Read Hadiyya Iyyoob Kitaaba 10 Bible Online

Iyyoob Kitaaba 10 - Hadiyya bible

Iyyoob Kitaaba 10

¹«Hee'oommi heechchi sabisaakko; ee bikkina ki kollonne laaroommoka qaraaraalli kichchechchi sagara macceese.

²Waa'ina an ‹Iittammumbee'i luwwi mada'e kure bagaan at eesenne oogattitte.

³Baaxiilaan kee'n sawwitenne liirantittuuyyi ihukkaarem eese kaa'nna u'nnissituuyyii ki angi baxom sholliissituuyyii keese liiransoohonnihe?

⁴Ki illi mannaannisannihe? Te'im at moo'lloottok mannisannihe?

⁵Ki umurim mannaannisa gundannihe? Ki ayyaammuwdu mannaannisannihe?

⁶Eehannah i jolla hassoottokii i baaxiilom laseessoottokii mahinatte?

⁷Baaxiilaanchi ihumbee'isaa ki angiinsi ayyim eese gatiseena xanoobee'isaa at laqqootto.

⁸Eese axisaa baxukkok ki anga; eehannah kaba dabattaa atim bi'isseenannihe?

⁹Buchchi mu'uxxisa buchchiinsi eese baxxittisa sawwihe; eehannah kaba dabattaa di'llisa liitteenannihe?

¹⁰Eese axxisa duntittoyyonnihe? Gi'i'nnisam gi'insittoyyonnihe?

¹¹I orachcho miqinnee bu'aninnee somansitaa baxxitto; miqennem maaraa omachchoo eddeessitto.

¹²Foore uwwitto; ki eroommam moo'issitto; ki abooyyimmim foorinne hee'oommisa issukko.

¹³Ihukkaarem ee ammane ka hundam ki wodanonne maaxxaa sawwittisa kabadu la'ummo.

¹⁴Baaxiilo baxoommisa moo'llootto; i baaxiilom guzumo'lloo'n higgooyyo.

¹⁵Baaxiilo baxumlas iina aayye! muccur ihumta'nnim galaxxamoommoyyo; mashka'oomim sholle'nna edde'aammo; howworonnem ubaammo.

¹⁶I gaaga iimiimaa'umta'n hobbichchisa hochchitaa amaddootto; baddisoo ki malaayyem eesenne dabaransitaa moo'issitto.

¹⁷Eesenne naqqasoo manna hundi ammanem siiddootto; i hanennem ki quunqa eddootto; eese hawwoddeena hundi ammanem haareechchi sawwite o'l gogoxxisa fissititto.

¹⁸«Waa'a! Mahina an qaramoommisa issitto? ayyim moo'oo'n lehaammoota'n eran hee'ukko.

¹⁹Qooccamoo'n gatumta'n; iyyummi godabiinsi ee googom waammoronne aagumta'n e'llam hee'ukko.

²⁰I umu'l doolli gundayyonnihe? Ka gundi i umu'l doollenne hofqaxam liiramoommisina cawwitaa ure.

²¹Daba'llaa waaroombee'i beyyo gambabbi tuunsi yoo baddisoo beyyo maroommi amman afaakko.

²²Maroommi beyyi tuunsi hafii hambalaachchii wo'mmaakkoo uulla; ee beyyonne yoo caakki gagoomim tuunsi'nnoohane» yukko.