Read Hadiyya Iyyoob Kitaaba 19 Bible Online

Iyyoob Kitaaba 19 - Hadiyya bible

Iyyoob Kitaaba 19

¹Iyyoobim dabaraa

²«Eese u'nnissakkamok hinki balli afeebe'e? Woccakkam woshshinne i malaayye hoogissakkamokdu hinki balli afeebe'e?

³Oono'o, tommi kore eese game'llitokko'o; sholliissakku'uuyyim hofqaxam tuuttakko'oyyo.

⁴Hanqo'isam huushamaammoohan ihulas i gaga hawwodamoommo bagaan ki'nnuwwa hawwodoommoyyo.

⁵Ihukkaarem ki'nnuwwi gaga iimiimaa'llakka'a i sholle'nna iinninne fitantakkeena awwaaxxitakkamuulla.

⁶Ihukkaarem ka hawwo hundam eesenne afisukkokii qashanne amadamoommisa issukkokii Waa'i ihukkisa laqqehe.

⁷‹Hawwodamummo› yaa laarummaarem macceesookkoka siidummoyyo; sagara iimaa'aa laarumaarem hanqa siidoommoyyo.

⁸Waa'i i goog hundam xufu bikkina higoommi goog bee'e; maroommi kollom tuunsinne ifiisaakko.

⁹I adilla'n mare'e i horooriinsi massaakko; i lombam sheelataa hooraakko.

¹⁰I orachcho kolli hundinnem qocca gindaa guullukko; iina yoo neeyyatam xaph xoqolamaa uboo haqqichchisa issukko.

¹¹Waa'i ixxi quunqika bala'a eesenne dilliisukko; malaayyaam diinakkichchisam xigukko.

¹²Eese bi'iseena ixxi gogota asse'ukko; ixxuwwim i dukkaa'n kululleetanne girba axissa'a eese kibbito'o.

¹³«Waa'i iyyabbaayyuwwi iinniinsi qee'llitamisa issukko; eese laqqam manni hundim eese allaggisso'o.

¹⁴I qarmanni iinniinsi qee'llukko; i beshim eese xadukko.

¹⁵I minenne koyyinano aa'ummi keen hundim eese xaddo'o; i minenne baxxam meenti awwaadaanim eese waaraanchisa issito'o; allaggichchisam moo'llo'o.

¹⁶I awwaadaanchim weeshoommaare dabachcha uwwooyyo; hara'mmoo'isina uunxoommaarem ha'yyooyyo.

¹⁷I meentichchonam i fooshshi sabisaakko; iyyabbaayyuwwim eese shigigito'ookko.

¹⁸Ciilluwwim eese gaddo'ookko; eese moo'lla'atim osatto'ookko.

¹⁹Hincee'n beshim eese shigigito'ookko; erisa iittoommi mannim diina'i ikka'a eesenne ki'llo'ookko.

²⁰I maar beeddaa omachchi miqinne amaxxamaakko; lehiinsi gatummokim hofqaxinatte.

²¹«Iyyabbaayyuwwa, Waa'ik angi eese aphphisu bikkina Ki'nnuwwi iina kichche'llehee qishixxehee.

²²Waa'i eese yaayyukkisam Ki'nnuwwi odim eese mahina yaayyitakkamuulla? Kabad afeebe'e u'nnissakko'i qax ihooyyonnihe?

²³«Kabad afeebe'e wocummi sagara sawwookkokii kitaabannem kitaaboo manchii hee'uta'n hinkaa'nna liiramam hee'ummo?

²⁴Heer heerina hee'oo'isina xaa'l qalaminnee irsaasinnee kinanne kitaabakkota'n hinkaa'nna eran hee'ukko.

²⁵Ihukkaarem eese gatisaanchi hee'oohan ihukkisaa lasaanchi ammanennem eese gatiseena uullanne uulloo'isaa la'oommo.

²⁶I omachchi itamaa beedduta'nnim i maariinsi annannihaa Waa'a moo'oommisa la'oommo.

²⁷An i gagim ixxo moo'oommo; mullan ihoo'n i illi ixxo moo'ookko; ee bikkina i wodan ee ayyaamo erisa quluxaakko.

²⁸«I besha, eese aceeqassakku'uuyyi u'nnissakkeena ‹Ixxonne afu hawwik mashka'i ixxi gagame› yitakku'uuyyi woccakkamuulla.

²⁹Waa'ik quunqi bisa'inne guzumo'amakkamisa issoo bikkina bisa'inne bi'llakkambee'isa ege'llehe; Waa'ik oogat yoo'isam laqqehe» yukko.