Read Hadiyya Iyyoob Kitaaba 17 Bible Online

Iyyoob Kitaaba 17 - Hadiyya bible

Iyyoob Kitaaba 17

¹«I umu'l doolli beeddeena hincaakko; fooshshe'immam hoogaammo; waammanne di'llimmiinsi bagaan gatu luwwi bee'e.

²An naacantam keenina lelli ihaammo; eese sabbamisam moo'oommuulla.

³Waa'a! Kiinniinsi bagaan iina hara'mmaanchi bee'i bikkina at ki gagim lubbataanchi ihe.

⁴Qoossitambee'isa ixxuwwika wodano amaddaatto; ee bikkina ixxuwwina kaachcha uwwititte.

⁵Diinate siideenaa yaa ixxi beshichcho jorina higisaa uwwoo manchik barche'i ixxi oosonne afookko.

⁶Waa'i eesenne manni osaroo'isa issukko; manni ixxi illenne anja tufoo manchisam ihummo.

⁷Kichchechchiinsi ki'ukkok i illi jaamukko; i orachchim higoo hafisa ihaakko.

⁸Hanqo'i manni ka woshshanne muggito'ookko; muccur mannim boqquwwi keenonne quuqqo'ookko.

⁹Ihona bagaan muccur manni hanqo'i googiinsi fittamoyyo; ixxuwwi malaayyenne hanenne malaayye eddu'uuyyi mattamo.

¹⁰Ihukkaarem ki'nnuwwi hundim daballitakka'a waattakka'a iinninne fitantakkota'n ki'nnuwwi lambe'iinsi mat qooram siidoommoyyo.

¹¹«I umu'l doolli beeddaakko; i sawwitii mixanii kora'am gataakko.

¹²Ku manni hiimo, balla yitamo; caakka odim tuunseenatte yitamo.

¹³Kannii eehid iina yoo gada'i waammamimma; eekke'ennem tuunsonne iinse'oommo.

¹⁴Waammam ‹Iyyanna› yaa weeshoommo; eese itoo daquuram ‹Iyyumma› te'im ‹Iyyaayya› yoommo.

¹⁵Eehannah iina ma neeyyat hee'aate? Iina neeyyat ihoo luwwam ayyi moo'ookko?

¹⁶An waammamummuuyyi i neeyyat iinninne maqirem waammoronne dilloohonnihe?» yukko.