Read Hadiyya Iyyoob Kitaaba 2 Bible Online

Iyyoob Kitaaba 2 - Hadiyya bible

Iyyoob Kitaaba 2

¹Ayyaamiinsi mat ayyaamo Waa'i asse'amaan Waa'i illagenne hincito'i ammanenne Sheexaanchim ixxuwwinne maqirem hincukko.

²Waa'im Sheexaanchina «Hanniinsi waattitto?» yaa xa'mmukko; sheexaanchim «Uulli hundam do'ummo; ekkidii kidii daba'llamummo» yaa dabarukko.

³Waa'im Sheexaanchina «I awwaadaanchi Iyyooba qoossitaa moo'llittonnihe? Uullanne ixxe'nnoo miiqakkam luwwi bee'eki xabbeeni eese baddookkokii joriinsim annanni ihaakkoo manchii bee'e; at ixxo bi'issona cawwoommisina ki'isansitoottok kora'atteme; oono'o, Iyyoob kabad afeebe'em muccur ihukkisam yookko» yukko.

⁴Sheexaanchim dabaraa « ‹Omachchi bikkenne omachcho›[1] yakkamisam manchi beet ixxi foore gatixxeena yookkoka hundam uwwookko» yukko.

⁵Ihukkaarem kaba at ki anga biddiqaa'llaa ixxi orachcho hawwoddilas hanqo'isam ki illagenne keese duumookko» yukko.

⁶Waa'im Sheexaanchina «Danaamo, shititte bagaan ixxonne hassitti luwwi hundam issiteena xantootto» yukko.

⁷Ee lasge Sheexaanchi Waa'i illagiinsi maraa Iyyoobika horoo'l saraatiinsi ki'isaa lokki xuranqi afeebe'e kee'mmaalli omarinne hawwoo'isa issukko.

⁸Iyyoobim ee lasage gii'llibuchchanne afuuraa orachcho gala'inne haarimma asheerukko.

⁹Ixxi meentichchom «Kabadem Waa'anne yoo ki amma'nnat qoxxukkisam yoohonnihe? Eehanniinsa'e Waa'a duuntaa lehe» yito'o.

¹⁰Ihukkaarem Iyyoob isena «Qawwi meentiinsi matesa woccitto; Waa'i angiinsi eroomma aa'nnummisam jor luwdu aa'nnoommoyyonnihe?» yukko. Iyyoobim oo hawwi hundim afukkaarem hore'em baaxiilo baxukkoyyo; Waa'annem qaraaraalli sagara wocukkoyyo.

¹¹Teemaa'n Eelfaaz, Shuuha'i Biidaadii Naa'imaa'i Xoofaarii sasim Iyyoob beshshuwwi hee'llo'o. Ixxuwwi Iyyoobanne afu hawwo macceesso'i ammanenne kichche'lla'a qoxxisseena weeccanta'a mateeyyanne Iyyoob beyyo waatto'o.

¹²Ixxuwwim qee'llonne hee'llu'uuyyam moo'lla'a Iyyoobatte ihukkisa annanni issita'a laqqeena xanto'oyyo. Iehukkaarem ixxotte ihukkisa laqqa'a lasage kichchechchinne ixxuwwi eddechcha dereetto'o; diram iim hootta'a binnaa'llu'uuyyii ixxuwwi horoorennem laphphitu'uuyyii sagara iimaa'lla'a wi'llito'o.

¹³Ixxonne afu hawwi kee'mmaalli ihukkisa moo'llo'i bikkina Iyyoobinne maqirem lamar ballaa hiimoo uullanne afuutta'a ma'lluwwam woccoo'n higisso'o.