Read Hadiyya Iyyoob Kitaaba 21 Bible Online

Iyyoob Kitaaba 21 - Hadiyya bible

Iyyoob Kitaaba 21

¹Iyyoobim dabaraa

²«Hino'o, wocoommi woshsha erisa macceessehe; oohim eese qoxxissakko'aannisanne xigamookko.

³Mataagge wocoommi kore uwwehe; ee lasage hassakko'i qaxa eesenne osattakkeena xantakkamo.

⁴«Hanqinam an kichche'oommok mannannettennihe? iyyaqqimma hoogumta'ndu iina labooyyonnihe?

⁵Hino'o, i kolli moo'llehe; wocimma hooggakkam qaxa i duuha'i kinnuwwa hiriraa'ookko.

⁶An i gagim sawwoommaare muggisookko; i orachchim baddimminne huxe'ookko.

⁷«Boqqi mannik umur qeeraa'llaa amaxxim lophphaa uullanne hee'llamok mahinatte?

⁸Ixxuwwim oosoo oos oosoo lilla'atii makkixxita'atii hee'llu'uuyyi moo'llamo.

⁹Matem kichchechchi bee'em xumminne hee'llamo; Waa'ikim booban ixxuwwanne afukkoyyo.

¹⁰Fooraam diinat matem hawwi bee'em fikkaannookko; larim kara qarooyyo.

¹¹Ixxuwwi oos gereebbi allaachchisa fatakitamo; ixxuwwi ciilluwwim daabbattamo.

¹²Dibbe'ee diitta'aa aphphissu'uuyyi xurumbam fuggu'uuyyi liiranchinne kaddamo.

¹³Ixxuwwi umura makkixxita'a higissamo; matem hawwom moo'lloo'n letamo.

¹⁴«Ee'isa ihaa hee'ukkuuyyim Waa'ina ‹Niinniinsi qee'lle; ki googom lanqeena hansoommoyyo› yitamo.

¹⁵Ee'isam ‹Ixxena awwaandoommisina hundam xanoo Waa'i ayyette? Ixxo uunxinummaardu maha siindoommo?› yitamo.

¹⁶Ka'isa yitamokim ixxuwwi anganne yoo amaxxi hundim ixxuwwi malaayyinne siidamukkoka labissam bikkinatte; ihukkaarem an baaxiilaan kee'n sogitano aa'oommoyyo.

¹⁷«Baaxiilaan kee'n caakki xoo'u amman yoohonnihe? Boobandu ixxuwwanne dillu amman yoohonnihe? Waa'i quuqaa ixxuwwa guzumo'u ammandu yoohonnihe?

¹⁸Hafachchi massoo bura'isa ikko'i amman hambu'llam massoo luunqisa fii'anto'i ammandu yoohonnihe?

¹⁹«Ki'nnuwwi ‹Anno'i baaxiilinne Waa'i ooso guzumo'ookko› yitakkamo; hino'o, Waa'i baaxiilaano ixxuwwi gagam guzumo'ona; eehid ihulas ixxuwwi baaxiilo laqqeena xantamo.

²⁰Baaxiilaan keen ixxuwwi gagim baxxo'i baaxiilinne guzumo'antona; hundam xanoo Waa'im ixxi quunqa dilliisona.

²¹Manchi lehaa lasonne ixxi abaroos bikkina mah sawwookko?

²²Lob keenonne oogatoo Waa'ina lachcha losiseena xanookkok yoohonnihe?

²³Mat manchi xumminne usheexxaa afuurukkisam wo'm malaayyinne hee'ukkuuyyim lehookko.

²⁴Orachchi geejjaa mishisukkuuyyim miqim qoxxukkisam lehookko.

²⁵Mullek odim mat eroommam moo'oo'n heechchi qaraarukkisam lehookko.

²⁶Hundim waammoronne dillita'a buchchi ikkamo; daquurim ixxuwwa itookko.

²⁷«Oono'o, eese hawwoddakkeena a'llantakko'oka Ki'nnuwwi wodanonne sawwitakko'i hantaaro la'aammo.

²⁸Ki'nnuwwim ‹Ee lob manchik min hannonnette? Ee baaxiilaanchi manchikdu gatti beyyi hannonno?› yitakkamo.

²⁹Gooqqi araata xa'mmitakko'oyyonnihe? Kutto'i woshdu erisa macceessakko'oyyonnihe?

³⁰Ixxuwwim ‹Boqqi manni booban waaroo ammane hawwodantamoyyo; Waa'ik quunqi waaroo ammanem gattamo› yita'a wocco'ookko.

³¹Boqqi mancho baxu jolli bikkina acceeqasookkok ayyette? Baxu jolli bikkinam guzumo'ookkok ayyette?

³²Lehaa lasonne leesha iyyakka'a waammi beyyo massakkamo; waammim erisa egeramookko.

³³Xigiinsi hanaan ihaakkoo minaadab waammakkam ammane hee'ookko; waammi buchchim ixxena makkookko.

³⁴«Eehannah ki'nnuwwi kora'i woshshinne eese qoxxissakkeena mahina yakitakkamuulla? Dabattakkam dabachchim qophpha'nnane» yukko.