Read Hadiyya Iyyoob Kitaaba 16 Bible Online

Iyyoob Kitaaba 16 - Hadiyya bible

Iyyoob Kitaaba 16

¹Iyyoobim dabaraa

²«Kaka labookkoka lobakata dut woshsha macceesaammo. Ki'nnuwwi qoxxissakkam manna labbakku'uuyyi kichchechchanne hanenne kichchechcha eddakkam keeno.

³Ka awwaad bee'i ki'nnuwwi woshshina lasaanchi bee'anennihe? Iinninne kaa'nna fitantakkamisa issu mashka'i maruwwa?

⁴Ki'nnuwwi i beyyonne ikkakka'a an odim ki'nnuwwi beyyonne ihaammoota'n gadaa horoore heekkeesummuuyyi kaba ki'nnuwwi yitakkamoka hundam axisaa ki'nnuwwanne wocimma xanam hee'ummo.

⁵Ee'isam i sogitaninne kinnuwwa qoxxiseenaa qoxxitakkamisinam lobakata woceenaa xanam hee'ummo.

⁶«Ihukkaarem lobakata wocumta'nnim fayye'oommoyyo; iyyaqqaa cawwumta'nnim u'n iinniinsi annannihooyyo.

⁷Waa'a! Kabada'i hoogissaatto; i abaroosa hundam bi'issaatto.

⁸Diina'isa u'nnissaa amaddaatto; i orachchim nacaakko; manni ‹Ku hundim afukkok baxu baaxiilinnette› yoolla.

⁹Waa'i eesenne quuqaa i orachcho muransukko; eese sabaa u'nnisukko; nadadaatini inqiicukko; i diinakkichchim ixxi ille eesenne xuxxaa'aakko.

¹⁰Minaadab i kululleetanne wixxita'a eesenne naacanto'o; gadda'atim i xabano oobo'inne aphphisso'o.

¹¹Waa'i jor mannina eese higisaa uwwukko; boqquwwi kee'n angannem ubbuusukko.

¹²Xummam hee'am hee'ummo; ihukkaarem Waa'i ixxi quunqinne iiqansaa urukko; i leella'am xagaraa deexukko; qasimma losakkeena uullisakko'i mare'isam issukko.

¹³Xiyya kolli hundinnem darabaa eese madisukko; murom qishixxat bee'eka qasaa muransukko; dambom uullanne dunukko.

¹⁴Edaa edaatim omassukko; malaayyaam o'l manchisam xophxophaa aphphisukko.

¹⁵Kichchechchi lophphimmiinsi ki'ukkok xiddi eddechcha edde'ummo; kaa'amaatim buchchanne ubummo.

¹⁶Lobakata wi'llummi bikkina illi kasharaakko; i illi kollim dashshaa heemachchaakko.

¹⁷Ihukkaarem an baxummi baaxiil bee'e; uunxatom Waa'i kollonne hincaa'oommok muccur wodaninnette.

¹⁸«Uulla, eesenne afu barche'e maaxxitte; hanqa siideena laaroommi laachchim ifiisamaa gatoo'isa issititte.

¹⁹Oono'o, i bikkina naqqasookkokii i bikkina fitamookkokii iimanenne yookko.

²⁰I besh gadimminne moo'llota'nnim an Waa'i illagenne i indiidda dunoommo.

²¹Manni manna araassoohaannisam mannaa Waa'aa araassoo manni hee'uta'n erane.

²²I umullek lasaanchi hincoolla; daba'lloombee'i beyyom mareenam hofqax amman gataakko.