Read Hadiyya Dooyyi Kitaaba 8 Bible Online

Dooyyi Kitaaba 8 - Hadiyya bible

Dooyyi Kitaaba 8

¹Ee lasage Waa'i Muse'ena «Faari'oon beyyo mattaa Waa'i ‹Iina awwaaddamisina i minaadaba fatakihe.

²Fatakimma sabbilas ki uullanne luga fatakoommo; Abbaayyi daajjim luginne wo'mmookko.

³Abbaayyi daajjiinsim lug firaa ki adilla'n minenne, ki ara'anne, ki gassaa'n minneewwanne, ki minaadaphphi minneewwanne, gii'l midachchannee buko'i mu'utannee hundannem aagookko.

⁴Lug kiihaannonne, ki minaadaphphaannonnee ki gassaa'n hanennee firookko› yaakko yitaa kure» yukko.

⁵Odim Waa'i Muse'ena «Aaroonina ‹Lug firaa Gibxi uullanne hundannem wo'mmoo'isina daajjuwwa, boohe'inne maroo wo'uwwaa delbuwwaa ki biccinne aphphise› yaakko yitaa kure» yukko.

⁶Ee bikkina Aaroon Gibxi uulli wo'o hundam ixxi biccinne aphphisukko; lugim firaa uulli hundannem wo'mmukko.

⁷Ihukkaarem kiiraanim ixxuwwi falinne Muse'aamisam lug Gibxanne wo'mmoo'isa issito'o.

⁸Faari'oon Muse'ee Aaroonaa weeshaa «Ka luga iinniinsii i minaadabiinsii qeessoo'isina Waa'a uunxehe; Waa'ina kitimo hincaa'llamisinam minaadaba fatakoommo» yukko.

⁹Muse'em Faari'oonina «Lug kiinniinsii ki minaadabiinsii qee'llaa xale'i Abbaay daajjenne gatoo'isina kiina, ki gassaaninaa ki minaadabinaa hinki balla Waa'a uunxoomda'e iina kure» yukko.

¹⁰Adilim «Ka soodoom uunxe» yukko. Muse'em «Ni Moollanni Waa'i'nnookkok ayyim bee'isa laqqoo'isina at yittisam soodo ihookko.

¹¹Ixxim lug kiinniinsi, ki miniinsi, ki gassaaniinsii ki minaadabiinsii qee'llaa xale'i Abbaayyi daajjenne gatookko» yukko.

¹²Ee lasage Muse'ee Aaroonii Faari'oon illagiinsi fitta'a matto'o; Faari'oonanne eebu luga hooroo'isina Muse'e Waa'a uunxukko.

¹³Waa'im Muse'e uunxukkisam issukko; minenne, qash woronnee biirannee hee'u lug hundim lehukko.

¹⁴Gibxi uulli mannim luga beyyi hundannem tuubbo'o; uullim eehanni bobinne wo'mmukko.

¹⁵Ihukkaarem Faari'oon oo hawwi sholle'ukkisa moo'aa Waa'i wocukkisam ixxeka wodano duudisaa Muse'ekaa Aaroon woshshaa macceesimma sabukko.

¹⁶Waa'i Muse'ena «Aaroonina ‹Ki biccinne uullanne yoo dira aphphise› yihe. Ee lasage Gibxanne hundannem yoo dir tushshe'i ihookko» yukko.

¹⁷Aaroonim ixxi biccinne uullanne yoo dira aphphisukko; Gibxi uullanne yoo dir hundim tushshe'i ihukko; mannannee diinatennee hundannem dummukko.

¹⁸Kiiraanim ixxuwwi falinne tushshe'e fikkaannisseena yakito'o; ihukkaarem xanto'oyyo. Tushshe'im mannaa diinatee hundam itukko.

¹⁹Kiiraanim «Kuk Waa'i baxo» yita'a adilina kutto'o; ihukkaarem adil ixxeka wodano duudisukko; Waa'i wocukkisam Muse'ekaa Aaroon woshshaa macceesimma sabukko.

²⁰Waa'i Muse'ena «Soodo daram adi'l beyyo mattaa daajje dillukkuuyyi Faari'oonina ‹Iina awwaadoo'isina i minaadaba fatakihe.

²¹Sabbittaa'lleensi keesenne, ki gassaanonne, ki minaadabannee ki minneewwannee hundannem qasoo tikaayya fatakoommo. Gibxi uulli manni minneewwannee uullannee hundannem qasoo tikaayyi wo'mmookko.

²²Ihukkaarem i minaadab hee'llam Geesee'm uullanne qasoo tikaayyi hee'oobee'isa issoommo. An ka uullanne yoommisa laqqoo'isina ee uulla qasoo tikaayyi nakkooyyo.

²³I minaadabannee ki minaadabannee annannoom hee'oo'isa issoommo; ee maalalsiisoo mare'em soodo moo'llakkamo› yitaa kure» yukko.

²⁴Waa'i Adi'l minii ixxi gassaa'n minii hundim qasoo tikaayyinne wo'mmoo'isa issukko; Gibxi uulli hundim qasoo tikaayyinne bi'ukko.

²⁵Ee lasage Muse'ee Aaroonaa adil weeshaa «Mattakka'a ka uullannem ki'nnuwwi Moollanni Waa'ina kitimo hincaa'llehe» yukko.

²⁶Muse'em «Ni Moollanni Waa'ina hincaa'nnoom kitim Gibxi minaadabina shigigaa'oohan ihu bikkina ee'isa issimmi danaamoyyo; Gibxi minaadabina shigigaa'oo kitima ixxuwwi illagenne hincaa'nnumta'n neese kininne aphphissamoyyonnihe?

²⁷Ee bikkina Waa'i ijaajukkisannem sas balli googo udma'i uulla mallaa Waa'ina kitimo hincaa'immi hasisookko» yukko.

²⁸Adilim «Qee'llitakka'a mattakkambee'an ihulas udma'i uullanne ki'nnuwwi Moollanni Waa'ina kitima hincaa'llakkona fatakoommo; iinam Waa'a uunxehe» yukko.

²⁹Muse'em dabaraa «Soodo qasoo tikaayyi kiinniinsi, ki gassaaniinsii ki minaadabiinsii laa'oo'isina kiinniinsi annanni ihummisam kaba Waa'a uunxoommo; ihukkaarem minaadab Waa'ina kitimo hincaa'eena maroobee'isa hoottaa qawwiissittisam kabadem neese qawwissitte» yukko.

³⁰Muse'em adi'l illagiinsi firaa Waa'a uunxukko.

³¹Waa'im Muse'e uunxukkisam issukko. Qasoo tikaayyim adiliinsi, ixxi gassaaninsii minaadabiinsii hundiinsim matim gatoo'n curuqaa laa'ukko.

³²Ihukkaarem Faari'oonik wodan duudukko bagaan Isra'ee'l minaadaba fatakukkoyyo.