Read Hadiyya Iyyoob Kitaaba 15 Bible Online

Iyyoob Kitaaba 15 - Hadiyya bible

Iyyoob Kitaaba 15

¹Teemaa'n uulli Eelfaazim dabaraa

²«Hanqinam qoor manchi hafachchisa foocamoobee'i woshsha wocoohonnihe? Eelliinchi firoo kolli hafachchisam kora'i sawwit hee'immi hasisoohonnihe?

³Qoor manchi maham awwaad bee'i woshshannee dabaloobee'i luwwannee fitamoohonnihe?

⁴Ihukkaarem at Waa'a baddimma uttaatto; mulli keenim Waa'ina otossitambee'isina qolat ikkoolla.

⁵Baaxiilaanchi ikkittis woccoo woshshinnem la'isoolla; ihukkaarem qooroo'm woshshinne baaxiilooma ifiisseena yakitoolla.

⁶Keesenne oogatoollak ki allabome bagaan aneyyo; naqqasoollakim ki suumeme bagaan aneyyo.

⁷«At manniinsi hundiinsim gaassitaa qarantaatennihe? Te'im duunnuwwi qoocameena illageenim at qarantaatennihe?

⁸Hanqo'isam Waa'ika maaxaqqi woshsha macceessaahinnihe? qooroom uwwamukkok xale'i kiinattennihe?

⁹Neese lanqoommaanniinsi mullek at laqqoo luwwi maruwwa? Niinniinsi daphphaa kiina caakku qooroom mah yookko?

¹⁰Umuranne kiyyanniinsi lophphitam keen horoor abo'aakkoo lommannim sawwitenne niinninne yo'o.

¹¹«Waa'i ni kollinnetti ihaa kiina kuroo luwwi ixxeensi kiina uwwoo sabiraatii hoffe'aatennihe?

¹²Ki wodano mahina duudissoolla? quunqinnem mahina leencitoolla?

¹³Waa'anne quuqqaa kido'i sagar ki suumiinsi firoo'isa issu luwwi maruwwa?

¹⁴Manchi muccur iheena xanoohonnihe? Waa'i illagenne hanqo'an iheena xanoo manchi yoohonnihe?

¹⁵Waa'i ixxi asse'amaanonnem ihuta'n bakke'ooyyo; iimanem ihuta'n ixxi illagenne muccurayyo.

¹⁶eehannah haashaarammaa shigigaa'oohanee ihaa baaxiilo wo'isa agoo manchi hinkaa'nna amma'nnamookko!

¹⁷«Iyyooba, hino'o, kuroommo macceese; an moo'ummoka hundam kuroommo.

¹⁸Qoolluwwi keen ixxuwwi anno'iinsi aa'llo'i hanqa maaxxoo'n wocco'oka kiina kuroommo.

¹⁹Uulli ixxuwwina xale'e uwwamaa hee'ukko; mulli uulli mannim ixxuwwi lambe'enne hamaaranto'oyyo.

²⁰«Manna u'nnisukkuuyyi hee'oo boqqi manchiinsi umu'l doolli hundam hawwi annannihooyyo.

²¹Ixxi maccenne muggisoo sagar hundi ammanem macceesamookko; ‹xumminne hee'oommo› yaa sawwoo ammane fanguwwi ixxonne hawwo afissamo.

²²Ixxek saam bisa'inne lehimmi ihu bikkina tuunsiinsi gibaa xoroo neeyyat bee'e.

²³Ixxi maar ammarina hurbaat ihookko; oo manchi ixxena balli tuunseena hincukkisa la'ookko.

²⁴U'nnii kichchechchii ixxo baddisookko; orina gudu adi'llisam malaayyookko.

²⁵«Mashka'oomim ku manchi ixxeka woda Waa'anne hanenne ki'isaakko; hundam xanoo Waa'annem iggaakko.

²⁶Geejji qoxxaalli agira amadaa Waa'inne uullixxameena firaakko.

²⁷Illi kolli di'irinne ifiisamuta'nnim gubeedim geejjuta'nnim.

²⁸«Ku manchi gindamaakkoo beero'uwwannee ubeena hincaakkoo diih minneewwannee hee'ookko.

²⁹Ixxi kanniinsi eehid goddaanchi ihooyyo; horim ixxenne maqire hee'ooyyo; ixxi ammaxxim uullanne haraarooyyo.

³⁰Tuunsiinsi xoreena xanooyyo; caaffuwwi giirinne shokkukkaannisaa fiitim hafachchinne giggiru haqqichchisaa ihookko.

³¹Ixxi gaga qawwiisukkuuyyi kora'i luwwanne bakke'u bikkina awwaad bee'an ihaa gatookko.

³²Amman afoo'nnim lugum gogoo haqqichchisaa caaffuwwim la'mmaagge latoobee'aannisaa ihookko.

³³Mishoo'nnim hamaraar giggiroo woyi'n xudisaa fiit giggiroo wee'l haqqichchisaa ihookko.

³⁴«Waa'a baddoobee'i dummichchik shumo'i bi'ookko; maqanxinne baxamu minneewwim giirinne shokkookko.

³⁵Eehido'i manni jor luwwa sawwitamo; hantaarom baxxamo; ixxuwwi wodan qawwiishshi sawwitinne wo'mmaakkoohane» yukko.