Read Hadiyya Dooyyi Kitaaba 9 Bible Online

Dooyyi Kitaaba 9 - Hadiyya bible

Dooyyi Kitaaba 9

¹Waa'i Muse'ena «Adi'l beyyo mattaa Ibro'i minaadaphphi Moollanni Waa'i ‹Iina awwaaddamisina i minaadaba fatakihe.

²Kabadem sabbaa ku minaadab mareena hootlas

³ki fooraam diinatenne hundannem jabbo eeboommo; ee bikkina farad, halli, gaameela'i, lar, gereebbii fella'ii hundim beeddookko.

⁴Ihukkaarem Waa'i Gibxikaa Isra'ee'llekaa diinate annanni issookko. Isra'ee'l diinatikim matim lehooyyo.

⁵An Waa'i ka hundam Gibxanne soodo isseena murte'aammo yoolla› yitaa kure» yukko.

⁶Waa'i wocukkisannem la'm balli daram eekka issukko. Gibxi uulli fooraam diinat hundim beeddukko; ihukkaarem Isra'ee'l diinaxxek matim lehukkoyyo.

⁷Adilim eekka la'eena hasaa manna asse'aa Isra'ee'l diinaxxek matim lehubee'isa la'ukko. Ihukkaarem ixxek wodan duudu bikkina minaadaba fatakukkoyyo.

⁸Ee lasage Waa'i Muse'enaa Aarooninaa «Midachchiinsi gii'lbuchcha fooccakka'a massitakka'a Faari'oon illagenne Muse'e hafachchanne binnaa'ona.

⁹Oohim di'llisa ihaa Gibxi uullanne hundannem binnoohaare mannannee diinatennee mar xooqoo dashshi firookko» yukko.

¹⁰Ee bikkina Muse'ee Aaroonii midachchiinsi gii'lbuchcha amadda'a adi'l illagenne uullito'o; eekkam Muse'e hafachchanne binnaa'u ammanenne Gibxi uulli mannannee diinatennee mar xooqoo dashshi firukko.

¹¹Ee ammane kiiraanonnee Gibxi minaadab hundannemii dashshi firaa hee'u bikkina oo kiiraan Muse'i illagenne uulliteena xanto'oyyo.

¹²Ihukkaarem Waa'i adi'lleka wodano duudisaa hee'u bikkina Muse'ena Waa'i wocaa hee'ukkisam adil Muse'ekaa Aaroonikaa woshsha macceesimma sabukko.

¹³Ee lasage Waa'i Muse'ena «Sooxxi dara baqitem adi'l beyyo mattaa ‹Ibro'i mannik Moollanni Waa'i «Iina awwaaddona i minaadaba fatakihe.

¹⁴Oobeelas iinni'nnoo'i Waa'i uullanne bee'isa laqqona keesenne, ki gassaanonnee ki minaadabannee boobana qaqqisaa dilliisoommo.

¹⁵Keesee ki minaadabaa boobaninne bi'iseena i anga ki'isaammoohan ihuta'n kabe'e uulliinsi bee'llakkam hee'llakko'o.

¹⁶Ihukkaarem i summi uulli hundannem weeshamonaa i wodam kiina moo'iseenaa hasummi bikkina an keese ki'isaammo.

¹⁷Kabadem i minaadabinne uullixxantittisam yoonto; maramonam fatakimma sabbaatto.

¹⁸Ee bikkina soodo kido'i ammanenne Gibxanne ga'nnaa la'akkambee'i kee'mmaalli barada ga'nnisoommo.

¹⁹Kaba manna asse'llaa kiikka allaachchi diinatee amaxxaa hundam mine aagisiise; mine aagubee'i mannii diinatii hee'ulas baradinne beeddookko» yoolla› yitaa kure» yukko.

²⁰Waa'i wocu woshsha macceessa'a baddito'i Faari'oon gassaa'nnek mat mat qaqqissa'a ixxuwwi agidoo diinatee mine aagisso'o.

²¹Ihukkaarem baddimma sabbo'i keen ixxuwwi awwaadaanoo diinatee allaachchi beyyonnem cawwita'a utto'o.

²²Ee lasage Waa'i Muse'ena «Gibxi uullanne hundannem mannanne, diinatennee uullanne mutu luwwi hundannee barad ga'nnona ki anga iim ki'ise» yukko.

²³Muse'em ixxi bicco iim ki'isukko; Waa'im banqaa baradaa dilliisukko. Banqim uullanne dillukko; Waa'i Gibxanne hundannem barada ga'nnisukko.

²⁴Baradim dillukko; banqim belecce'ukko. Gibxanne hore'em eehido'i kee'mmaalli barad ga'nnu balli bee'e.

²⁵Baradoom Gibxi uullanne hundannem biiranne gatu luwwa hundam mannaa diinatee uullanne mutu luwwaa hundam aphphisukko; haqqam iiqansukko.

²⁶Oo barad Isra'ee'l oos hee'llam Geesee'm uulli xale'e aphphisukkoyyo.

²⁷Adilim Muse'ee Aaroonaa weeshisaa «Kabada'i baaxiilo baxummisa la'aammo; Waa'i hanqo'ane; ihukkaarem anii i minaadabii huushammaammo.

²⁸Baradii banqii lophphu bikkina Waa'a uunxehe; hanqo'isam ki'nnuwwa fatakoommo; ka lasage ka uullanne afuuttakkamoyyo» yukko.

²⁹Muse'em adilina «Ka beero'iinsi firummisam i anga biddiqaa'aa Waa'a uunxoommo; ee ammane banqii baradii uullookko; ee'isinnem uulli Waa'an ihukkisa laqqootto.

³⁰Ihukkaarem atii ki gassaanii Moollanni Waa'a badditakkambee'an ihukkisa la'oommo» yukko.

³¹So'ii hamaamaa talbii fiitaa hee'u bikkina ma'lluwwim gatoo'n hundim bi'ukko.

³²Ihukkaarem arasii gardaammii qaphphaa afoo bikkina bi'oo'nnim gatukko.

³³Muse'e adi'l illagiinsi firaa ee beero'iinsi tochchonne firaa ixxi anga biddiqaa'aa Waa'a uunxukko; banqii baradim ee ammanem urukko; xeenim billukko.

³⁴Ihukkaarem adil banqi, baradii xeenii urukkisa moo'aa odim baaxiilo baxukko; ixxekii ixxi gassaa'nnekii wodan duudukko.

³⁵Waa'i Muse'ena wocaa hee'ukkisam adi'llek wodan duudu bikkina Isra'ee'l ooso fatakukkoyyo.