Read Hadiyya Dooyyi Kitaaba 6 Bible Online

Dooyyi Kitaaba 6 - Hadiyya bible

Dooyyi Kitaaba 6

¹Waa'i Muse'ena «Faari'oonanne issoommi luwwa kaba moo'llootto; i wodinne kaa'amaa iittoo'nnim i minaadaba fatakookko; ixxi uulliinsim fittakkamisa issookko» yukko.

²Waa'i Muse'ena «An Waa'a.

³Hundam xanoommi Waa'i ihummisa Abrihaamina, Yisaaqinaa Yaaqoobinaa i gaga la'isaammo; ihukkaarem ‹Moollanni Waa'a› yamamoo keesammi i summinne la'amummoyyo.

⁴Waaraan ikka'a hee'llam hee'llo'i Kana'aa'n uulla ixxuwwina uwweena hide'aa hee'ummo.

⁵Kabadem Gibxi uulli manni agiddaninne u'nnissam Isra'ee'l oosika qaraaraalli laachcha macceesaammo; aagummi hidi'l sagaram tiiraammo.

⁶Ee bikkina an Isra'ee'l oosina ‹An Moollanni hanqo'i Waa'a! Gibxi uulli manni agiddaniinsi gatisaa wolabbanonne ki'nnuwwa fissoommo; malaayyaam i wodinnee kee'mmaalli oogato'innee ki'nnuwwa gatisoommo.

⁷Ki'nnuwwam i minaadab issoommo; anim ki'nnuwwina Waa'i ihoommo; Gibxi agiddaniinsi wolabbanonne fissoommi ammane an Moollanni Waa'i hanqo'i Waa'i ihummisa laqqakkamo.

⁸Ki'nnuwwa Abrihaamina, Yisaaqinaa Yaaqoobinaa uwweena hide'ummi uulla aagisoommo; ee uullam ki'nnuwwina gulummi issaa uwwoommo; an Moollanni Waa'a› yihe» yukko.

⁹Muse'em ee hundam Isra'ee'l oosina kurukko; ihukkaarem ixxuwwi neeyyato mutto'oo bikkinaa kee'mmaalli hawwonne hee'llo'i bikkinaa macceesseena hasso'oyyo.

¹⁰Odim Waa'i Muse'ena

¹¹«Faari'oon beyyo mattaa Isra'ee'l oos ki uulliinsi mattona fatakihe› yitaa kure» yukko.

¹²Ihukkaarem Muse'e Waa'ina «I moolli Isra'ee'l oosim i woshsha macceessobee'eka adil hinkid i woshsha macceesookko? An wocaa la'oombee'i duda'a» yukko.

¹³Ee'isinne Waa'i Isra'ee'l oos bikkinaa Gibxi adi'l bikkinaa Muse'enaa Aarooninaa kurukko. Isra'ee'l oosom Gibxi uulliinsi awwonsita'a fissitona ijaajukko.

¹⁴Abaroosik annannichchikim awwonsaan kakeeno. Yaaqoob won beet Roobeelik oos Hanookatte, Faalu'utte, Heesiroonattee Kaarmi'ittee. Ixxuwwim Roobeel sullina anno'i hee'llo'o.

¹⁵Simi'oon oos Yimu'eelatte, Yaamiinatte, Oohaadatte, Yaakiinatte, Xoohaarattee Kana'aa'n uulli meentichchonne qaramu Sha'uulattee. Ixxuwwim Simi'oon sullina anno'i hee'llo'o.

¹⁶Leewi'i oos Gershoonatte, Qa'aatattee Meeraarattee. Ixxuwwim Leewi'i sullina anno'i hee'llo'o. Leewi'i xibbee sadee lamar hiinchoo hee'ukko.

¹⁷Gershoon oos Liibinattee Shiimi'attee hee'llo'o; ixxuwwinam dut shumo'i hee'ukko.

¹⁸Qa'aat oos Amiraamatte, Yixihaaratte, Keebiroonattee Uuzi'eelattee hee'llo'o; Qa'aat xibbee sadee sas hiinchoo hee'ukko.

¹⁹Meeraar oos Maahiilattee Muushi'attee hee'llo'o; ixxuwwii ixxuwwi shumo'ii hundim Leewi'i sulli hee'llo'o.

²⁰Amiraamim Yookaabeed yakkam ixxi ada eebukko; isem Aaroonaa Muse'ee qatto'o; Amiraam xibbee sadee lamar hiinchoo hee'ukko.

²¹Yixihaar oos Ore'ette, Neefeegattee Zikri'ittee.

²²Uuzi'eel oos Mishaa'eelatte, Eelxaafaanattee Siitirattee hee'llo'o.

²³Aaroon Naa'oosina aayyatte hee'llo'i Aminaadaab landichcho Eelsheebaa'a eebukko. Isem Naadaaba, Abiihu, Ali'aazaraa Itaamaaraa soor goo'n ooso qatto'o.

²⁴Qore'i oos Asiiratte, Eelqaanattee Abiiyaasaafattee. Kukeenim Qore'i shumo'ina hundinam sulli anno'i hee'llo'o.

²⁵Aaroon beet Ali'aazar Phuti'eel landichcho eebaa Fiinihaasa qarukko; ixxuwwim Leewi'i sullina anno'oo awwonsaanoo hee'llo'o.

²⁶Ka kee'n lambe'iinsi Waa'i Muse'ee Aaroonaa doo'llaa «Isra'ee'l minaadaba sulli sullinne Gibxi uulliinsi awwonsitakka'a fissehe» yaa ijaajukko.

²⁷Ixxuwwim «Isra'ee'l ooso fatakihe» yita'a Gibxi uulli adila xa'mmito'o.

²⁸Waa'i Muse'ena Gibxanne wocu ammane

²⁹«An Moollanni Waa'a! An kiina kuroommoka hundam Gibxi uulli Faari'oonina kure» yukko.

³⁰Ihukkaarem Muse'e «An wocaa la'oombee'i duda'a; adil i woshsha hinkid macceesookko?» yaa dabarukko.