Read Hadiyya Iyyoob Kitaaba 12 Bible Online

Iyyoob Kitaaba 12 - Hadiyya bible

Iyyoob Kitaaba 12

¹Iyyoobim dabaraa

²«Hanqo'i mannaa yimmi ki'nnuwwayyahe! Qooroomim ki'nnuwwinne maqirem leheenayyahe!

³Ihukkaarem iinam ki'nnuwwaanqax qoossimmi yookko; hore'em ki'nnuwwiinsi mahinnem hoffe'oommoyyo; ki'nnuwwi woccakko'oka manni hundim la'ookko.

⁴An Waa'a uunxaa dabachcha siidaammoo manchi ihumta'nnim i beshina osachchi ihaammo. Muccuraa miiqakkam luwwi bee'anee ihumta'nnim osarakkaman ihaammo.

⁵Makkixxito'i keen hawwi afu mannanne naaccamo; ubeena tartaru manchom gafe'llamo.

⁶Ixxuwwi malaayye Waa'isa issitta'a xiggam keenii boggam keenii Waa'a laggam mannii xumminne hee'llamo.

⁷«Ihukkaarem kaba fooraam diinate xa'mmitakkolas losano uwwookko; iima'n ammaram xa'mmehe; ki'nnuwwinam kuttamo.

⁸Te'im uullina woce ixxim kiina losano uwwookko, dambalaq woronne hee'oo qurxumme'im kiina kurookko.

⁹Waa'ik angi kaka baxukkisa kakeeniinsi hundiinsim la'oobee'ek ayyette?

¹⁰Qooccanchi hundikim heechchii mannik hundikim foorii Waa'i angannette.

¹¹Allab hurbaaxxeka xee'nna annanni issaa la'oo'isam maccim woshshika duuha'a annanni issaa la'ookko.

¹²«Qooroom lommannanonne qoossimmim umur qeeraa'llimminne siidamookko.

¹³Ihukkaarem Waa'ina qooroomii malaayyii yookko. Qoossimmii sogitanii uwwamookkokim ixxeensette.

¹⁴Waa'i gindukkoka ayyim dabaraa baxeena xanooyyo; Waa'i karukkoka ayyim tireena xanooyyo.

¹⁵Waa'i xeena hooroo ammane uulli gogookko; xeena uwwoohaare odim uulli dirisinne wo'mmookko.

¹⁶Waa'i malaayyaamoo kaa'oohanee; qawwiisookkokii qawwiisamookkokii lamim ixxi daannoo'm woronnette.

¹⁷Ixxi sogoo keeniinsi qoorooma hoorookko; minaadaphphi awwonsaanom qawwuwwi issookko.

¹⁸Waa'i adilluwwa adilla'n barcumiinsi dilliisookko. Lamadonne gildima lade'lla'a karaxxi minenne karantamisa issookko.

¹⁹Qeessuwwiinsi qeessoomano hooraa hollookko; daannuwwiinsi daannoomano hoorookko.

²⁰Sogimminne la'anto'oo manna woccam luwwa hooggamisa issookko; lommanniinsim qoossimma hoorookko.

²¹Daannuwwi tuuttamisa issookko; malaayyaam kee'nnekim malaayyi hoogoo'isa issookko.

²²Tuunsonne maaxamaa hee'oo luwwa caakkanne fissookko. gambabbaakkoo tuunsom caakkanne dabarookko.

²³Ixxi mulli minaadaba iimiimaa'ookko; odim dabaraa bi'isookko; minaadaba fikkaannisookko; odim dabaraa binnaa'ookko.

²⁴Uulli minaadaphphi awwonsaano qawwuwwi issookko; goog bee'i udma'i uullannem karkaadisookko.

²⁵Caakka hoogga'a tuunsonne taftafitamisaa dinbaanchisa tartaritamisaa issookko.