Read Hadiyya Iyyoob Kitaaba 20 Bible Online

Iyyoob Kitaaba 20 - Hadiyya bible

Iyyoob Kitaaba 20

¹Naa'imaaxxi uulli Soofaarim dabaraa

²«Iyyooba, woccoo woshshi nadadiisu bikkina dasoo'nnim dabachcha uwweena hasaammo.

³Game'llaxxi sagara macceesummi bikkina dabachcha uwweena gaaggaabaammo.

⁴«Manni ka uullanne qooccamukkaanniinsi ki'isaa gaassiinsim ka'isa ihukkisa laqqootto.

⁵Baaxiilaan mannik sharimmi hoffi ammaninatte; Waa'a baddoo bee'i mannikim liiranchi illi cilimmaaxxi qaxanne bi'ookko.

⁶Boqqi manchi iimane afoo qaxa iimiimukkaarem horoorim duuba nakkuta'n

⁷Ixxi gaqqi shu'mmisa heer heerina bi'ookko; ixxo laqqam manni hundim ‹Hanno afukko?› yitamo.

⁸Haqaawwisa bi'oo bikkina siidamooyyo; hii'm ajuuttisam la'mmaagge moo'amooyyo.

⁹Hee'oo beyyiinsi bi'oo bikkina mataagge moo'u manchi la'mmaagge moo'ooyyo.

¹⁰Ixxi buxiinsi malaayyisaa massu amaxxa ixxi oos worwaatta'a miqqamo.

¹¹Malaayyaam hee'u ixxek woradda'n orachchi hofqax ammaniinsi lasonne buchchi ihookko.

¹²«Jolli ixxi suumina hurbaaxxisa xee'uta'nnim ixxi allabinnem xee'ixxamuta'n

¹³beeddoobee'isa suumenne amadaa dabaransukkuuyyi hosuta'nnim

¹⁴hurbaatoom godaphphi woronne qaraarookko; hamashshi qubisam ihookko.

¹⁵Boqqi manchi itu hora goxxamookko; Waa'im dabaraa ixxi godaphphi woriinsi fissookko.

¹⁶Boqqi manchi itoo luwwi hundim shoo qaraa'llisa ihookko; hamashshi qubisa ihaatim shookko.

¹⁷Wee'l zayti dirisisa dillukkuuyyi marabii adii daajji wo'isa daadukkuuyyi moo'oo'nnim lehookko.

¹⁸Badaru luwwika misha dabaraa uwwookko bagaan itooyyo; daddaraa siidu luwannem liiramooyyo.

¹⁹Mashka'oomim bux keeno ciimaa maxaraakko; baxubee'i minem malaayyinne hooraakko.

²⁰Ixxek jor mixanim ixxena usheexxato uwwooyyo; wixxaa'u hor hundim ixxo gatiseena xanooyyo.

²¹Ixxi amaxxi hundam beeddoo bikkina soodina itoo luwwa siidooyyo.

²²Makkixxaa hee'onam ixxonne qeddi afookko; kee'mmaalli hawwonnem ubookko.

²³‹Itaa goddoommo› yukkuuyyim Waa'i ixxeka kee'mmaalli quunqa dilliisookko; bala'am ixxi hanenne ga'nnisookko.

²⁴Xaa'l bisa'iinsi xoruta'nnim naas xiyyi qasookko.

²⁵Xiyyim huruuraa afareen firookko; belelleesoo ludim afare muransaa firookko; kee'mmaalli baachchim ixxo amadookko.

²⁶Wixxaa'u amaxxi hundim gambabbi tuunsonne bi'ookko; manni xanqisubee'i giirim shokkiisookko; minenne gatu amaxxi hundam giir itookko.

²⁷Iiman ixxi baxu baaxiilo caakkisookko; uullim ixxena masokkichchi ihaa ki'ookko.

²⁸Waa'i quuqoo ayyaamo ixxi minenne yoo amaxxi hundam diris aanshaa massookko.

²⁹«Waa'i baaxiilaan keenina qoodu gada'ii ixxi beyyiinsim gudisu sharadii kane» yukko.