitaa ixxi hanenne caakka caakkise.

⁵Aduruusa wiriissakkam worqinne baxamu kiti'm mu'uta ee beyyonne disse; ee Dukkaana aagakkam goocannem du'm eddechcha isse.

⁶Kitima shokkiisakka'a hincaa'akkam kiti'm beyyom Dukkaa'n goocanne disse.

⁷Aanshaqqakkam saahinam Keesammi Dukkaa'nnaannonnee kitima hincaa'akkam mu'uxxi lambe'ennee dissitaa wo'o wonshe.

⁸Wixxixxi beyyonnem kululaa'llaa du'm eddechcha isse; du'm eddechcham wixxixxi beyyi goocanne isse.

⁹«Ee lasage Dukkaanooma awwaaxxakkam mu'uttuwwinne maqirem keesammi zayta labbaa Waa'ina keesamaakkoohan isse; keesamaakkoohanem ihookko.

¹⁰Ee lasage kiti'm beyyo eehannina awwaaxxakkam mu'uttuwwinne maqirem keesammi zayta labbaa iina Waa'ina keese; hore'oomam keesamaakkoohan ihookko.

¹¹Aanshaqqakkam saahinam ixxo dissakkam mu'utinnem keesammi zayta labbaa iina Waa'ina keese.

¹²«Aaroonaa ixxi oosoo Dukkaa'n goocanne wottaa wo'inne aanshe.

¹³Aaroonina keesamaakkoo qeessooma'n eddechcham eddeessaa zayta labbaa qeessichchi ihaa iina awwaadona keese.

¹⁴Ixxi goo'n oosom wottaa qambiisa eddeese.

¹⁵Ixxuwwim qeessuwwi ikka'a iina awwaaddona Aaroona keesammi zaytinne labbittisam ixxuwwannem labe. Ixxuwwim iina annanni ikko'i bikkina waaroo doolli hundannem qeessuwwi ikka'a iina awwaaddamo» yukko.

¹⁶Muse'em Waa'i ijaajukkisa hundem luwwam issukko.

¹⁷Ee bikkina Gibxi uulliinsi fitto'i la'm hiinchonne luxxi agan aagu luxxi ayyaamonne Keesammi Dukkaan kaasamukko.

¹⁸Muse'e kaasakkam lokkuwwa issaa Keesammi Dukkaana kaasukko; saanquwwaa nottolluwwam uullisukko; laqqo'uwwa aagisaahim amaxxansukko.

¹⁹Waa'i ijaajukkisannem ee Keesammi Dukkaana kaasukko; hanenne ambakkamokam edaa ambukko.

²⁰Hidi'l Saga'l Saaxinam massaa Keesammi Dukkaananne dissukko; wonnannuwwam Hidi'l Saga'l Saaxi'n guma'uwwanne aagisukko; haafixxi ifichchom Hidi'l Saga'l Saaxi'n hanenne issukko.

²¹Hidi'l Saga'l Saaxinam Keesammi Dukkaa'n woronne aagisaa du'm eddechchinne daphphaa'ukko; ee'isinne Waa'i ixxo ijaajukkisanne Hidi'l Saga'l Saaxina daphphaa'ukko.

²²Xaraphpheeza Keesammi Dukkaa'n woro aagisaa daphphaa'oo du'm eddechchiinsi bii'l kollinne Kukkaaniinsi hanaa'n qaranne dissukko.

²³Waa'i ijaajukkisannem Waa'ina hincoo keesamaakkoo daabbo'o xaraphpheezanne gudisaa dissukko.

²⁴Caakka dissakkam mu'utam Keesammi Dukkaa'n woro aagisaa xaraphpheez illagenne Keesammi Dukkaaniinsi woroo'n qarinne dissukko.

²⁵Waa'i ijaajukkisannem Waa'i illagenne caakka caakkisukko.

²⁶Waa'i ixxo ijaajukkisannem Muse'e worqinne baxamu aduruusa wiriissakkam kiti'm mu'uta Keesammi Dukkaa'n woro aagisaa daphphaa'oo du'm eddechchi illagenne dissukko.

²⁷Waa'i ijaajukkisannem danaamisa enje'oo aduruusa wiriissukko.

²⁸Du'm eddechcham Dukkaana aagakkam goocanne issukko.

²⁹Dukkaa'n gooc illagennem shokkiisakkam kitima hincaa'akkam kiti'm mu'uta dissukko; shokkiisakkam kitimaa hurbaaxxi kitimam Waa'i ixxo ijaajukkisannem ee kiti'm mu'utanne hincaa'ukko.

³⁰Aanshaqqakkam saahina Dukkaa'nnaannonnee kiti'm mu'uxxi lambe'ennee dissaa wo'o wonshukko.

³¹Muse'e, Aaroonii ixxi goo'n oosii ixxuwwi angaa lokkoo ee wo'inne aanshaqqito'o.

³²Dukkaa'n woro aaggam ammanee kiti'm beyyom hincitam ammanee hundam Waa'i ijaajukkisanne aanshaqqitam hee'llo'o.

³³Muse'e Dukkaa'nnaannonnee kiti'm beyyi kululleetannee wixxixxi beyyo baxukko; ee beyyo aagakkam goocannem du'm eddechcha issukko; ee'isinne bax hundam guullukko.

³⁴Ee lasage Keesammi Dukkaan duubinne ifiisamukko; Waa'ikim lombi Dukkaananne wo'mmukko.

³⁵Ee bikkina Muse'e dukkaa'n woro aageena xanukkoyyo.

³⁶Isra'ee'l oos wiiddanto'i beyyiinsi dooyyitam hee'llo'ok Keesammi Dukkaaniinsi duub ki'oo amman xale'e hee'ukko.

³⁷Duub Keesammi Dukkaaniinsi ki'ubeelas wiidda'n beyyiinsi dooyyitam hee'llo'oyyo.

³⁸Dooyyitam hee'llo'i amman hundam Waa'i lombi moo'amam hee'ukkok ballanne duub Keesammi Dukkaa'n hanenne ihoohaare hiimonne odim duuphphi woronne giir moo'amoohaarette hee'ukko.