Read Hadiyya Iyyoob Kitaaba 13 Bible Online

Iyyoob Kitaaba 13 - Hadiyya bible

Iyyoob Kitaaba 13

¹Ka ki'nnuwwi yitakkamoka hundam kanniinsi illageenim macceesaammo; hundem luwwam do'ixxaa la'aammo.

²Ki'nnuwwi laqqakkam qaxa anim la'oommo; ki'nnuwwiinsi hore'em hoffe'oommoyyo.

³Ihukkaarem an atooraroommuullak Malaayyaam Waa'innette; ixxenne maqirem an fitameena hasoommo.

⁴Ihukkaarem ki'nnuwwi qophphaninne wo'mmitakko'oo keeno; ki'nnuwwi ayyem fayyiissakkeena xantakkambee'i qaraa'l manna.

⁵Eehanniinsa'i cawwitakka'a uttakko'oota'n qoolluwwa labbakkam hee'llakko'o.

⁶«An hincaa'oommi fito macceessehe; i hawwodancham ku'lloommi ammane cawwitakka'a macceessehe.

⁷Waa'i summinne mahina qophphano woccakkamuulla? Qawwiisimminnem Waa'a liiransitakkamoka labissakka'atennihe?

⁸Te'im ixxena golo'llakkeenannihe? Ixxi bikdu fitantakkeenannihe?

⁹Waa'i ki'nnuwwa saarayyuta'n ki'nnuwwanne er luwwa siidoohonnihe? Manna qawwiissakkamisam Waa'a qawwiissakkeena xantakkamoka labissakka'atennihe?

¹⁰Maaxaqqanne golo'llakkolas hanqo'isam Waa'i ki'nnuwwa axeerookko.

¹¹Ixxi lombi ki'nnuwwa baddisooyyonnihe? Ixxi hibbim ki'nnuwwa muggisooyyonnihe?

¹²Ki'nnuwwi kobi'llishshinne woccakkam woshshi gii'lbuchchi'nnoo'i awwaad bee'ane. Ki'nnuwwi fitantakkam fitim buchchi mu'uxxisa iiqamaa uboohane.

¹³Hino'o, cawwi'llehe; an woconam kore uwwehe; eehanniinsi lasonne hasu luwwi waarona.

¹⁴«Inqe ga'mmaa hawwummuuyyi hee'oommok mahinatte? I heechchina idiidoommokdu hinki balli afeebe'e?

¹⁵Ee bikkina Waa'i eese shuta'nnim ixxonne neeyyato issoommo; ihukkaarem i meto'o ixxena kuroommo.

¹⁶Baaxiilaanchi manchi Waa'i illage hinceena xanoobee'i bikkina ayyi la'ukko ku i iggimmi i gatimmina mashka'i iheena xanookko.

¹⁷Hino'o, wocoommi woshsha qoossitakka'a macceessehe; an yoommi luwwam erisa macceessehe.

¹⁸Oono'o, i fito laboo'isinne hincaa'aammo. Iina hanqi siidamoo'isam la'oommo.

¹⁹I moollanna at eese baaxiilaanchi issitoohan ihukkaa'lleensi an cawwaa lehoommo bagaan kiinninne fitamoommoyyo.

²⁰Waa'a! Ki illagiinsi maaxamoobee'isa ka lamem luwwam iina isse.

²¹Oohim eese guzumo'oo ki anga i haniinsi ki'ise; baddisoo ki hibbinnem eese muggissitte.

²²«Waa'a! Gaassitaa at woce; an dabachcha uwwoommo. Te'im an wocoommaare at dabachcha uwwe.

²³An haawwodummi luwwii baxummi baaxiilii hinkaa'nna? An gindummi ki seeraa baxummi baaxiiloo hino'o, iina moo'ise.

²⁴Iinniinsi mahina daphphitoolla? Eese mahina diinakkichchisa xiggoolla?

²⁵Hafachchi giggissoo buyyisaa gogu bura'isaa ihummisa laqqittuuyyim eese mahina baddissittuuyyi hollitoolla?

²⁶«At iina qaraaraalli woshsha kitaabbaatto; oosoommanonne baxummi i baaxiilom uttittoyyo.

²⁷I lokko xaarinne kattaatto; taakke'oommi taakkom laqqeena saarayyitoolla; an hance'ummi beyyom mareessoolla.

²⁸Eehanniinsi ki'ukkok an shamu luwwisa ihaa gatoommo; bil itu eddechchisam bi'oommo.