Read Hadiyya Iyyoob Kitaaba 11 Bible Online

Iyyoob Kitaaba 11 - Hadiyya bible

Iyyoob Kitaaba 11

¹Naa'ima'i uulliinsi soofaar yakkam manchi

²«Ka kora'i woshshina hundinam dabachcha uwwookkok bee'ennihe? Mat manchi kaa'n hundam wocu bikkina hanqo'an iheena xanoohonnihe?

³Iyyooba, kiihaannina ka awwaad bee'i woshshina dabachcha uwwakkambee'eka labissatennihe? Kaa'nnam naacantoottok axeeroo manni bee'eka labissaatennihe?

⁴At Waa'ina ‹An hanqo'ane; ki illagennem muccura› yitootto.

⁵Waa'i wocaakkoota'nnii hanqo'i dabachcham kiina uwwaakkoota'nnii eran hee'ukko.

⁶Hanqo'i qooroo'mmek goog lobakata; Waa'i kiina qooroo'mmeka daphphu luwwa caakkisaakkoota'n Waa'i ki baaxiilina laboo bito miqisubee'isa laqqam hee'llitto.

⁷«Waa'ika xillaakkoo maaxaqqi woshsha saarayyitaa laqqeena xantoohonnihe? Te'im hundam xanoo Waa'a saarayyitaa xantoohonnihe?

⁸Ixxek qooroom iimaniinsi lobane; at maha issiteena xantootto? Xillaalloomim sii'ooliinsi woroonette; at maha laqqootto?

⁹Waa'i qooroo'mmek qeeraa'lloom uulliinsi lobane; dambalaq haraaroomiinsim erisa lobane.

¹⁰Waa'i waaraa keese karaxxi minenne aagisuta'n oogatinam hincaa'uta'n ayyi hoorookko?

¹¹Waa'i awwaad bee'i manna la'ookko; ixxuwwika jor baxom annannissaa la'ookko.

¹²Qawwi manchi qoor ihoohaanniinsi bii'l hallichchi manchi ihaa qaramimmi sholle'ookko.

¹³«Ihukkaarem ki wodano xabbeen issitlas ki angam biddiqaa'llaa Waa'a uunxitlas

¹⁴Baaxiilo baximma uttilas jollim ki minenne hee'oobee'isa issitlas

¹⁵Ee ammane xabbitaa tuuttoo'n hundem luwwam moo'llootto; badditoo'nnim qoxxitaa uullitootto.

¹⁶Ki hawwi hundam xaddootto; higaa maru dirisisam sawwitootto.

¹⁷Ki heechchi samgud eelliinchiinsi loboka caakkookko; tuunsim soodaraa'l caakkisa ihookko.

¹⁸Neeyyat yoo bikkina makkixxitaa hee'llootto; Waa'im keese egeroo bikkina kichchechchi bee'eka usheexxitaa hee'llootto.

¹⁹Matem baa'isoo luwwi bee'ekam iinse'llootto. Lobakat mannim keese qooxxaqqookko.

²⁰Ihukkaarem boqquwwi kee'nnek illi qooqookko; xottam googom siiddamoyyo; ixxuwwi lasaanchim leho» yukko.