Read Hadiyya Iyyoob Kitaaba 14 Bible Online

Iyyoob Kitaaba 14 - Hadiyya bible

Iyyoob Kitaaba 14

¹«Maara edde'aa qaramu manchik umur gunda; oohim hawwinne wo'mmaakkoohane.

²Fiitisa moo'amaa qaqqisom giggirookko; hafisam lobakata dasoo'n higookko.

³Eehannah kido'i mancho laseessoohonnihe? Ki illagennem oogatina hincaa'lloohonnihe?

⁴Haashaarammi luwwiinsi muccur luwwa siideena xanookkok ayyim bee'e.

⁵Mannik umur gaassim qoodamaakkoohane; Hee'oo aganim ki beyyonne xigamaakkoohane; at qoodditti umu'l gabalam higookkok bee'e.

⁶Balli baxaanchi ixxi baxo guullaa liiramoohaannisa manchim ixxi umu'l doollenne liiramona cawwihe.

⁷«Murakko'i haqqichchinam ihuta'n neeyyat yookko; mashka'oomim daba'llaa lateenaa caafa fisseenaa xanookko.

⁸Xaph uulli woronne ebeeruta'n lugumim buchchi woronne shamuta'n

⁹wo'o siidulas daba'llaa latookko; haareechcho kaasamu haqqichchisam caafa fissookko.

¹⁰Ihukkaarem manchi lehaa lasage bi'ookko; eehannah foorim maariinsi annannihaa lasonne hannonne siidamookko?

¹¹Damba'l wo'i goolli ihaa beeddoohaannisa daajji wo'im gogoohaannisa

¹²Ee'isam manchi lehaa lasage daba'llooyyo; iiman higeebee'e baqooyyo; diriichchiinsim ki'ooyyo.

¹³«Waammi woronne maaxxita'n ki quunqim higeebee'e daphphaa'llita'n iina amadditti ammanem qooddaa eese sawwitta'n iittam hee'ummo.

¹⁴Manchi lehaa lasage daba'llaa foorinne hee'eena xanoohonnihe? an usheexxoommi amman waareebee'e ka gubbanchi doollika lasaancho iyyaqqimminne egeroommo.

¹⁵Ee ammane at eese weeshshootto; anim dabachcha uwwoommo; qooccititti eesem moo'lleena quluxxootto.

¹⁶Ee ammane i taakko hundam laseessootto; ihukkaarem i baaxiilo xiggooyyo.

¹⁷Hawwodummi luwwi hundam haafitootto; i baaxiil hundam shiinshitootto.

¹⁸Ihukkaarem ka uullanne duunnuwwi toroshamaa uboohaannisa geejji kinim beyyiinsi xoqolamoohannisa

¹⁹wo'i kina shiraashiroo'haannisa dirisim buchcha aanshaa massoohaannisa ee'isam at ka hoogaanchi manchi beetika neeyyato bi'issootto.

²⁰Matemaaggem murte'llaa ki malaayyinne ixxonne ki'llootto; ixxim bi'ookko; ixxi hagaram dabassitaa ki illagiinsi hoottootto.

²¹Ixxi oos lomba siiddota'n la'ooyyo; sholle'llota'nnim moo'ooyyo.

²²Xale'i ixxi orachchina xissi macceesamookko; xale'i ixxi hawwi bikkinam wi'llookko» yukko.