Read Hadiyya Dooyyi Kitaaba 5 Bible Online

Dooyyi Kitaaba 5 - Hadiyya bible

Dooyyi Kitaaba 5

¹Ee lasage Muse'ee Aaroonii Fari'oon beyyo matta'a «Isra'ee'l Moollanni Waa'i ‹Iina uguda issiteena udma'i uulla mattona i minaadaba fatakihe› yoolla» yito'o.

²Ihukkaarem Fari'oon «An ixxena ijaajameenaa Isra'ee'l minaadabam fatakeenaa Waa'oom ayyette? An Waa'a la'oommoyyo; Isra'eelam fatakoommoyyo» yukko.

³Muse'ee Aaroonim «Ibro'i manni Waa'i ixxi gaga iina la'isaakko; sas balli googo mallaa udma'anne ni Moollanni Waa'ina kitima hincaa'nneena mallona fatakitoo'isina uunxinoommo; eehid issinumbeelas jabbinne te'im orinne beeddinoommisa issookko» yito'o.

⁴Ihukkaarem Gibxi adil «Ki'nnuwwi Muse'ee Aaroonii minaadaba baxo tissiissakkamok mahinatte? Ki'nnuwwi kaba baxonne mallehe!

⁵Oono'o, ka uulli minaadaphphek xig lobakata; odim ki'nnuwwi lamim ixxuwwa baxo tissiissakkamuulla» yukko.

⁶Ee ballam Fari'oon agixxi ijaajaaninaa Isra'ee'l minaadaphphi baxisaaninaa

⁷«Xuubina ihoo bura'a gaassisa ixxuwwina hincaa'llakkotte; ixxuwwi gagim hassa'a eebbona.

⁸Ihukkaarem eraare baxxam hee'llo'i qaxiinsi mat xuubim hanqatoo'n baxxamisa issehe; ‹Ni Waa'ina kitima hincaa'nneena mallona fatakihe?› yitu'uuyyi eese hawwissamok baxo ceento'i bikkinatte.

⁹Qophpha'n woshsha macceesimma utta'a heeshita'a baxxona baxo kee'mmissehe» yaa ijaajukko.

¹⁰Agixxi ijaajaanii Isra'ee'l minaadaphphi baxisaanii matta'a Isra'ee'l minaadabina «Adil ‹Ka lasage an ki'nnuwwina bura'a uwwoommoyyo.

¹¹Ki'nnuwwi gagim hanniinsim hassakka'a eebbehe; ihukkaarem baxxakkam xuubik xig eraa'llaanniinsi hanqatimmi hasisooyyo› yaa ijaajaakko» yito'o.

¹²Ee bikkina minaadab bura'a hassa'a eebbeena Gibxi uullanne hundannem binnito'o.

¹³Agixxi ijaajaanim gaassi bura'a uwwitu'uuyyi baxissam hee'llo'i qax xuuba baxxa'a hincaa'llona u'nnisso'o.

¹⁴Oo agixxi ijaajaanim Isra'ee'l minaadaphphi baxisaano «Gaassi baxxakkam hee'llakko'aanqax xuuba baxxakka'a hincaa'llakkambee'ek mahinatte» yitu'uuyyi gantam hee'llo'o.

¹⁵Isra'ee'l minaadaphphi baxisaan hee'llo'i keenim adi'l illage hincita'a «Adila, neesenne ki awwaadaanonne hinkid ka hundam issitto?

¹⁶Bura'a ma'lluwwam uwwakkoo'n xuuba banxoommisina ijaajakko'ookko; eehannonnem neese ganakkamuulla; ku hawwodanchi hundim neesenne afoo'isina issukkok ki minaadaba» yita'a laachcha hincaa'llo'o.

¹⁷Adilim dabaraa «Ki'nnuwwi baxo ha'yyitakkambee'i ceemmaalli keeno; hore'em ceemmaalli keeno ‹Mallaa Waa'ina kitimo hincaa'nnoommisina neese fatakihe› yitakku'uuyyi xa'mmitakkamok eehanninatte.

¹⁸Kabadem ki'n bax beyyo daba'llehe; bura'i ki'nnuwwina hore'em uwwamooyyo; ihukkaarem gaassi baxxakka'a uwwitakkam qax xuuba uwwimmi hasisookko» yukko.

¹⁹Isra'ee'l minaadaphphi baxisaanim gaassi baxxamaan qax xuuba ballina ballina baxxa'a uwwimmi hasisoohan ihukkisa adil kuru ammanenne hawwonne aaggo'isa laqqo'o.

²⁰Adi'l beyyiinsi fitto'isam ixxuwwa egetta'a hee'llo'i Muse'ennee Aarooninnee edanto'o

²¹Ixxuwwina «Fari'oonaannonnee ixxi gassaa'n illagennee sabammoommisa issitakko'i bikkinaa bisa'inne shakkamisinam mashka'i ikkakko'i bikkinaa ki'nnuwwa Waa'i moo'ona; ixxim ki'nnuwwanne oogatona» yito'o.

²²Muse'e odim Waa'ina «Waa'a! Ka minaadabanne kaa'n hawwo hundam afissoottok mahinatte? Eehidette ihulas eese mahina keyye asse'llitto?

²³An ki summinne woceena adi'l beyyo hincummi ammaniinsi ki'isaa ixxi ka minaadabanne kee'mmaalli hawwo eebaakko; atim ka minaadaba gatisseena hore'em hassittoyyo» yukko.