Read Hadiyya Iyyoob Kitaaba 18 Bible Online

Iyyoob Kitaaba 18 - Hadiyya bible

Iyyoob Kitaaba 18

¹Shuha'i uulliinsi Bildaad yakkam manchi dabaraa

²«Iyyooba, mahina woshsha lonsitoolla? Hino'o, neese woncoommi woshsha erisa macceese.

³At neese mahina fooraam diinaxxisa xiggoolla? mahina qoossimbee'i gawwuwwisa issitaa moo'lloolla?

⁴At quuqqittaare ki gaga hawwoddootto bagaan ki quuqimminne uulli udma'i ihaa gatoohonnihe? geejji kinneewwim beyyiinsi xoqalamooyyo.

⁵«Baaxiilaanchik caakki xoo'ookko; gii'l labanim diffaa bi'ookko.

⁶Ixxi dukkaa'nnek caakki tuunsookko.

⁷Taakke'oo malaayyim hoogookko; ixxi sawwoo hantaarim ixxo ubbuusookko.

⁸Ixxi gaqqi lokkinnem maraa qaashanne amadamookko; shikkim lokkonne xaaxamookko.

⁹Qaash ixxeka sinxichcho amadookko; shikkim xammammaa'aa amadookko.

¹⁰Uulli baddimmi us ixxena biddiqaakko; taakke'oo googonnem qaash gudaakko.

¹¹«Ixxi kululleetanne muggisoo luwwi ihookko; laseesaatim hollookko.

¹²Ixxi malaayyi hundim sibaarinne beeddaakko; boobanim bi'iseena gudaakko.

¹³Shoo jabbi ixxo amadaakko; angaa lokkoo hundam itaakko.

¹⁴Kichchechchi bee'eka amma'nnamaa hee'oo miniinsi hollamaakko; hundam baddisoo lehina ushe'amookko.

¹⁵Ixxi min giirinne shokkookko; ixxi minennem bukkamukkuuyyi aphphoo kin binnookko.

¹⁶Xaph luguminne gogoohaannisaa caaffuwwim giggiroo haqqichchisaa ihookko.

¹⁷Ixxek sad uullinsi bi'ookko; dummichchi beyyonnem ixxi summa tiirookkok hee'ooyyo.

¹⁸Caakkiinsi tuunsonne hollamookkoo; ka uulliinsim bi'ookkoo.

¹⁹Minaadaphphi lambe'enne ixxena qachchi te'im shumo'i hee'ooyyo; hee'u uullannem ixxi beyyo lago aa'ookkok siidamooyyo.

²⁰Eelliinchi firoo beyyiinsi aagoo beyyi afeebe'e yoo manni ixxonne afu hawwo macceessa'a baddimminne huxe'llamo.

²¹Hinki ammanem jor manchikii Waa'a baddoobee'i manchikii lasaanchi saam kane» yukko.